Sɩngrẽ 49 - WẼNNAAM SEBRE 2014

A Zakoob ninga a kambã barka

¹ A Zakoob boola a kambã n yeel-b yaa: «Tigm-y taab tɩ m wilg-y bũmb ning sẽn na n paam yãmb wakat sẽn wate.

² A Zakoob kambã, tigm-y taab n kelg-y-yã! Kelg-y yãmb ba a Israyɛlle!

³ Rubɛn, fo yaa mam bi-kãsenga, n yaa mam pãnga, la mam bi-bɩɩlem wakatẽ bi-rẽenga. Fo tara ziir n yɩɩda, la f tar pãng n yɩɩda.

⁴ Fo fõta wa koom, la fo ka na n leb n paam kãsengã ye. Bala, fo kẽe ne f ba paga, la fo sẽn dʋ mam gãagã n dẽgma wã, fo paooga maam.

⁵ A Sɩmyõ ne a Leevi yaa ma-biisi. Bãmb tara b sʋʋs n maand nen-kegl-tʋʋma.

⁶ Bɩ mam da kẽes m toog bãmb yellẽ ye. Mam kõn tol n paam yam a yembr ne bãmb b tiging pʋgẽ ye. Bala, bãmb sũ-puugrã pʋga, b kʋʋ nebã, la bãmb maana pʋ-toog n pas niig nao-gĩina.

⁷ Bɩ kãab-wẽng paam bãmb sũ-puugrã, bala, yaa nen-keglem tʋʋmde. La m kãabd bãmb sũ-yikrã, bala, a yaa nin-kʋʋre. Mam na n weela bãmb a Zakoob kambã sʋka, la m na n kɩtame tɩ b sãeeg n kẽ Israyɛll buudã sʋka.

⁸ Zʋʋda, fo saam-biisã na n pẽga foom. Fo nug na n wẽooga f bɛɛbã yubli, la fo ba wã kom-dibli na n wõgemda fo taoore.

⁹ A Zʋʋda yaa gɩgem-polle. M biiga, fo yii kʋʋb zĩigẽ n watẽ! A Zʋʋda põta a nao, n gãe wa gɩgemde, n gãe wa gɩgem-yãanga. La yaa ãnda n na n tõog t'a yiki?

¹⁰ Naam dasaar kõn tol n zãag n bas a Zʋʋda ye. La naam kãnd kõn tol n kong yẽnda naoã tẽngr ye, hal t'ɩ sẽn soa bãmbã wa, tɩ nebã buud fãa sak yẽnda.

¹¹ Yẽnda na n loee a bõang reezẽ tɩɩga, la a rɩk a bõan-bil n loe ne reezẽ bu-sõng tɩɩg willi. Yẽnda na n pegsa a fut reezẽ rãam pʋga, la a pekda a fu-yerg reezẽ rãam sẽn moog wa zɩɩm pʋga.

¹² Rãam kɩtame tɩ yẽnda nin mooge, la bĩisim na n pelga a yẽna.

¹³ A Zabulõ na n zĩnda ko-kãsemsã noore. Yẽnda zĩigã na n yɩɩ koom kogend zĩiga, la yẽnda soolmã na n tall n tɩ tãaga Sɩdõ.

¹⁴ A Isakaar yaa bõan-kɛgeng sẽn gãe yãg a yiib sʋka.

¹⁵ Yẽnda mikame tɩ zĩig ning yẽnda sẽn be wã yaa sõama. La tẽngã yaa noogo. Yẽnda kɩlla a bãok tɩ b zɩlg-a zɩɩbo, la a kẽesa a meng yembd tʋʋm-wɛgl pʋga.

¹⁶ A Dan na n yɩɩ a nebã bʋ-kaooda, wa Israyɛll buud a taabã.

¹⁷ A Dan na n yɩɩ wa waaf sẽn be sor zugu, la wa põeer sẽn be sor zugu, n dũmd wed-moaag nao-bendo, t'a wed-rʋʋdã lʋɩt zãmbɛɛla.

¹⁸ Sẽn-Ka-Saabo, mam gũuda yãmb fãagrã!

¹⁹ Sã n yaa ne a Gaade, tãb-bi-sull n na n tigim n zab ne yẽnda, la yẽnda na n tõog-b lame n dig-ba!

²⁰ Sã n yaa ne a Asɛɛre, yẽnda tẽngã bõn-koaadlã na n woma biis wʋsgo. Yẽnda na n yãka rɩ-nood n kõ rĩm-dãmba.

²¹ A Neftali yaa wa walg sẽn tar lohorem n dogd kom-neeba.

²² A Zozɛf wẽnda tɩɩg yẽgen-tobengo, a yaa wa tɩɩg sẽn be ko-bundum noor yẽgen-tobengo, la a wilã tãoome n zʋʋg lalgã.

²³ Tãb-biis baoo yẽnda noore, la b tãoo yẽnda ne pɛɛma. Yẽnda bɛɛbã rag n yaa tãb-tãoodba.

²⁴ La yẽnda kell n gãda a tãpã kãenkãe. A Zakoob pãng-soabã paasa yẽnda nusã pãnga. Rẽ kɩtame tɩ yẽnda lebg pe-kɩɩma, n yaa Israyɛll pĩig kugr sẽn tar pãnga.

²⁵ Bɩ fo ba wã Wẽnnaam sõng foom. Bɩ Sẽn-Tõe-Fãa wã ning foom barka, yaa bark sẽn na n yi yĩngr saasẽ, yaa bark sẽn yɛdg zĩ-zulumsẽ, yaa bark sẽn kõt rogem.

²⁶ Fo ba wã bark yaa kãseng n yɩɩd neb nins sẽn dog maamã rẽnda. La a yɩɩda hal kʋdem-wẽndẽ tãmsã barkã. La a yɩɩd pĩnd kunkubã bõn-neeba. Bɩ bark-kãensã zĩnd a Zozɛf zugu, bɩ barkã zĩnd soab ning sẽn welg toor a ba-biisã sʋkã zugu.

²⁷ A Benzame yaa rigd-n-yĩidga. Yibeoogo, yẽnda wãbda a rũnga. La zaabre, yẽnda pʋɩta a sẽn paamã.»

²⁸ Yaa nin-bãmbã n yaa Israyɛll buud piig la a yiibã. Yɩɩ woto la bãmb ba wã gom ne bãmba, n ning-b zut barka. Yẽnda ninga ned kam fãa zug bark sẽn yaa toor zalle.

A Zakoob kũum ne a mumbu

²⁹ Dẽ, a Zakoob yeela a kambã yaa: «Mam na n kiime n bʋʋg m saam-dãmbã sẽn deng maam n ki wã. Bɩ y mum maam n naag m yaab-rãmbã yaad sẽn be tãn-bok ning sẽn be Hɛt ned a Efrõ pʋʋgẽ wã.

³⁰ Yaa tãn-bok ning sẽn be Makpela pʋʋgã sẽn pẽ Mamre Kana tẽngã. Yaa pʋʋg ning a Abrahaam sẽn deeg Hɛt ned a Efrõ nengẽ n da n maan yaad zĩigã.

³¹ Yaa beenẽ la b mum a Abrahaam ne a pag a Saara, la yaa beenẽ me, la b mum a Izak ne a pag a Rebeka. Dẽ wã, yaa beenẽ la mam me mum a Leya.

³² Bala, b reega pʋʋgã ne tãn-bokã sẽn be beenẽ wã n da Hɛt nebã nengẽ.»

³³ A Zakoob sẽn gom ne a kambã woto n sɛ, a rʋʋsa a naoã a gãagã zugu, la a kiime tɩ b mum-a n naag a saam-dãmbã.