Sõadga 3 - WẼNNAAM SEBRE 2014

Leevi buudã tʋʋmde

¹ A Aarõ ne a Moyiis pendã neb la woto, wakat ninga Sẽn-Ka-Saab sẽn dag n gom ne a Moyiis Sinayi tãngã zugã.

² A Aarõ dag n tara kom-dibli a naase. Bi-kãsengã yʋʋr la a Nadaabe, la a taabã yʋy boondame t'a Abihu, a Eleyazaare, ne a Itamaare.

³ Sẽn-Ka-Saab rag n welga bãmb toor tɩ b yɩ maan-kʋʋdba, la bãmb sɩnga b maan-kʋʋrã tʋʋmde.

⁴ La a Nadaab ne a Abihu kii zĩ-sõngẽ wã, Sinayi we-raoogã pʋga. Bala, bãmb talla bugum sẽn ka zems n wa n na n yõog kũunã Sẽn-Ka-Saab taoore. La bãmb ned ba a yembr dag n nan ka paam bi-ribl ye. Dẽ, yɩ a Eleyazaar ne a Itamaar bal n kell n naag b ba wã n maan maan-kʋʋrã tʋʋmde.

⁵ Sẽn-Ka-Saab yeela a Moyiis yaa:

⁶ «Kɩt tɩ Israyɛll neb nins sẽn yaa Leevi buudã wa sõng maan-kʋʋd a Aarõ.

⁷ Bãmb na n sõnga a Aarõ n maan b tʋʋmdã sɛk roogã noore, Israyɛll nebã fãa yʋʋr yĩnga.

⁸ Bãmb na n gesa sɛk roogã teed fãa yelle, la bãmb n na n deega Israyɛll nebã zĩig n ges sɛk roogã tʋʋm yelle.

⁹ Bɩ f rɩk Leevi buudã n kõ a Aarõ ne a kom-dibli wã, tɩ b tõe n sõng a Aarõ ne sɛk roogã tʋʋmde, Israyɛll nebã fãa yʋʋr yĩnga.

¹⁰ Bɩ f bãng tɩ yaa a Aarõ ne a kom-dibli wã bal n tog n maan maan-kʋʋr tʋʋmdã. La nin-zaalg sã n kolg be bɩ f kɩt tɩ b kʋ-a.»

¹¹ La Sẽn-Ka-Saab leb n yeela a Moyiis yaa:

¹² «Ade, yaa mam mengã n yãk Leevi buudã Israyɛll nebã sʋka, tɩ b tõe n led Israyɛll nebã kom-dẽemsã. La Leevi buudã na n yɩɩ mam dẽnda.

¹³ Sɩd me, daar ning mam sẽn kʋ Ezɩpt kom-dẽemsã fãa wã, mam welga Israyɛll nebã kom-dẽems toor m mengã yĩnga, la bãmb rũmsã kom-dẽemsã fãa me yaa maam n so. Mam yaa Sẽn-Ka-Saabo.»

Leevi buudã tʋʋmde

¹⁴ Sinayi weoogã pʋga, Sẽn-Ka-Saab yeela a Moyiis yaa:

¹⁵ «Bɩ f sõd Leevi buudã nebã zak-zaka, la roog-roogo. Bɩ f sõd raopã fãa ne kom-dibli nins yʋʋm sẽn ta kiuugu, la sẽn yɩɩd dẽ.»

¹⁶ La a Moyiis sõda nebã wa Sẽn-Ka-Saab sẽn yeelã.

¹⁷ A Leevi kom-dibli wã yaa a Gɛrsõ, a kehate, ne a Meraari.

¹⁸ Ad a Gɛrsõ kambã yʋy wa sẽn zems b rotã. Yaa a Libni, ne a Sɩmeyi.

¹⁹ Ad a kehat kambã yʋy wa sẽn zems b rotã. Yaa a Amram, ne a Yitseyaare, la a Ebrõ, ne a Uzɩyɛlle.

²⁰ Ad a Meraari kambã yʋy wa sẽn zems b rotã. Yaa a Mali ne a Musi. Nin-bãmbã fãa yaa a Leevi buudã neb b sẽn sõd roog-roogo, la zak-zakã.

²¹ A Gɛrsõ yagensã pʋɩɩ rot a yiibu: yaa Libni roogã, la Sɩmeyi roogã.

²² Gɛrsõ roogã neb nins b sẽn sõdã yaa neb tus a yopoe la kobs-nu. La yaa raopã ne kom-dibli nins yʋʋm sẽn ta kiuugu, la sẽn yɩɩd woto.

²³ Gɛrsõ yagensã ra tii nin-taoore, n be sɛk roogã kuidgẽ.

²⁴ A Layɛll biig a Elyazaf n dag n yaa Gɛrsõ nebã naaba.

²⁵ Ad bũmb nins yell Gɛrsõ yagensã sẽn dag n get sɛk roogã pʋgẽ: yaa sɛk roogã fuugu, a fu-pindgã, ne a gãn-luts a yiibã, la sɛk roogã noor peen-lillã.

²⁶ Bãmb n leb n dag n get sɛk roogã zak gũbgr pɛɛlã, ne zakã rignoor peen-lillã yelle, la ne wĩy nins sẽn na n tall n ti sɛk roogã tõrã yelle. La zakã gũbga sɛk roogã ne tẽn-kugrã, la yaa Gɛrsõ yagensã n dag n get bõn-kãens fãa yelle.

²⁷ A Kehat yagensã pʋɩɩ rot a naase: yaa Amram roogã, a Yitseyaar roogã, a Ebrõ roogã, ne a Uziyɛll roogã.

²⁸ Raopã ne kom-dibli nins yʋʋm sẽn ta kiuugu, la sẽn yɩɩd dẽ wã sõor yaa neb tus a nii la kobs-yoobe. Yaa bãmb n get sɛk roogã teed yelle.

²⁹ A Kehat yagensã rag n tii b fu-rotã sɛk roogã nug-goabga.

³⁰ Yaa a Uziyɛll biig a Elisafan n dag n yaa Kehat buudã naaba.

³¹ A Kehat yagensã n da get kaoolã koglgã yelle, la b get taablã, ne fɩtl doagendgã, la tẽn-kug a yiibã, ne lagd nins fãa b sẽn tar n tʋmd zĩig sẽn welg toor n yɩɩdã pʋgẽ tʋʋmã, n paas ne peen-lillã sẽn lill zĩig sẽn welg toor n yɩɩdã sɛk roogã pʋgã, ne a teed a taabã fãa yelle.

³² Yaa maan-kʋʋd a Aarõ biig a Eleyazaar n dag n yaa Leevi buudã naaba. Yẽnda n dag n yaa neb nins fãa sẽn tʋmd zĩ-sõngã pʋgẽ wã taoor soaba.

³³ A Meraari yagensã pʋɩɩ zĩis a yiibu: yaa Mali roogã, ne Musi roogã.

³⁴ Raopã ne kom-dibli nins yʋʋm sẽn ta kiuugu, la sẽn yɩɩd dẽnda wã sõor yaa neb tus a yoob la kobs-yi.

³⁵ Yaa Abigayɩll biig a Suriyɛll n dag n yaa Meraari buudã naaba. Meraari buudã dag n tii b fu-rotã sɛk roogã nug-rɩtgo.

³⁶ Meraari buudã n dag n get sɛk roogã ra-pegdã, a ra-paadsã, ne a ra-lugdsã ne b tebendsã yelle, ne teed a taabã fãa yelle.

³⁷ Leb n yaa bãmb n get ra-lugds nins sẽn gũbg zakã ne b tebendsã yelle, ne biili wã ne b wĩyã fãa yelle.

³⁸ A Moyiisi, a Aarõ ne a kom-dibli wã rag n tii b fu-rotã yaanga, sɛk roogã neng taoore. Bãmb n dag n get sɛk roogã tʋʋm yelle, Israyɛll nebã yʋʋr yĩnga. La nin-zaalg sã n kolg be, b tog n kʋ-a lame.

³⁹ Leevi buudã raopã ne kom-dibli yʋʋm sẽn ta kiuugu, la sẽn yɩɩd dẽ wã fãa sõor yaa neb tus pisi la yiibu. Yaa Sẽn-Ka-Saab n dag n kɩt t'a Moyiis ne a Aarõ sõd bãmb roog-roogo.

Kom-dẽems fãagre

⁴⁰ Sẽn-Ka-Saab yeela a Moyiis yaa: «Sõd Israyɛll nebã kom-dẽems nins fãa sẽn ya-b raop yʋʋm sẽn ta kiuugu, la sẽn yɩɩd dẽ wã, n gʋls ned kam fãa ne a yʋʋre.

⁴¹ Bɩ f welg Leevi buudã neb toore, tɩ b yɩ maam a Sẽn-Ka-Saab rẽnda, n led Israyɛll kom-dẽems nins fãa sẽn yaa raopã zĩiga. La f welg Leevi buudã nebã rũms kom-dẽems me toor tɩ b yɩ mam dẽnda, n led Israyɛll nebã rũms kom-dẽems zĩigẽ.»

⁴² La a Moyiis sõda Israyɛll nebã kom-dẽems nins yʋʋm sẽn ta kiuug la sẽn yɩɩd dẽ wã, wa Sẽn-Ka-Saab sẽn dag n yeel yẽnda wã.

⁴³ Dẽ, kom-dẽemsã b sẽn sõd n gʋls ned kam fãa ne a yʋʋrã sõor yaa neb tus pisi la a yiib la kobs-yi la pis-yopoe la a tãabo.

⁴⁴ Sẽn-Ka-Saab yeela a Moyiis yaa:

⁴⁵ «Bɩ f welg Leevi buudã neb toore, tɩ b yɩ maam a Sẽn-Ka-Saab rẽnda, n led Israyɛll kom-dẽems nins fãa sẽn yaa raopã zĩigẽ. La f welg Leevi roogã nebã rũms kom-dẽems me toor tɩ b yɩ mam dẽnda, n led Israyɛll nebã rũms kom-dẽems zĩigẽ.

⁴⁶ La Israyɛll nebã kom-dẽems kobs-yi la pis-yopoe la tãab n yɩɩd Leevi buudã neb sõore. Bɩ f kɩt tɩ b yao yaood nin-bãmb zĩigẽ.

⁴⁷ Bãmb ned kam fãa zugu, fo na n deega wakɩ-koeems a nu, t'a yembr fãa zɩslem tat garem piiga, wa ligd nins b sẽn tar n dɩt zĩ-sõngẽ wã.

⁴⁸ Bɩ f rɩk ligd-kãng n kõ a Aarõ ne a kom-dibli wã. Rẽnda na n yɩɩ yaoodo, f sẽn yao neb nins sõor sẽn zʋʋg Leevi buudã neb sõorã yĩnga.»

⁴⁹ A Moyiis reega ligd ning b sẽn yao neb nins sõor sẽn zʋʋg Leevi buudã neb sõorã yĩngã,

⁵⁰ la ligdã fãa sõor yɩɩ wakɩ-koeems tusr la kobs-tã la pis-yoob la a nu, wa ligd nins b sẽn tar n dɩt zĩ-sõngẽ wã.

⁵¹ La a Moyiis rɩka ligdã n kõ a Aarõ ne a kom-dibli wã, wa Sẽn-Ka-Saab sẽn dag n yeel yẽnda wã.