Sõadga 29 - WẼNNAAM SEBRE 2014

Tãntãad tigri

¹ Kiuug a yopoe soabã pipi daarã, bɩ y tigim taab n waoog maam a Sẽn-Ka-Saabo. Yãmb ka tog n tʋm tʋʋmd badaar ye, bala yaa kɩdeng daare.

² Yãmb tog n waa ne lulla, la pe-raoogo, ne yʋʋmd pe-ribli a yopoe, la b fãa tog n yɩɩ rũms sẽn ka tar zanga, n tall n wa maan maoong sẽn yõogd bugum, tɩ yũugã yaa noog n tat maam a Sẽn-Ka-Saab yam.

³ La rũng fãa zugu, yãmb tog n naaga zom sẽn nag ne kaam. Lull yaa zom kɩlo a wɛ, tɩ pe-raoog yaa zom kɩlo a yoobe.

⁴ La pe-ribl fãa na n yɩɩ zom kɩlo a tãabo.

⁵ La yãmb tog n talla boɛɛg n wa kʋ n maan maoong n kõ maam, y yel-wẽnã sugr kũun yĩnga.

⁶ La yãmb tog n maana maoon-kãng n paas daar fãa maoongã, ne kiuug fãa pipi daar maoongã, b sẽn naagd ne zomã la reezẽ rãamã. Bãmb na n yɩɩ maoong sẽn yõogd bugum t'a yũug yaa noog n tat maam a Sẽn-Ka-Saab yam.»

Sugr kosg maoongo

⁷ Kiuug a yopoe soabã rasem piigã daare, yãmb tog n tigma taab n loe noor n waoog maam, la y ka tog n tʋm badaar ye.

⁸ Bɩ y maan maoong sẽn yõogd bugum t'a yũug yaa noog n tat maam a Sẽn-Ka-Saab yam, ne lulla, la pe-raoogo, ne yʋʋmd pe-ribli a yopoe, la b fãa tog n yɩɩ rũms sẽn ka tar zang ye.

⁹ La rũng fãa tũnugda ne zom sẽn nag ne kaam. Sã n yaa lulla, y tũnugda zom kɩlo a wɛ, la pe-raoog na n yɩɩ zom kɩlo a yoobe.

¹⁰ La pe-ribl fãa tog n yɩɩ zom kɩlo a tãabo.

¹¹ La yãmb tog n talla boɛɛg n wa kʋ n maan maoong n kõ maam y yel-wẽnã sugr kũun yĩnga. La maoon-kãens tog n naaga badaar sugr kosg maoongã, bala, yaa sugr kosg daare, n naag daar fãa maoongã b sẽn maande, n tũnugd ne a zomã, la a reezẽ rãamã.

Zãn tigri

¹² La kiuug a yopoe soabã rasem piig la a nu wã daare, bɩ y tigim taab n waoog Sẽn-Ka-Saabo. La badaare, yãmb ka tog n tʋm tʋʋmd ye. Yãmb tog n dɩka rasem a yopoe wã fãa n maan tigrã.

¹³ La pipi daarã, yãmb tog n talla lulli piig la a tãabo, ne pe-raad a yiibu, la yʋʋmd pe-ribli piig la a naase, n wa maan maoong sẽn yõogd bugum t'a yũug tat Sẽn-Ka-Saab yam, la tog n yɩɩ rũms sẽn ka tar zang ye.

¹⁴ La rũng fãa, y tog n tũnuga ne zom sẽn nag ne kaam. Sã n yaa lulla, yaa zom kɩlo a wɛ. La pe-raoog yaa zom kɩlo a yoobe,

¹⁵ La pe-ribl fãa zugu, yaa zom kɩlo a tãabo.

¹⁶ La yãmb tog n talla boɛɛg n wa kʋ n maan maoong n kõ maam, y yel-wẽnã sugr kũun yĩnga. La maoon-kãens tog n naaga daar fãa maoongã b sẽn maande, n tũnugd ne a zomã, la a reezẽ rãamã.

^17-34 La tigrã rasem a yiibã daare, n tɩ tãag a rasem a yopoe daarã, yãmb tog n maana maoong ne rũms sẽn ka tar zanga, n tũnug ne zomã la reezẽ rãamã kũuni, n paas daar fãa maoongã b sẽn yõogd bugmã. Rũmsã la woto: Yiibẽ daarã, yaa lull piig la yiibu, ne pe-raad a yiibu, la yʋʋmd pe-ribli piig la a naase, n paas boɛɛga. Tãabẽ daarã, yaa lull piig la a ye, pe-raad a yiibu, yʋʋmd pe-ribli piig la a naase, n paas boɛɛga. Rasem a naasã daare, yaa lulli piiga, pe-raad a yiibu, yʋʋmd pe-ribli piig la a naase, n paas boɛɛga. Rasem a nu wã daare, yaa lulli a wɛ, pe-raad a yiibu, yʋʋmd pe-ribli piig la a naase, n paas boɛɛga. Rasem a yoobã daare, yaa lulli a nii, pe-raad a yiibu, yʋʋmd pe-ribli piig la a naase, n paas boɛɛga. Rasem a yopoe wã daare, yaa lulli a yopoe, pe-raad a yiibu, yʋʋmd pe-ribli piig la a naase, n paas boɛɛga.

³⁵ La tigrã rasem a nii daarã sẽn yaa yaoolem daar yãmb sẽn tog n maan tigin-kãseng sẽn welg toorã, yãmb ka tog n tʋm tʋʋmd badaar ye.

³⁶ Bɩ y tall lulla, ne pe-raoogo, la yʋʋmd pe-ribli a yopoe, sẽn ka tar zanga, n wa maan maoong sẽn yõogd bugum, t'a yũug yaa noog n tat maam a Sẽn-Ka-Saab yam.

³⁷ La rũng fãa, yãmb tog n tũnuga zom sẽn nag ne kaam, la reezẽ rãam, wa sẽn zems noor ning b sẽn kõ wã.

³⁸ La yãmb tog n talla boɛɛg n wa kʋ n maan maoong n kõ maam, y yel-wẽnã sugr kũun yĩnga. La maoon-kãens tog n naaga daar fãa maoongã b sẽn maande, n tũnugd ne a zomã, la a reezẽ rãamã.

³⁹ Yaa maoon-kãensã la y na n maand tigr fãa n kõt maam a Sẽn-ka-Saabo, n paas daar fãa maandã, ne a zomã sẽn nag ne kaamã, la a reezẽ rãamã. La y tõe n paasa y zems-n-taar maoongã ne y pʋleng pidsg maoongã.