Sõadga 22 - WẼNNAAM SEBRE 2014

A Balak ne a Balaam kibare

¹ Israyɛll nebã yikame n lebg n tɩ sig Moaab tẽn-nabdrẽ wã, Zʋrdẽ kʋɩlgã rʋʋnd yaangã sẽn teesd Zeeriko wã.

^2-4 La wakat-kãnga, dag n yaa a Sipoor biig a Balak n yaa Moaab rĩma. Dẽ, yẽnda wʋma bũmb ning Israyɛll nebã sẽn maan Amoor-dãmbã. La rĩmã ne a nebã fãa sẽn yã tɩ Israyɛll nebã yaa wʋsg n watẽ wã, rabeem-kãseng yõk-b lame tɩ b sɩng rigbu. Dẽ, Moaab nebã yeela Madiyã nanambsã yaa: «Zãma-kãensã fãa na n dɩɩ tõnd sẽn so wã zãng fãa, wa naaf sẽn wãbd yamd weoogẽ.»

⁵ Dẽ, Moaab rĩmã tʋma neb tɩ b kẽng a Bewoor biig a Balaam nengẽ. A Balaam dag n bee Petoor sẽn be kʋɩlgã rʋʋnde, a tẽngẽ wã. La Moaab rĩmã yeelame tɩ b tɩ yeel-a yaa: «Neb n yi Ezɩpt n wa, la b yaa wʋsg hal n yɛdg n pid tẽngã, la bãmb wa n tilg n pẽnega mam soolmã.

⁶ Dẽ wã, mam kota foom tɩ f wa kãab nin-bãmbã wẽng n kõ-ma, bala, b tara pãng n yɩɩd mam nebã. La fo sã n sak n wa kãab-b wẽnga, daar ning bɩ m tõog-ba, n dig-b n yiis tẽngã. Bala, mam miime tɩ fo sẽn ning ned ning barka, a soab paamda barka, la fo sẽn kãab ned ning wẽnga, kãabgã tũuda a soaba.»

⁷ Dẽ, Moaab ne Madiyã kãsem-dãmbã zãa kũun n kẽng n na n tɩ kõ bãngd a Balaam. La bãmb sẽn ta a Balaam nengẽ, b togs-a-la a Balak koɛɛgã.

⁸ La a Balaam yeela bãmb yaa: «Gãand-y ka yʋngã, tɩ beoogo, m na togs-y koɛɛg ning Sẽn-Ka-Saab sẽn na n kõ-ma. La Moaab nanambsã pa a Balaam yirã.»

Wẽnnaam goma ne a Balaam

⁹ Dẽ, Wẽnnaam soka a Balaam yaa: «Yaa ãnda rãmb la sẽn be fo zakẽ wã?»

¹⁰ A Balaam leoka Wẽnnaam yaa: «Yaa a Sipoor biig a Balak sẽn yaa Moaab rĩma n tʋm bãmb tɩ b wa yeel-m yaa:

¹¹ Neb n yi Ezɩpt n wa, la b yaa wʋsg n pid tẽnga fãa. Dẽ yĩngã, m kot-f lame tɩ f wa kãab bãmb wẽng n kõ-ma. Fo sã sak n kãab-ba, daar ning bɩ m zab ne-b n tõog n dig-ba.»

¹² La Wẽnnaam yeela a Balaam yaa: «Ra tũ a Balak sẽn tʋm b rãmbã n kẽng ye. La ra kãab neb nins yell bãmb sẽn gomdã wẽng ye. Bala mam ning-b-la barka.»

¹³ Dẽ, vẽkembeoog yibeoogo, a Balaam yikame n yeel nanambs nins a Balak sẽn tʋmã yaa: «Lebg-y n leb-y y tẽngẽ, tɩ bala, Sẽn-Ka-Saab yeela maam tɩ m da tũ yãmb n kẽng ye.»

¹⁴ La Moaab nanambsã yikame n leb a Balak nengẽ n tɩ yeel-a yaa: «A Balaam zãgsame t'a ka na n tũ tõnd n wa ye.»

¹⁵ Dẽ, a Balak leb n baoo nanambs wʋsg sẽn tar naam n yɩɩd pĩnd dãmbã, n tʋm a Balaam nengẽ.

¹⁶ Bãmb ta a Balaam nengẽ n yeel-a yaa: «Ad a Sipoor biig a Balak koɛɛga: Maam a Sipoor biig a Balake, n kot foom a Balaam tɩ f sak n wa mam nengẽ la f ra zãgs ye.

¹⁷ Fo sã n wa, mam na n kõ-f-la waoogr wʋsgo, la bũmb ning fãa fo sẽn na n kos maam, mam na n maan n kõ-f lame. Mam sẽn kot foom bala, yaa tɩ f wa kãab nin-bãmbã wẽng n kõ-ma.»

¹⁸ La a Balaam leoka a Balak sẽn tʋm-b rãmbã yaa: «Ba a Balak sã n kõ maam wanzuri wã ne sãnemã sẽn pid yẽnda na-yirã, mam ka tõe n maan bũmb ba a yembr sẽn kɩɩsd Sẽn-Ka-Saab sẽn yaa mam Wẽnnaamã noor ye.

¹⁹ La baoosgo, bɩ yãmb pa ka n gãand yʋngã, tɩ m leb n sok Sẽn-Ka-Saab n bãng b sẽn na n leb n yeel-m koɛɛg ninga.»

²⁰ La Sẽn-Ka-Saab wa a Balaam nengẽ badaar yʋng n yeel-a yaa: «Sã n yaa tɩ nin-bãmbã waame n dat tɩ fo tũ-b n kẽnge, bɩ f yik n tũ-ba. La bɩ f bãng tɩ yaa bũmb ning mam sẽn na n yeel foomã bala, la f na n maane.»

A Balaam bõang goma ne-a

²¹ La vẽkembeoogã yibeoogo, a Balaam yikame n ning a bõang yolg n tũ Moaab nanambsã n looge.

²² A Balaam sẽn yik n tũ n loogã puuga Sẽn-Ka-Saab sũuri. Dẽ, a Balaam dag n zao a bõang n dɩk sor n kẽnd t'a tʋmtʋmdb a yiibã yãagd-a. La ade, Sẽn-Ka-Saab malɛɛk n sig n yals sorã zug n na gɩdg a Balaam t'a ra kẽng ye.

²³ Bõangã yãnda Sẽn-Ka-Saab malɛɛkã sẽn yas sorã zug n zãad sʋʋga. Dẽ, bõangã basa sorã n pãrgd pʋtã, la a Balaam pãba bõangã n na n kẽes sorã zugu.

²⁴ La Sẽn-Ka-Saab malɛɛkã kẽnga taoor n tɩ yals so-buk a ye sẽn pɩʋʋgd reezẽ tɩɩs pʋt a yiib sʋka, n tũ lals a yiib sʋka.

²⁵ Bõangã sẽn yã Sẽn-Ka-Saab malɛɛkã, a kẽng n tɩ rɩdga lalgã n pogl a Balaam naoorã. La a Balaam leb n pãba bõangã.

²⁶ Dẽ, Sẽn-Ka-Saab malɛɛkã leb n kẽnga taoor n tɩ yals zĩig ning sorã sẽn yaa sẽk n yɩɩdã, tɩ ned ka tõe n tũ a goabgã bɩ a rɩtgã n loog ye.

²⁷ Bõangã sẽn yã Sẽn-Ka-Saab malɛɛkã, a bur n lʋɩɩ tẽng ne a Balaam. La a Balaam sũurã puuga hal wʋsg t'a tar bõangã pãbr ne a rasaarã.

²⁸ Dẽ, Sẽn-Ka-Saab kɩtame tɩ bõangã gome, n yeel a soaal a Balaam yaa: «Mam maan-y-la bõe, tɩ y pãbd-m hal naoor a tãab fãa?»

²⁹ A Balaam leoka bõangã yaa: «Yaa fo sẽn tar maam n yaandẽ wã yĩnga! Mam sã n dag n tarẽ sʋʋga, m dag n na n kʋ-f-la zĩig pʋgẽ.»

³⁰ La bõangã yeela a Balaam yaa: «Mam ka yãmb bõang la? Yãmb zombda maam wakat fãa, la rẽ yĩnga, mam minim n maanda yãmb a woto sɩda?» La a Balaam leokame tɩ ayo.

³¹ Wakat-kãng bala, Sẽn-Ka-Saab puka a Balaam ninã t'a yã malɛɛkã sẽn yas sorã zug n zãad sʋʋg a nugẽ. La zĩig pʋgẽ, a Balaam wõgemdame n fõgen a neng tẽnga.

³² Dẽ, malɛɛkã yeela a Balaam yaa: «Bõe yĩng tɩ fo pãbd f bõangã hal naoor a tãab fãa? Ade, mam waame n na gɩdg foom tɩ f ra kẽng ye. Bala, sor ninga fo sẽn dɩkã rabda sãoong zĩigẽ.

³³ Fo bõangã yãnda maam, n bʋdg naoor a tãab n bas maam. Bõangã sã n dag n ka bʋdgẽ, mam dag n na n kʋʋ foom, la m bas bõangã t'a vɩɩnde.»

³⁴ La a Balaam yeela malɛɛkã yaa: «Mam kongame! Bala, mam dag n ka mi tɩ yãmb n yas sorã zug ye. La moasã, sã n mikame tɩ so-tog-kãngã ka noom yãmba, mam na n lebg n kuilame.»

³⁵ La Sẽn-Ka-Saab malɛɛkã leoka a Balaam yaa: «Kell n tũ nebã n kẽnge, la bɩ f bãng tɩ yaa goam nins mam sẽn na n togs foomã bal la f na n gome.» Dẽ, a Balaam kell n tũu nanambs nins a Balak sẽn tʋmã n looge.

A Balaam sega naab a Balake

³⁶ Moaab naab a Balak sẽn wʋm t'a Balaam watame, yẽnda yiime n kẽng n na n tɩ seg-a Moaab tẽng a yembr sẽn boond tɩ Aar pʋgẽ. Tẽn-kãng rag n bee Arno kʋɩlgã sẽn yaa Moaab tẽngã toadgã noore.

³⁷ Dẽ, a Balak soka a Balaam yaa: «Bõe yĩng tɩ fo ka sak n tũ neb nins mam sẽn tʋm pipi tɩ b wa bool foomã n wa? Fo rag n tagsdame tɩ mam ka tõe n waoog foom tɩ f sũur yɩ noog bɩ?»

³⁸ A Balaam leoka naab a Balak yaa: «Yaa sɩda, mam waame, la mam ka tar koɛɛg n na n tosg yãmb ye. Yaa gomd ning Wẽnnaam sẽn na n ning m noorẽ wã bal la m na n togse.»

³⁹ Dẽ, a Balaam tũ a Balak n looge, la bãmb taa tẽng ning sẽn boond tɩ Kiriyat-husotã.

⁴⁰ La naab Balak kʋʋ niig ne piis n maan maando. La yẽnda yãkame n tʋm tɩ b kõ a Balaam ne nanambs nins sẽn be ne-a wã.

⁴¹ La vẽkembeoog yibeoogo, a Balak talla a Balaam n dʋ Bamot-Baall tãngã zugu, la beenẽ b rag n nee Israyɛll nebã begr bala.