Sõadga 10 - WẼNNAAM SEBRE 2014

Wanzuri tãntãado

¹ Sẽn-Ka-Saab yeela a Moyiis yaa:

² «Kɩt tɩ b maan tãntãad a yiib ne wanzuri yeyn-yeyn. Dẽ, y sã n wa rat tɩ nebã tigme, yaa bãmb la yãmb na n peebe. La y sã n wa rat tɩ nebã yik me, leb n yaa bãmb la y peebda.

³ La tãntãad a yiibã sã n wa naag taab n peebe, bɩ nebã fãa wa tigim taab fo taoor sɛk roogã noore.

⁴ La sã n yaa tãontaõog a yembr la b peeb yã, yaa nanambsã sẽn yaa Israyɛll nebã kãsem-dãmbã bal n tog n tigim taab fo taoore.

⁵ La tãntãadã sã n wa peeb vugr ne pãnga, yaa neb nins sẽn be yaangã n tog n yiki.

⁶ Tãntãadã sã n leb n peeb ne pãng naoor a yiibẽ soabã, yaa nug goabg rãmbã n tog n yiki. B sã n na n yik fãa, b tog n peeba tãntãadã ne pãnga.

⁷ La b sã n na n peeb n tigim nebã, b ka tog n peeb ne pãng ye.

⁸ Yaa maan-kʋʋdbã sẽn yaa a Aarõ yagensã bal n tar noor tɩ peeb tãntãadã. Yõwã na n yɩɩ no-tũudg sẽn ka sɛta, yãmb ne y yagensã yĩnga.

⁹ Yãmb sã n wa be y tẽngẽ wã, n yi n na n tɩ zab ne y bɛɛbã, bɩ y peeb y tãntãadã ne pãnga, la maam a Sẽn-Ka-Saab sẽn yaa yãmb Wẽnnaamã na n tẽega yãmb yell n fãag yãmb y bɛɛbã nugẽ.

¹⁰ Yãmb sũ-noog daare, ne y tigr daare, la y ki-paalg tigr wakate, bɩ y peeb y tãntãadã wakat ning yãmb sẽn maand maoong sẽn yõogd bugmã, ne y zems-n-taar maoongã. Woto, mam ka na n yĩm yãmb yell ye. Mam yaa Sẽn-Ka-Saab sẽn yaa yãmb Wẽnnaam.»

Israyɛll nebã yii Sinayi n looge

¹¹ Israyɛll nebã sẽn yi Ezɩpt soolmã pʋg tɩ yʋʋm yiiblẽ, kiuug a yiib soabã rasem pisi daare, sawad-taokã zẽk n basa kaoolã sɛk roogã.

¹² Dẽ, Israyɛll nebã yii Sinayi we-raoogẽ wã n loog pʋgdg-pʋgdga, wa Sẽn-Ka-Saab sẽn dag n wilgã. La sawad-tãokã wa n tɩ yalsa Paarã weoogẽ wã.

¹³ Woto yɩɩ pipi yikr Israyɛll nebã sẽn yiki, wa sẽn zems Sẽn-Ka-Saab sẽn dag n yeel a Moyiisã.

¹⁴ Dẽ, yaa tãb-bi-sull ning sẽn gũbg a Zʋʋda tãb-kaoorã n yik pipi. La yaa a Aminadaab biig a Nakõ n dag n yaa Zʋʋda buudã tãb-bi-sullã naaba.

¹⁵ La a Suwaar biig a Netaneyɛll n dag n yaa Isakaar tãb-bi-sullã naaba.

¹⁶ T'a Helõ biig a Elyaab dag n yaa Zabulõ tãb-bi-sullã naaba.

¹⁷ La b viiga sɛk roogã, tɩ Gɛrsõ ne Meraari yagensã tʋk-a n looge.

¹⁸ La tãb-bi-sull ning sẽn gũbg Rubɛn doogã neb tãb-kaoorã n pʋgl bãmba, la yaa a Sedewʋʋr biig a Elisʋʋr n dag n yaa tãb-bi-sul-kãng naaba.

¹⁹ La a Suurisadayi biig a Selumiyɛll n dag n yaa Sɩmyõ tãb-bi-sullã naaba.

²⁰ T'a Dehuwɛll biig a Elyasaf dag n yaa Gaad tãb-bi-sullã naaba.

²¹ Rẽ poore, yaa Kehat yagensã sẽn yaa Leevi roogã neb n tʋkd zĩ-sõngã pʋgẽ teedã n pʋgle. B rag n tog n tii sɛk roogã n sɛ, sẽn deng a Kehat yagensã waoongo.

²² Sull ning sẽn pʋgl-a yaa tãb-bi-sull ning sẽn gũbg Efrayiim tãb-kaoorã. La a Efrayiim tãb-bi-sullã naab dag n yaa a Amihuub biig a Elisama.

²³ La Manaase tãb-bi-sullã naab dag n yaa a Pedasʋʋr biig a Gameliyɛlle.

²⁴ Tɩ Benzame tãb-bi-sullã naab yaa a Gidoni biig a Abidãn.

²⁵ La yaoolem sull ning sẽn pʋgl yaa tãb-bi-sull ning sẽn gũbg Dan tãb-kaoorã. Sul-kãng n yɩ yaoolem. La yaa a Amisadayi biig a Ahiyezɛɛr n dag n yaa bãmb naaba.

²⁶ La a Asɛɛr tãb-bi-sullã naab dag n yaa a Okrã biig a Pagiyɛlle.

²⁷ Tɩ Neftali tãb-bi-sullã naab yaa a Enan biig a Ayira.

²⁸ Dẽ, Israyɛll nebã sẽn yik sull-sull n loogã yɩɩ woto.

A Moyiis baooda taet so-toakã yĩnga

²⁹ A Moyiis yeela a rɛɛmb a Rehuyɛll sẽn yit Madiyã wã biig a Obaab yaa: «Tõnd dabda tẽng ning Sẽn-Ka-Saab sẽn dag n kãab n yeel tɩ b na n kõ-d lame wã pʋgẽ. Dẽ wã, wa tũ tõndo, tɩ d na n kɩtame tɩ f naag tõnd n paam maan-neer ning Sẽn-Ka-Saab sẽn dag n kãab Israyɛll nebã.»

³⁰ La a Obaab leoka bãmb yaa: «Mam ka na n tũ yãmb n loog ye. Mam na n leba m meng tẽngẽ, n tɩ zĩnd ne m buudã nebã.»

³¹ A Moyiis yeela yẽnda: «Mam kot-f lame tɩ f ra loog n bas-d ye. Bala, sẽn yaa foom n mi zĩis nins tõnd sẽn tõe n tilg d sik zĩigã weoogã pʋgã, bɩ f wa lʋɩ tõnd taoor n wilg-du.

³² Fo sã n tũ tõndo, d na n kɩtame tɩ f naag tõnd n paam maan-neer ning Sẽn-Ka-Saab sẽn na n kõ tõndã.»

³³ Dẽ, Israyɛll nebã yii Sẽn-Ka-Saab tãngẽ wã, la b kẽna rasem a tãab kẽnde. La Sẽn-Ka-Saab kaoolã koglgã rag n bee bãmb taoore, n na n bao sik zĩig n kõ-ba.

³⁴ La wĩndga, bãmb sã wa yik n loogdẽ, Sẽn-Ka-Saab sawad-taokã lut-b-la ne a maasmã.

³⁵ La Leevi buudã sã n wa tʋk kaoolã koglgã tɩ b n na looge, a Moyiis pʋʋsda Sẽn-Ka-Saab n yeele: «Sẽn-Ka-Saabo, yik-y-yã! Kɩt-y tɩ y bɛɛbã sãeege! La y rig sẽn kis-b yãmbã tɩ b zoe!»

³⁶ La Leevi buudã sã n wa sik kaoolã koglgã, a Moyiis zẽkda a koɛɛg n yeele: «Sẽn-Ka-Saabo! Bɩ y lebg n wa Israyɛll buudã neb sʋka, tɩ bala, b yaa neb kʋʋngo!»