Sõadga 1 - WẼNNAAM SEBRE 2014

B sõda Israyɛll nebã

¹ Israyɛll nebã sẽn yi Ezɩpt soolmã tɩ yʋʋm yiiblẽ, kiuug a yiib soabã pipi daarã, Sẽn-Ka-Saab goma ne a Moyiis sɛk roogã pʋgẽ, Sinayi we-raoogẽ wã n yeele:

² «Bɩ foom ne a Aarõ sõd Israyɛll nebã, n gʋls rao fãa ne a yʋʋre. Sõd-y bãmb roog-roogo, la zak-zaka.

³ Bɩ y sõd Israyɛll raop nins fãa sẽn ta yʋʋm pisi, la sẽn yɩɩd woto, n tõe n yɩ Israyɛll tãb-biisã. Bɩ y sõd bãmb wa sẽn zems ned kam fãa ne a buudã tãb-sika.

⁴ La buud fãa pʋgẽ, b na n yãka taoor soab a ye t'a sõng yãmba.

⁵ Ad raop nins sẽn na n sõng-b yãmbã yʋya: A Rubɛn buudã pʋgẽ, yaa a Sedewʋʋr biig a Elisʋʋre.

⁶ A Simyõ buudã pʋgẽ, yaa a Suurisadayi biig a Selumiyɛlle.

⁷ A Zʋʋda buudã pʋgẽ, yaa a Aminadaab biig a Nakõ.

⁸ A Isakaar buudã pʋgẽ, yaa a Suwaar biig a Netaneyɛlle.

⁹ A Zabulõ buudã pʋgẽ, yaa a Elõ biig a Elyaabe.

¹⁰ Sã n yaa ne a Zosɛf kambã, Efrayiim buudã pʋgẽ, yaa a Amiwuud biig a Elisama, t'a Manaase buudã pʋgẽ, yaa a Pedasʋʋr biig a Gameliyɛlle.

¹¹ A Benzame buudã pʋgẽ, yaa a Gidoni biig a Abidãn.

¹² A Dan buudã pʋgẽ, yaa a Amisadayi biig a Ayiyezɛɛre.

¹³ A Asɛɛr buudã pʋgẽ, yaa a Okrã biig a Pagiyɛlle.

¹⁴ A Gaad buudã pʋgẽ, yaa a Dewuwɛll biig a Elyazafe.

¹⁵ A Neftali buudã pʋgẽ, yaa a Enan biig a Ayira.»

¹⁶ Yaa nin-bãmbã la b yãk Israyɛll buudã pʋgẽ, tɩ bãmb ned kam fãa na n yɩ a buudã taoor soaba. La leb n yaa bãmb n yaa Israyɛll buudã fãa tãb-biisã nanambse.

¹⁷ A Moyiis ne a Aarõ peega raop nins yʋy b sẽn bool tʋʋm-kãng yĩnga.

¹⁸ A Moyiis ne Aarõ tigma Israyɛll nebã fãa kiuug a yiib soabã pipi daare, n kɩt tɩ b sõd bãmb roog-roogo, ne zak-zaka, ned kam fãa ne a yʋʋre, la yaa sẽn tar-b yʋʋm pisi la sẽn yɩɩd dẽnda wã.

¹⁹ A Moyiis kɩtame tɩ b sõd Israyɛll raopã Sinayi we-raoogẽ wã, wa Sẽn-Ka-Saab sẽn dag n yeel yẽnda wã.

^20-43 La a Israyɛll buud fãa pʋgẽ, b sõda raopã, roog-roogo, la zak-zaka. La b gʋlsa raop nins fãa sẽn ta yʋʋm pisi la sẽn yɩɩd dẽndã n tõe n yɩ tãb-biisã yʋyã. B sɩnga a Israyɛll bi-ribl-kãseng a Rubɛn buudã neb sõadga, la bãmb sõorã yaa neb tus-pis-naas la a yoob la kobs-nu. A Simyõ buudã neb sõor yaa tus pisnu la a wɛ la kobs-tã. A Gaad buudã neb sõor yaa neb tus pis-naas la a nu la kobs-yoob la pisnu. A Zʋʋda buudã neb sõor yaa tus pis-yopoe la a naas la kobs-yoobe. A Isakaar buudã neb sõor yaa tus pisnu la a naas la kobs-naase. A Zabulõ buudã neb sõor yaa tus pisnu la a yopoe la kobs-naase. A Zozɛf biig a Efrayiim buudã neb sõor yaa tus pis-naas la kobs-nu. A Zozɛf biig a Manaase buudã yaa neb tus pis-tã la a yiib la kobs-yi. A Benzame buudã neb sõor yaa tus pis-tã la a nu la kobs-naase. A Dan buudã neb sõor yaa tus pis-yoob la a yiib la kobs-yopoe. A Asɛɛr buudã neb sõor yaa tus pis-naas la a yembr la kobs-nu. A Neftali buudã neb sõor yaa tus pis-nu la a tãab la kobs-naase.

⁴⁴ Sõadg ning a Moyiis ne a Aarõ la Israyɛll buud piig la a yiibã kãsem-dãmbã, sẽn maanã yɩɩ woto, rat n togse tɩ buud fãa ne a naaba.

^45-46 Dẽ, Israyɛll nebã b sẽn sõd buud-buudã, sẽn sɩng ne raop nins sẽn ta yʋʋm pisi, la sẽn yɩɩd dẽ, n tõe n yɩ tãb-biisã sõor yaa raop tus kobs-yoob la a tãabo, la kobs-nu la pis-nu.

Leevi buudã neb tʋʋmde

⁴⁷ Sõadgã pʋgẽ, b ka naag Leevi roogã nebã ne Israyɛll buudã neb a taabã n sõd ye.

⁴⁸ Bala, Sẽn-Ka-Saab dag n yeela a Moyiis yaa:

⁴⁹ «Da naag Leevi buudã ne Israyɛll buud a taabã neb n sõd ye.

⁵⁰ Bɩ f rɩk kaoolã sɛk roogã ne a teedã fãa yell gesgo, n kõ Leevi buudã. La yaa bãmb n na n tʋkd sɛk roogã ne a teedã fãa, la b maand sɛk roogã pʋgẽ tʋʋmde. La bɩ b ti b fu-rotã n gũbg sɛk roogã.

⁵¹ Yãmb sã n na n yik n looge, yaa Leevi buudã nebã n tog n viig sɛk roogã. La yãmb sã n ta y sik zĩigẽ, leb n yaa bãmb n tog n ti sɛk roogã. La ned sẽn ka Leevi buudã ned sã n kolg be, bɩ b kʋ-a.

⁵² Israyɛll ned fãa tog n tɩ tilga a tãb-sikẽ, n yegl a tãb-kaoore.

⁵³ La yaa Leevi buudã neb n tog n tilg b fu-rotã n gũbg kaoolã sɛk roogã. Yãmb sã n maan woto, mam sũurã ka na n yik ne Israyɛll nebã ye. Yaa Leevi buudã n so kaoolã sɛk roog yell gesgo.»

⁵⁴ Dẽ, Israyɛll nebã maana wa Sẽn-Ka-Saab sẽn dag n wilg a Moyiisã.