Sɩngrẽ 26 - WẼNNAAM SEBRE 2014

A Izak yi n kẽnga Filistẽ nebã tẽngẽ

¹ Kom n kẽ tẽngã, la a yɩɩ kom-kãseng n yɩɩd kom ning sẽn dag n zĩnd a Abrahaam wakatẽ wã. La a Izak yii n kẽnga Filistẽ-dãmbã rĩm a Abimelɛk nengẽ Geraar tẽnga.

² La Sẽn-Ka-Saab puka a meng ne a Izak n yeel-a yaa: «Ra kẽng Ezɩpt ye, pa tẽng ning mam sẽn na n wilg foomã pʋga.

³ Zĩnd sãand tẽn-kãng pʋga, bala, mam bee ne foom, la m na n ning-f-la barka. Bala, mam na n dɩka tẽn-bãmb fãa n kõ foom ne f yagensã tɩ y sooge. Mam na n maana woto, n pids wẽeneg ning mam sẽn dag n wẽen ne fo ba a Abrahaamã.

⁴ Mam na n kɩtame tɩ fo yagensã fɩɩge n lebg wʋsg wa yĩngr ãdse. Mam na n kõo fo yagensã tẽn-bãmbã fãa. La dũniyã nebã fãa na n paama bark fo yagensã zug maasem yĩnga.

⁵ Bala, a Abrahaam saka mam koɛɛgã, a tũu mam tʋlsmã ne mam koeesã, la a saka m noyã ne m tõodã.»

⁶ Woto kɩtame t'a Izak kell n pa Geraar tẽnga.

⁷ La soolem-kãng nebã sã n dag n sok a Izak a pagã sẽn yaa ned ninga, yẽnda yetame tɩ yaa yẽnda tão-poaka. Bala, yẽnda rag n zoeta rabeem t'a sã n yeel tɩ yaa yẽnda paga, tẽngã nebã na n kʋʋ yẽnda. Bala, a Rebeka rag n yaa pʋg-neere.

⁸ La a Izak sẽn zĩnd soolmẽ be n kaoose, daar a yembre, Filistẽ-dãmbã rĩm a Abimelɛk rag n lɩkda roog võorẽ n getẽ, la a yãame t'a Izak reemd ne a pag a Rebeka.

⁹ Rĩm a Abimelɛk kɩtame tɩ b bool a Izak t'a yeel-a: «Kelg wɛ! Rẽnd pagã yaa fo pag wɛ? La maana a wãn tɩ fo yeel tɩ yaa fo tão-poaka?» La a Izak leoka rĩma yaa: «Mam sẽn yeel woto wã yaa tɩ mam zoee rabeem tɩ b na n wa kʋ maam yẽnda poorẽ.»

¹⁰ A Abimelɛk yeela a Izak yaa: «Yaa bõe tɩ fo maan tõnd woto? Kellẽ-la bilfu, tɩ tẽngã ned gãandẽ fo pagã, la fo rag n na n kɩtame tɩ tõnd yɩ koangdba.»

¹¹ Woto, a Abimelɛk kɩtame tɩ b togs tẽngã nebã fãa tɩ ned ning sẽn na n sɩɩs-a nin-kãngã ne a pagã, bɩ b kʋ a soaba.

¹² A Izak koo tẽngẽ be, la yʋʋm-kãnga, a paama koodã tɩ ta yẽnda sẽn mi n paamdẽ wã noor koabga, bala, Sẽn-Ka-Saab ning-a-la barka.

¹³ La a Izak lebga arzɛk soaba, la a paoongã rag n tara paasg wakat fãa, la a lebga rakãag-kẽenga.

¹⁴ A Izak rag n tara rũm-bãoonego, la rũm-bɛd wʋsgo, la a tar tʋmtʋmdb wʋsgo. Woto kɩtame tɩ Filistẽ-dãmbã maan sũ-kiir ne a Izak paoongã.

¹⁵ Filistẽ-dãmbã wʋka tom n yẽd buls nins fãa a Izak ba a Abrahaam tʋmtʋmdbã sẽn dag n tu a Abrahaam wakatẽ wã.

¹⁶ Dẽ, a Abimelɛk yeela a Izak yaa: «Yi la f bas tõnd tẽngã. Bala, fo lebga pãng soab n yɩɩd tõndo.»

¹⁷ La a Izak yii beenẽ n kẽng n tɩ tilg a zak Geraar ko-soogẽ n zĩnd be.

¹⁸ A Izak lebs n yoosa buls nins b sẽn dag n tu yẽnda ba a Abrahaam wakatẽ wã, tɩ Filistẽ-dãmbã rag n lebs n yẽd-b a Abrahaam kũumã poorã. La yẽnda kell n pʋda bulsã yʋy wa yʋy nins yẽnda ba a Abrahaam sẽn dag n pʋdã.

¹⁹ A Izak tʋmtʋmdbã tuka bulg Geraar ko-soogẽ, la b paama ko-bundum zĩig sẽn yaa sõama.

²⁰ Geraar tẽngã pe-kɩɩmb yika zabr ne a Izak pe-kɩɩmbã n yeel tɩ koomã yaa bãmb n so. Dẽ, a Izak pʋda bulgã yʋʋr tɩ Ezɛke, sẽn dat n togs tɩ ‹nokoɛɛm bulga.› Bala, b maana zabr ne yẽnda.

²¹ A Izak tʋmtʋmdbã tuu bulg a to, la b leb n zaba ne bãmb bul-kãng poorẽ. La a Izak pʋda bul-kãng yʋʋr tɩ Sitna.

²² A Izak viiga a yirã n yik n yi beenẽ n kẽng zĩig a to. La bãmb leb n tɩ tuu bulg beenẽ, la ned ka maan zabr ne bãmb bul-kãng poorẽ yɛs ye. La a pʋda bul-kãng yʋʋr tɩ Rehobote, sẽn dat n togs tɩ ‹yalenga.› Bala, yẽnda yeelame: «Sẽn-Ka-Saab kõo tõnd zĩ-yalenga, n na n kɩt tɩ tõnd paoongã fɩɩg tẽngã pʋga.»

²³ A Izak yika beenẽ n kẽng Bɛɛr-Seba.

²⁴ Badaar yʋngo, Sẽn-Ka-Saab puka b meng ne yẽnda n yeele: «Mam yaa fo ba a Abrahaam Wẽnnaam, da zoe rabeem ye. Bala, mam bee ne foom. Mam na n ninga fo zug barka, n kɩt tɩ fo yagensã fɩɩg n lebg wʋsgo, mam tʋmtʋmd a Abrahaam zug maasem yĩnga.»

²⁵ La a Izak mee tẽn-kugr beenẽ n pʋʋs ne Sẽn-Ka-Saab yʋʋre. La a tilga a fu-roogã beenẽ, la yẽnda tʋmtʋmdbã tuka bulg be.

A Izak maana kaool ne a Abimelɛke

²⁶ A Abimelɛk yii Geraar ne a zoa a Awuzate, la tãb-biis naab a Pikolle, n kẽng a Izak nengẽ.

²⁷ A Izak yeela bãmb yaa: «Yaa a wãn tɩ yãmb wat mam nengẽ? Ka yãmb n kisg maam n dig maam n yiis yãmb sʋk la?»

²⁸ Bãmb leoka a Izak yaa: «Tõnd yãame tɩ Sẽn-Ka-Saab bee ne foom. Yaa rẽ yĩng la tõnd tags tɩ yaa neere, tɩ fo wa tɩ d maan pʋleng ne taaba, n maan kaool tõnd ne taab sʋka.

²⁹ Tɩ bõn-kãng wilgdẽ, tɩ fo ka na n maan tõnd wẽnga, wa tõnd me sẽn ka maan foom wẽngã. Tõnd maana foom neer bala, la tõnd basa foom tɩ f loog ne bãane. La moasã, Sẽn-Ka-Saab ninga foom barka.»

³⁰ La a Izak maana tigr bãmb yĩnga, tɩ b rɩ, la b yũ.

³¹ La bãmb sãda beoogo, n yik n maan pʋleng ne taaba. La a Izak bas-b lame tɩ b looge, la bãmb yii beenẽ ne bãan n looge.

³² Badaar bala, a Izak tʋmtʋmdbã wa n togsa yẽnda bulgã bãmb sẽn tu wã yell sẽn yaa to-to. Bãmb yeela a Izak yaa: «Tõnd paama koom.»

³³ La a Izak pʋda bulgã yʋʋr tɩ Siba. Rẽ kɩtame tɩ b pʋd tẽn-kãng yʋʋr tɩ Bɛɛr-Seba hal tɩ ta rũndã.

³⁴ A Ezayu sẽn wa n tar yʋʋm pis-naase, a peega pagba. Yaa Hɛt ned a Beeri bi-pugl a Zehuditi, ne Hɛt ned a Elon bi-pugl a Basmate.

³⁵ La a Izak ne a pag a Rebeka paama sũ-toog pʋg-bãmbã yĩnga.