Sõadga 17 - WẼNNAAM SEBRE 2014

Nebã yẽgmame n paam sɩbgre

¹ Sẽn-Ka-Saab yeela a Moyiis yaa:

² «Yeel maan-kʋʋd a Aarõ biig a Eleyazaar t'a yiis wisd yõogr laasã sẽn be bugmẽ wã, n tɩ lob bug-saalã zĩ-zãrgẽ, tɩ bala, laasã lebga Sẽn-Ka-Saab rẽnda.

³ Neb nins sẽn dag n so-b la-bãmbã maana yel-wẽna, n deeg b yel-wẽnã yaood sẽn yaa kũum. La ne rẽ fãa, b sẽn tall la-bãmb n wa maam a Sẽn-Ka-Saab taoorã yĩnga, b lebga maam n so. Rẽ wã, bɩ y rɩk la-bãmb n kud tɩ lebg paklse, tɩ y tall-b n lud tẽn-kugrã, la bõn-kãng na n yɩɩ keoogr bãnde, Israyɛll nebã yĩnga.»

⁴ Dẽ, maan-kʋʋd a Eleyazaar wʋka neb nins bugmã sẽn kʋ wã zũud laasã sẽn yaa wisd yõogr laasã, n kud tɩ b lebg paklse, t'a rɩk-b n lud tẽn-kugrã.

⁵ Woto, kud-pakles-kãens rag n tẽegda Israyɛll nebã tɩ sã n ka a Aarõ yagensã bala, nin-zẽng ka tar noor tɩ yõog wisd Sẽn-Ka-Saab taoor ye. La ned sã n kɩɩs tõ-kãngã, sɩbgr ning sẽn paam a Koore ne a poorẽ dãmbã na n paama a soaba, wa Sẽn-Ka-Saab sẽn dag n yeel a Moyiis t'a yeel a Aarõ wã.

⁶ La bõn-kãng yɩ tɩ zaamẽ, Israyɛll nebã fãa yikame n yẽgem ne a Moyiis ne a Aarõ n yeele: «Yãmb n maan la Sẽn-Ka-Saab nebã sẽn ki wã.»

⁷ Israyɛll nebã tɩ gũbga a Moyiis ne a Aarõ, n na n zab ne-ba. La a Moyiis ne a Aarõ sẽn wẽnemd b nens n tees sɛk roogã sẽnẽ, b yãame tɩ sawad-taok n lud sɛk roogã, la Sẽn-Ka-Saab ziirã pukame.

⁸ Woto, a Moyiis ne a Aarõ kẽnga sɛk roogã noore.

⁹ La Sẽn-Ka-Saab yeela a Moyiis yaa:

¹⁰ «Yi-y nebã sʋk n leb kɛɛnga, tɩ m na n sãam-b-la wakat-kãngã bala.»

¹¹ Dẽ poore, a Moyiis yeela a Aarõ yaa: «Rɩk f wisd yõogr laagã, n yãk bugum tẽn-kugrã zug n ningi, la f yugl wisd a zugu, n tall n kẽng sik zĩigẽ wã tao-tao, n tɩ maan sugr kosg tʋʋmdã nebã zugu, b beegrã yĩnga. Bala, Sẽn-Ka-Saab sũurã yikame, tɩ sãoongã zoe n sɩnge.»

¹² Dẽ, a Aarõ maana wa a Moyiis sẽn yeelã. Yẽnda rɩka wisd yõogr laagã n zoe n kẽng nin-buiidã sʋka, n ta zĩig ninga sãoongã sẽn da zoe n sɩngã, la yẽnda yõoga wisdã n maan sugr kosg tʋʋmdã nebã yel-wẽnã sugr kũun yĩnga.

¹³ La a Aarõ tɩ yalsa sẽn ki-bã ne sẽn vɩ-bã sʋka, la sãoongã yalsame.

¹⁴ Neb nins sẽn ki-b sãoongã pʋgã sõor yaa neb tus-piig la a naas la kobs-yopoe, a Koore poorẽ dãmbã sẽn dag n zoe n ki wã sõor sẽn ka naage.

¹⁵ La sãoongã sẽn yalsã, a Aarõ lebg n leba a Moyiis nengẽ sɛk roogã noore.

¹⁶ Sẽn-Ka-Saab yeela a Moyiis yaa:

¹⁷ «Yeel Israyɛll nebã tɩ b kɩt tɩ buud fãa kãsem tall dasaar n wa kɩs-fo. Yaa rasab piig la a yiib la f tog n deege. La bɩ fo gʋls buud fãa yʋʋr a dasaar zugu.

¹⁸ La Leevi buudã dasaar zugu, yaa Aarõ yʋʋrã la fo tog n gʋlse. Woto, buud fãa kãsem tara a dasaare.

¹⁹ Fo tog n talla rasab-kãens n kẽng sɛk roogẽ wã n tɩ rɩgl-b kaoolã koglgã taoore, zĩig ning mam sẽn vẽnegd m meng ne yãmbã.

²⁰ Ad bũmb ning sẽn na n maane: ned ninga mam sẽn na n yãkã, a soabã dasaar na n tobame. Woto, mam na n kɩtame tɩ Israyɛll nebã sẽn yẽgemd ne yãmb tɩ tat maamã sɛ.»

²¹ La a Moyiis wilga Israyɛll nebã bũmb ninga Sẽn-Ka-Saab sẽn yeelã. Dẽ, buud fãa kãsem talla a dasaar n wa kɩs a Moyiisi. La a Aarõ dasaarã sẽn naage, yaa rasab piig la yiibu.

²² Woto, a Moyiis talla rasabã n tɩ rɩgl Sẽn-Ka-Saab taoore, sɛk roogã pʋgẽ.

²³ La rẽ yɩ tɩ zaamẽ, a Moyiis kẽe sɛk roogẽ wã. La a mikame t'a Aarõ sẽn yaa Leevi buudã nedã dasaar tobame. Rasaarã rag n tobame n ning puudu, n tol n tar biis sẽn mooge.

²⁴ Dẽ, a Moyiis wʋka rasabã fãa sẽn da be sɛk roogã pʋgẽ wã n wilg Israyɛll nebã. Israyɛll nebã fãa yãnda rasabã, la kãsem fãa leb n deega a dasaare.

²⁵ Sẽn-Ka-Saab yeela a Moyiis yaa: «Tall a Aarõ dasaarã n tɩ lebs kaoolã koglgã taoore. Bɩ y bas-a beenẽ, t'a tõe n yɩ tẽegr bãnde, kɩɩsdbã yĩnga. Dẽ, fo na n kɩtame tɩ Israyɛll nebã bas b yẽgengã mam taoore, n da wa ki ye.»

²⁶ La a Moyiis maana bũmbã fãa wa Sẽn-Ka-Saab sẽn yeel-a t'a maan-a.

²⁷ Israyɛll nebã yeela a Moyiis yaa: «Fo ka ne nebã sẽn tar kũum! Tõnd tara sãoong bala, d na n ki n sɛɛ zãnga!

²⁸ Bala, ned ning fãa sẽn kolg-a Sẽn-Ka-Saab sɛk roogã kiidame. Rẽ yĩnga, yaa so-kãngã la tõnd fãa na n tũ n ki zãnga?»