Sɩngrẽ 4 - WẼNNAAM SEBRE 2014

A Kayẽ ne a Abɛll kibare

¹ A Ãdem bãnga a pag a Hawa, la a rɩka pʋg n dog biig n pʋd a yʋʋr t'a Kayẽ. Pagã yeelame: «Sẽn-Ka-Saab sõnga maam tɩ m dog raoa.»

² Rẽ zugẽ, yẽnda roga a Kayẽ yao a Abɛlle. La a Abɛll lebga rũm-kɩɩmda rũm-bãoonego, t'a Kayẽ yaa ka-koaada.

³ La sẽn be n beẽ, a Kayẽ yãka bõn-koaadlã biisi, tɩ yaa kũuni, t'a na n kõ Sẽn-Ka-Saabo.

⁴ A Abɛll me yãka yẽnda rũm-bãoonegã kom-dẽems kẽer sẽn tar kaamã n tall n wa kõ Sẽn-Ka-Saabo. La Sẽn-Ka-Saab sũur yɩɩ noog ne a Abɛlle, la ne a kũunã.

⁵ La Sẽn-Ka-Saab ka reeg a Kayẽ ne a kũunã ye. Dẽ kɩtame, t'a Kayẽ sũurã puug hal wʋsgo, hal t'a nengã gãneme.

⁶ Sẽn-Ka-Saab soka a Kayẽ yaa: «Yaa bõe tɩ fo puugd f sũur woto tɩ f neng gãneme?

⁷ Fo sã n maan sẽn yaa sõama, f na n tõog n zẽka f zugu, la f sã n ka maan sẽn yaa sõama, yel-wẽnã wũga fo rignoorẽ, la a rat n sooga foom, bee ne foom tɩ f tõog-a.»

⁸ Woto, a Kayẽ goma ne a yao a Abɛll gomde. La bãmb sẽn wa n be we-kɛɛnga, a Kayẽ yika zabr ne a Abɛlle, n kʋ-a.

⁹ Rẽ zugẽ, Sẽn-Ka-Saab soka a Kayẽ yaa: «Fo yao a Abɛll bee yɛɛnẽ?» La yẽnda leokame: «Mam ka mi ye! Rẽ yĩnga, mam yaa m yao wã gũud la?»

¹⁰ Dẽ, Wẽnnaam leb n yeel-a lame: «Yaa bõe la fo sẽn maanã? Fo yao wã zɩɩm bee tẽn-gãongã zug n kelemdẽ tɩ tat maam.

¹¹ Moasã, kãab-wẽng bee fo zugu, fo na n zãaga ne tẽng ning sẽn yaag a noor n deeg fo yao wã zɩɩmã fo sẽn daag ne f meng nusã.

¹² Fo sã n ko tẽn-gãongã, a ka na n leb n kõ foom a bi-sõama wã ye. Fo na n yeeba dũniyã, n ka yas zĩ-yɛng ye.»

¹³ A Kayẽ yeela Sẽn-Ka-Saab yaa: «Mam kongrã sɩbgr yaa kãseng wʋsg n yɩɩd mam sẽn tõe n zɩ.

¹⁴ Yãmb digda maam dũndã n yiisd tẽng ning sẽn sakd koobã pʋga, tɩ mam ka na n tõog n leb n yãnd yãmb yɛs ye, la m na n yɩɩ yɛɛbda, n ka yas zĩ-yɛng dũniyã zug ye. La ned ning sẽn yãnd maam, a na n kʋʋ maam.»

¹⁵ Sẽn-Ka-Saab yeela yẽnda yaa: «Ned sã n kʋ a Kayẽ, mam na n doka m sũur ne a soab naoor a yopoe.» La Sẽn-Ka-Saab ninga a Kayẽ bãnde, tɩ ned sã n yãnd-a bɩ a ra kʋ-a ye.

¹⁶ La a Kayẽ yii Sẽn-Ka-Saab taoor n loog n kẽng n tɩ zĩnd Nood tẽngã sẽn be Edɛn zẽedã zĩig yaangã.

A Kayẽ kamb ne a yagense

¹⁷ A Kayẽ kẽe ne a pagã, la a rɩka pʋga, n dog a Enoke. Rẽ zugẽ, a Kayẽ tii tẽng n kẽ, n pʋd tẽngã yʋʋr tɩ Enok wa yẽnda bi-riblã yʋʋrã.

¹⁸ A Enok n dog a Iraade, t'a Iraad dog a Mehuyayɛlle, t'a Mehuyayɛll dog a Metusayɛlle, t'a Metusayɛll dog a Lemeke.

¹⁹ A Lemek peega pagb a yiibu, t'a yembr boondẽ t'a Ada, t'a to wã yʋʋr yaa a Sɩla.

²⁰ A Ada roga a Yaballe. Neb nins fãa sẽn be fu-rot pʋsẽ n gʋʋnd dũmsã yaa a Yaball yagense.

²¹ A Yaball yao wã yʋʋr boondame t'a Yuballe. Neb nins sẽn wẽed pends la b peebd wɩɩsã yaa yẽnda yagense.

²² La a Sɩla roga a Tuball-Kayẽ. Yẽnda yaa sãy n kut zũud ne kut teed buudã fãa. A Tuball-Kayẽ yao bi-puglã yʋʋr la a Naama.

²³ A Lemek yeela a pagbã: «A Ada ne a Sɩla, kelg-y mam koɛɛgã: A Lemek pagba, yok-y y tʋb n kelg mam goamã! Mam kʋʋ raoa, m poglgã yĩnga, la m kʋ biiga, m sãmpogrã yĩnga.

²⁴ B sã n dok b sũur naoor a yopoe a Kayẽ yĩnga, b na n doka b sũur naoor pis-yopoe la a yopoe maam a Lemek yĩnga.»

²⁵ A Ãdem leb n kẽe ne a pagã, la a roga bi-ribl n pʋd a yʋʋr t'a Sɛte. Bala, a yeelame: «Wẽnnaam kõo biig a to n ledg a Abɛll a Kayẽ sẽn kʋ wã zĩigẽ.»

²⁶ A Sɛt me paama bi-ribla, n pʋd a yʋʋr t'a Enoose. Dẽ, sẽn sɩng ne wakat-kãnga, nebã sɩngame n pʋʋsd ne Sẽn-Ka-Saab yʋʋre.