Sõadga 27 - WẼNNAAM SEBRE 2014

A Selofaad kom-pugli kosgo

¹ A Zozɛf biig a Manaase buudã pʋgẽ, rao a ye n dag n be be t'a yʋʋr boondẽ t'a Selofaade. Yẽnda yaa a Makɩɩr biiga, a Makɩɩr yaa a Galaad biiga, t'a Galaad yaa a Hefɛɛr biiga. La a Selofaad dag n tara kom-pugli. Bãmb yʋy la woto: «Yaa a Mala, a Noa, a Ogla, a Milka, ne a Tirsa.»

² Bãmb kẽnga a Moyiis ne maan-kʋʋd a Eleyazaare, ne Israyɛll buudã kãsem-dãmbã nengẽ, la nebã fãa taoor sɛk roogã noor n tɩ yeel yaa:

³ «Tõnd ba wã kii weoogã pʋgẽ. La yẽnda rag n ka naag a Koore ne a poorẽ dãmbã n kɩɩs Sẽn-Ka-Saab ye. Yẽnda ki a mengã kongr yĩnga. La a yaool n dag n ka paam bi-ribl ye.

⁴ Dẽ yĩnga, tõnd ba wã yʋʋr na n menema a buudã neb sʋka, a sẽn ka tar bi-riblã yĩnga? Bɩ y kõ tõnd zĩig d ba wã ba-biisã sʋka!»

⁵ Dẽ, a Moyiis rɩka bãmb kosgã n wilg Sẽn-Ka-Saabo.

⁶ La Sẽn-Ka-Saab leoka a Moyiis n yeel yaa:

⁷ «A Selofaad kom-pugli wã tara bʋʋm! Bɩ f kõ bãmb zĩig b ba wã ba-biisã sʋka, tɩ yɩ bãmb pʋɩɩre. Yaa bãmb n na n deeg b ba wã pʋɩɩre.

⁸ Rẽ poore, bɩ f yeel Israyɛll nebã yaa: Rao sã n ki n ka bas bi-ribla, bɩ y rɩk a paoongã n kõ a bi-puglã t'a sooge.

⁹ La sã n mikame tɩ kiidã ka tar bi-pugl me, bɩ y rɩk a paoongã n kõ a ba-biisã.

¹⁰ La kiidã sã n ka tar ba-biisi, bɩ y rɩk a paoongã n kõ a ba wã ba-biisi.

¹¹ La kiidã ba wã sã n ka tar ba-biisi, bɩ y rɩk a paoongã n kõ a buudã pʋgẽ ned ninga rogem sẽn tɩ pẽ ne kiidã n yɩɩda. Bõn-kãngã na n yɩɩ no-tũuds Israyɛll nebã sẽn tog n tũ, wa maam a Sẽn-Ka-Saab sẽn wilg a Moyiisã.»

A Zozoe leda a Moyiis zĩiga

¹² Sẽn-Ka-Saab yeela a Moyiis yaa: «Rʋ Abarim tãngã zug n ges tẽng ning mam sẽn na n kõ Israyɛll nebã.

¹³ Fo na n yãnda tẽngã, la fo me na n kii wa f kẽem a Aarõ.

¹⁴ Bala, Israyɛll nebã sẽn wa n zabd ne maam n yẽgemd Sĩn weoogã pʋgẽ tɩ b rata koomã, yãmb kɩɩsa mam noorã, n ka wilg Israyɛll nebã tɩ mam yaa Wẽnnaam sɩd-sɩd ye. Bãmb sẽn dag n gomdã yaa Meriba koomã yelle. Yaa yẽgengã sẽn zĩnd koomã poorẽ Kadɛɛs sẽn be Sĩn weoogã pʋgã wɛɛngẽ.»

¹⁵ Dẽ, a Moyiis yeela Sẽn-Ka-Saab yaa:

¹⁶ «Wẽnnaam Sẽn-Ka-Saabo, yãmb n kõt bõn-naandsã fãa vɩɩm, bɩ y yãk ned n lʋɩɩs y nebã taoore.

¹⁷ Bɩ a yɩ ned sẽn na n tõog n lʋɩ bãmb taoor n tɛ-b wakat fãa. Dẽ, bãmb kõn yɩ wa piis sẽn ka tar pe-kɩɩm ye.»

¹⁸ Sẽn-Ka-Saab leoka a Moyiis n yeela yaa: «Yãk a Nun biig a Zozoe n tik-a ne f nusi, bala mam Sɩɩgã be a zugu.

¹⁹ Bɩ f tall-a n kẽng maan-kʋʋd a Eleyazaare, la nebã fãa taoore, n kɩt t'a reeg f zĩig nebã fãa nifẽ.

²⁰ La bɩ kõ yẽnda noor ning f sẽn tarã, n kɩt tɩ Israyɛll nebã fãa sak-a.

²¹ La yẽnda na n pʋgda maan-kʋʋd a Eleyazaare, t'a wat maam a Sẽn-Ka-Saab taoore n deesd koeesã n togsd-a. La a Zozoe ne Israyɛll nebã fãa tog n saka no-kãense.»

²² La a Moyiis maana wa Sẽn-Ka-Saab sẽn yeel yẽnda wã. Yẽnda talla a Zozoe n kẽng maan-kʋʋd a Eleyazaar ne Israyɛll nebã fãa taoore.

²³ Dẽ, a Moyiis rɩka a nus n tik a Zozoe, n kɩt t'a reeg yẽnda zĩiga, wa noor ning Sẽn-Ka-Saab sẽn dag n kõ yẽnda wã.