Sɩngrẽ 39 - WẼNNAAM SEBRE 2014

A Zozɛf be a Potifaar yiri

¹ B talla a Zozɛf n kẽng Ezɩpt tẽnga. La Ezɩpt tẽng rao a Potifaar sẽn yaa Faarõ sõgen-kãsengã, n leb n yaa gũudbã naabã raa a Zozɛf Ismayɛll buudã neb nengẽ. Yaa Ismayɛll buudã neb n tall a Zozɛf n kẽng Ezɩpt tẽnga.

² La Sẽn-Ka-Saab rag n bee ne a Zozɛfe. A Zozɛf rag n paamda tõogr ne bũmbã fãa. Yẽnda rag n bee Ezɩpt nedã sẽn yaa yẽnda soaalã zakẽ.

³ A Zozɛf soaalã yãame tɩ Sẽn-Ka-Saab bee ne a Zozɛfe. La a Zozɛf sã n dat n maan bũmbu, Sẽn-Ka-Saab kɩtdame t'a tõogdẽ.

⁴ Yẽnda soaalã rag n nong-a lame, la a kɩtame t'a Zozɛf tʋmd yẽnda tʋʋma, la a kɩt t'a lebg yẽnda zakã yel-gɛta, la a rɩk a bũmbã fãa n ning a Zozɛf nugẽ.

⁵ Sẽn sɩng ne wakat ninga a Potifaar sẽn kɩt t'a Zozɛf lebg yẽnda zakã yel-gɛt n get yẽnda bũmbã fãa yellã tɛka, Sẽn-Ka-Saab ninga Ezɩpt nedã zak bark a Zozɛf zug maasem yĩnga. La Sẽn-Ka-Saab barkã rag bee a Potifaar sẽn so bũmb nins fãa wã zugu, ne a zakã pʋga, la bũmb nins sẽn be weoogẽ wã me zugu.

⁶ A Potifaar dɩka yẽnda sẽn so wã fãa n bas a Zozɛf nugẽ. Yẽnda ka leb n maand baa fɩ, sã n ka rɩɩbã yẽnda sẽn dɩtã bala. A Zozɛf rag n yaa ra-sãn-beelle, n yaa neere.

A Zozɛf ne a Potifaar pagã kibare

⁷ Sẽn beẽ n beẽ, a Zozɛf soaalã pag nif rag n bee a Zozɛf zugu, la a yeela a Zozɛf yaa: «Wa gãand ne maam!»

⁸ La a Zozɛf zãgsame n yeel a soaalã pag yaa: «Gese, mam sẽn be mam soaalã nengẽ tɛka, bãmb ka leb n get bũmb baa yembr yell b zakã pʋg ye. Bãmb dɩka bũmb nins fãa b sẽn so wã n ning mam nugẽ.

⁹ Ned ka be zakẽ ka, n yaa nin-kãseng n yɩɩd maam ye. La m soaalã ka gɩdg maam ne bũmb baa a yembre, sã n ka foom bala. Bala fo yaa bãmb paga. Rẽ wã, mam na n yɩɩ a wãn n maan yel-be-kẽen-kãngã n beeg Wẽnnaam?»

¹⁰ Pagã rag n gomda ne a Zozɛf daar fãa n pẽdgd-a la a kelgd-a ye. A ka sak n gãand ne-a wall a lagem ne-a ye.

¹¹ La daar a yembre, a Zozɛf kẽe roogẽ n na n maan a tʋʋmde. La mikame, tɩ zakã ned baa a yembr dag n ka be zakã pʋg ye.

¹² Dẽ, pagã gãda a Zozɛf fuugã n yeel-a: «Wa gãand ne maam!» La a Zozɛf wudgame n yi n bas fuugã pagã nugẽ.

¹³ La pagã sẽn yãnd t'a Zozɛf basa fuugã yẽnda nugẽ n wudg n yi yɩngã,

¹⁴ a boola a tʋmtʋmdbã n yeel-b yaa: «Ges-y-yã, b talla Ebre nedã n wa ka t'a na n yaal tõndo! Yẽnda waa mam nengẽ n dat n gãand maam, la mam wɩka m meng n kelme.

¹⁵ La a sẽn mik tɩ mam zẽka m koɛɛg n kelemdẽ wã, a basa a fuugã ne maam la a wudg n yi yɩnga.»

¹⁶ La pagã bĩnga fuugã a nengẽ, hal t'a Zozɛf soaalã lebg n wa yiri.

¹⁷ Pagã goma ne a Potifaar wa a sẽn dag n gom pĩndã, n yeel yẽnda yaa: «Ebre yem-daoog ning yãmb sẽn tall n wa ka wã waa mam nengẽ n na n yaal maam!

¹⁸ La mam sẽn zẽk m koɛɛg n kelma yĩnga, a wudgame n yi n bas a fuugã ne maam.»

¹⁹ A Zozɛf soaalã sẽn wʋm pagã sẽn togs yẽnda yem-daoogã sẽn dag n dat n maan bũmb ningã,

²⁰ a sũur yika wʋsgo, la a kɩtame tɩ b yõk a Zozɛf n kẽes bi-bees roogo. B kẽesa a Zozɛf roog ninga rĩma sẽn kẽesd a bi-beesã. A Zozɛf kell n paa bi-bees roogẽ beenẽ.

²¹ La Sẽn-Ka-Saab rag n bee ne a Zozɛfe, la b wilga a Zozɛf b nonglem. Bãmb kɩtame tɩ bi-bees roog gũudbã naab nong a Zozɛfe.

²² Dẽ, bi-bees roog gũudbã naab rɩka bi-beesã fãa n ning a Zozɛf nugẽ. La b sã n dat n maan bũmbu, a Zozɛf n kõt noor tɩ b yaool n maane.

²³ Bi-bees roog gũudbã naab rag n ka leb n get a Zozɛf sẽn maand bũmb ningã baa yembr yell yɛs ye. Bala, Sẽn-Ka-Saab rag n bee ne a Zozɛfe. Sẽn-Ka-Saab kɩtame t'a Zozɛf paamd tõogr ne bũmb nins fãa a sẽn maandã.