Sɩngrẽ 45 - WẼNNAAM SEBRE 2014

A Zozɛf vẽnega a menga

¹ La a Zozɛf rag n ka leb n tõe n gãd a meng neb nins fãa sẽn dag n be beenẽ wã taoor ye. Dẽ, a zẽka a koɛɛg n yeele: «Kɩt-y tɩ nebã yi la b bas maam!» La a Zozɛf sẽn wa n na n vẽneg a meng ne a ba-biisã, rẽ tɩ ned baa a yembr dag n ka leb n be ne bãmb ye.

² A Zozɛf zẽka a koɛɛg n yãb hal tɩ Ezɩpt nebã wʋme. Hal baa Faarõ yirã rãmb fãa wʋma yãbrã.

³ A Zozɛf yeela a ba-biisã yaa: «Yaa maam la a Zozɛfe! M baaba ket n vɩɩme bɩ?» Yẽnda ba-biisã rag n ka tõe n leok yẽnda ye. Bala, bãmb sẽn mik tɩ yaa a Zozɛf taoor la bãmb sẽn be wã, b yɛɛsame.

⁴ A Zozɛf yeela a ba-biisã yaa: «M kotame tɩ y wa kolg maam!» La bãmb sẽn kolge, yẽnda yeelame: «Mam yaa yãmb yao a Zozɛf yãmb sẽn dag n koos tɩ b tall n wa Ezɩpt tẽngã.

⁵ Moasã, da sãam-y y sũy ye, la y ra maan-y y bãngẽ ne yãmb sẽn koos maam tɩ b tall maam n wa ka wã ye. Bala, yaa Wẽnnaam sẽn ka rat tɩ yãmb ki wã yĩng la b sẽn kɩt tɩ mam deng yãmb taoorã.

⁶ Ade, yaa yʋʋm a yiib moasã la kom-kãsengã sẽn kẽ soolmã, la keta yʋʋm a nu tɩ koobo, wall tigsg ka na n zĩnd ye.

⁷ Yaa rẽ tɩ Wẽnnaam tʋm maam tɩ m deng yãmb taoor n tɩ segl tɩ yãmb tõe n paam bu-kell soolmẽ wã, la m fãag yãmb ne fãagr kãsenga, tɩ y tõog n põse.

⁸ Rẽ wã, ad ka yãmb n kɩt tɩ mam wa kaanẽ ye, yaa Wẽnnaam n tʋm maam! La yaa Wẽnnaam n kɩte, tɩ mam lebg wa Faarõ ba, la m soog a yirã fãa, la m yɩ naab n soog Ezɩpt soolmã zãnga.

⁹ Lebg-y tao-tao n kẽng m ba wã nengẽ n tɩ yeel-b yaa: ‹Yãmb biig a Zozɛf yeelame: Wẽnnaam kɩtame tɩ mam lebg Ezɩpt soolmã naaba. Rẽ wã, bɩ y wa mam nengẽ n da kaoos ye.

¹⁰ Yãmb na n wa zĩnda Gosɛn tẽngã pʋg n pẽneg maam. Yaa yãmba, y kambã, y yagensã, la y rũm-bãoonegã ne y rũm-bɛdã, la ne bũmb nins fãa yãmb sẽn so wã zãnga.

¹¹ Beenẽ, yaa maam n na n ges yãmb bõn-datsã yelle. Bala, kom-kãsengã na n kell n zĩnda yʋʋm a nu n paase. Dẽ, yãmb sã n be ka, b kõn deeg yãmb bũmbu, wall y yirã rãmb bũmb ye. La bũmb kõn maan yãmb sẽn so wã baa a yembr ye.›

¹² Yãmb mensã nee vẽenega, la mam yao a Benzame me neeme, tɩ yaa maam a Zozɛf la sẽn gomd ne yãmbã.

¹³ Bilg-y m baaba mam sẽn tar ziir ning Ezɩpt soolmẽ wã, la y togs yãmb sẽn yãnd bũmb ningã. Kẽng-y tao-tao n tɩ tall m baaba n wa ka.»

¹⁴ A Zozɛf mobga a yao a Benzame n yãbe, la a Benzame me mobga yẽnda n yãbe.

¹⁵ Dẽ poore, a Zozɛf mogsa a kẽem-dãmbã fãa, la a yãbda. Rẽ zugẽ, yẽnda ne a ba-biisã sõsa ne taaba.

A Zakoob waa Ezɩpt tẽnga

¹⁶ Koɛɛgã saag n taa Faarõ yirã t'a Zozɛf kẽem-dãmbã waa Ezɩpt tẽnga. La a Faarõ ne a poorẽ dãmbã fãa sũur yɩɩ noogo.

¹⁷ La Faarõ goma ne a Zozɛf n yeele: «Ad fo sẽn na n yeel f kẽem-dãmbã tɩ b maan bũmb ninga: Yeel-b tɩ b tɩ zɩlg b bõensã, n yik n kẽng Kana tẽnga,

¹⁸ n tɩ tall y baaba wã ne y yirã rãmb n wa mam nengẽ. Mam na n baoo Ezɩpt tẽngã zĩig sẽn welg toor n kõ yãmba, la yãmb na n dɩɩ tẽngã bõn-sõama wã.

¹⁹ Zozɛfe, mam kõta foom noor tɩ f yeel-b yaa: ‹Ad yãmb sẽn na n maan bũmb ninga: rɩk-y Ezɩpt tẽngã terok-rãmb n tɩ wʋk kambã ne pagbã, la y kɩt tɩ y ba wã me n zomb beenẽ tɩ y tall-a n wa.

²⁰ Ra zoe-y bũmb ning yãmb sẽn na n bas beenẽ wã bõn ye. Bala, bõn-sõama nins fãa sẽn be Ezɩpt soolmẽ wã na n yɩɩ yãmb dẽnda.› »

²¹ A Israyɛll kambã maana wa b sẽn yeel-bã. A Zozɛf kõo bãmb terok-rãmb wa Faarõ sẽn yeelã, la a kõ-b rɩɩb b so-toakã yĩnga.

²² A Zozɛf kõo bãmb fãa fut b sẽn na n tekdẽ, la a kõ a Benzame wanzuri ligd kobs-tã, ne fut a nu, t'a tõe n tekdẽ.

²³ Ad bũmb ning a Zozɛf sẽn tʋm tɩ b tɩ kõ a ba wã: Yaa bõens piig sẽn zɩt Ezɩpt tẽngã bõn-sõama buud fãa, la bõn-yãans piig sẽn zɩlg koodo, rɩɩbo, n paas rɩɩb ning a ba wã sẽn na n dɩk sorã n wa wã yĩnga.

²⁴ Dẽ, a Zozɛf basa a kẽem-dãmbã tɩ b looge. La a yeel-b lame tɩ b ra tek n zab taab sorã zug ye.

²⁵ Bãmb yii Ezɩpt n kẽng Kana tẽng n tɩ ta bãmb ba a Zakoob nengẽ.

²⁶ Bãmb yeela b ba a Zakoob yaa: «Ad a Zozɛf ket n vɩɩme, la yaa yẽnda n so Ezɩpt soolmã gilli.» La bõn-kãng rag n ka sɩɩsd a Zakoob sũurã ye. Bala, yẽnda rag n ka tẽed b goamã ye.

²⁷ Bãmb togsa a Zakoob a Zozɛf sẽn yeelã fãa. La a Zakoob sẽn yãnd terok-rãmbã a Zozɛf sẽn kɩs tɩ b wa rɩk-a wã, a pɛlengã lebame.

²⁸ La a Israyɛll yeelame: «A sekame! Mam biig a Zozɛf ket n vɩɩme! Mam na n kẽng n tɩ yãnd-a lame la m yaool n ki.»