Sɩngrẽ 34 - WẼNNAAM SEBRE 2014

B sãama a Zakoob bi-pugl a Dina

¹ Daar a yembre, a Leya sẽn dog a Zakoob bi-pugl ning t'a yʋʋr boondẽ t'a Dina wã yiime n na n tɩ ges tẽngã kom-pugli.

² Hevi ned a Hamoor sẽn yaa tẽngã naabã biig a Sɩkɛm yãnda a Dina, la a yõk-a lame n tɩ gãand-a, n sãam-a.

³ A Sɩkɛm yamã rag n loee ne a Zakoob biig a Dina. Yẽnda rag n nonga pʋg-sadã hal wʋsgo, rẽ, yẽnda goma gom-nood n na n noog a Dina sũuri.

⁴ A Sɩkɛm tɩ yeela a ba a Hamoor yaa: «Kos-y pʋg-sad-kãngã n kõ maam tɩ m maan m paga.»

⁵ La a Zakoob rag n wʋmame t'a Sɩkɛm sãama yẽnda bi-pugl a Dina, la sẽn seg tɩ yẽnda kom-dibli wã rag n bee weoogẽ wã ne yẽnda rũmsã yĩnga, yẽnda kell n sĩnda a noor n gũ a kambã waoongo.

⁶ A Sɩkɛm ba a Hamoor yiime n na n tɩ gom ne a Zakoobe.

⁷ A Zakoob kom-dibli wã sẽn yi weoogẽ wã n wa, b wʋma yellã. Dẽ, bãmb sũyã sãama hal wʋsgo, la b sũyã yikame, a Sɩkɛm sẽn maan tʋʋm-beed ning a Israyɛll buudã pʋgẽ wã yĩnga. Yaa yẽnda sẽn gãand a Zakoob bi-pugl a Dina wã, yaool n dag n yaa bũmb sẽn yaa kisgu.

⁸ A Hamoor goma ne bãmb n yeel yaa: «Mam biig a Sɩkɛm yamã loee ne yãmb bi-puglã hal wʋsgo. Mam kot-y lame tɩ y rɩk-a n kõ m biigã t'a maan a paga.

⁹ Woto, tõnd tõe n maana zood ne taaba, yi-kãadmã yĩnga, tɩ yãmb dɩkd y kom-pugli n kõt tõndo, la y peegd tõnd kom-pugli n maand y pagba.

¹⁰ Dẽ, yãmb tõe n zĩnda ne tõndo, tɩ soolmã lebg yãmb me rẽnda. Zĩnd-y ne tõnd n leeb n paam yõod soolmã pʋga.»

¹¹ A Sɩkɛm yeela a Dina baaba wã ne a Dina kẽem-dãmbã yaa: «Yãmb sã n sake, yãmb sẽn na n yeel maam tɩ m maan bũmb ningã fãa mam na n maan-a lame.

¹² Yeel-y maam tɩ m wa ne pʋg-belong yaood wʋsgo, la m wa ne kũuni, la mam na n kõo yãmb bũmb ning fãa yãmb sẽn na n yeel maamã. Yãmb we n sak n kõ maam pʋg-sadã tɩ m maan m pag bala.»

¹³ A Zakoob kambã maaga b meng n leoka a Sɩkɛm ne a ba a Hamoor ne sɩlem, a Sɩkɛm sẽn sãam bãmb tão a Dina wã yĩnga.

¹⁴ A Zakoob kambã yeela bãmb yaa: «Tõnd ka tõe n dɩk d tão wã n kõ ned sẽn ka kẽ bãong t'a maan a pag ye, yõwã yaa yãnd ne tõndo.

¹⁵ Tõnd ka tõe n sak yãmb sẽn datã, sã n ka tɩ raop nins fãa sẽn be yãmb sʋkã n kẽ bãong n lebg wa tõndo.

¹⁶ Sã n yɩ woto, tõnd na yaool n sak n dɩka d kom-pugli n kõ yãmba, la d peeg yãmb kom-pugli n maan d pagba. La tõnd na n zĩnda yãmb sʋka, n lebg buud a yembr ne yãmba.

¹⁷ La yãmb sã n ka sak n maan wa tõnd sẽn yeelã n kẽ bãongo, tõnd na n wa peega d bi-puglã n looge.»

¹⁸ La bãmb sẽn gom to-to wã yɩ a Hamoor ne a biig a Sɩkɛm noogo.

¹⁹ Bi-bɩɩg a Sɩkɛm ka yals n kaoos n maan bõn-kãng ye, bala, yẽnda rag n nonga a Zakoob bi-puglã ne a sũur fãa. B rag n nanda a Sɩkɛm n yɩɩd a ba wã zakã rãmb fãa.

²⁰ A Hamoor ne a biig a Sɩkɛm kẽnga b tẽngã noor n tɩ sõs ne nebã n yeele:

²¹ «Nin-bãmbã yaa nin-sõama ne tõndo. Wa-y tɩ bas-b tɩ b zĩnd tõnd tẽngã pʋg n leebdẽ, bala, tõnd tẽngã yalem tõe n seka bãmb me zĩndgu. Dẽ, tõnd tõe n peega bãmb kom-pugli wã n maan d pagba, la d rɩk d kom-pugli wã me n kõ bãmb tɩ b maan b pagba.

²² La sẽn na n yɩlẽ tɩ nin-bãmbã sak n zĩnd ne tõnd n lebg buud a yembr ne tõndo, rẽndame tɩ tõnd tẽngã raopa fãa sak n kẽ bãong wa bãmb sẽn kẽedã.

²³ Bãmb rũmsã ne b paoongã, la b rũm-bãoonegã fãa kõn lebg tõnd dẽnd sɩda? Tõnd we n sak b sẽn datã bal tɩ b zĩnd ne tõndo.»

²⁴ Neb nins fãa sẽn dag n yi n kẽng tẽngã noorã saka a Hamoor ne a biig a Sɩkɛm sẽn yeelã. Dẽ, b kẽesa tẽngã raop nins fãa sẽn dag n be-b tẽngã noorã bãongo.

²⁵ La ra-tãtẽ daar sẽn ta, tɩ bãongã ket n zabdẽ, a Zakoob kamb a yiibã, a Sɩmyõ ne a Leevi sẽn yaa a Dina tãopã yikame n bob b zabr sʋʋs n soos n kẽ tẽngã tɩ ned ka bãng ye, la b kʋʋ tẽngã raopã fãa.

²⁶ La bãmb kʋʋ a Hamoor ne a biig a Sɩkɛm ne sʋʋga, la b peeg a Dina sẽn dag n be a Sɩkɛm doogẽ wã n yi n looge.

²⁷ A Zakoob kambã kẽngame n tɩ kʋ tẽngã nebã, la b zɛ b sẽn so wã, tɩ bala, b sãama bãmb tão-poaka.

²⁸ Bãmb yõga rũm-bãoonegã, ne rũm-bɛdã ne bõensã, la b wʋk bũmb nins fãa sẽn dag n be tẽngã pʋgẽ wã, ne wetẽ wã.

²⁹ Bãmb wʋka tẽngã laogã, la b yõg b kambã ne b pagbã, la b wʋk bũmb nins fãa sẽn be rotã pʋsã.

³⁰ Dẽ, a Zakoob yeela a Sɩmyõ ne a Leevi yaa: «Yãmb baoo yell n kõ maam, n kɩt tɩ tẽngã nebã, ne Kana nebã, la Ferɛɛz-rãmbã na n kisg maam. Mam nebã ka wʋsg ye, b sõorã yaa bilfu. Tẽngã nebã na n tigma taab n wa zab ne maam n sãam maam ne m zakã rãmba.»

³¹ Bãmb leoka a Zakoob yaa: «Rẽ yĩnga, a zemsame tɩ bãmb maan tõnd tão wã wa pʋg-yoodr sɩda?»