Sɩngrẽ 25 - WẼNNAAM SEBRE 2014

A Abrahaam peega pag a Ketʋra n paase

¹ A Abrahaam leb n peega pag a to n paase. Pʋg-kãng yʋʋr la a Ketʋra.

² A Ketʋra roga a Abrahaam kamba. Yaa a Zimran ne a Yoksan la a Medan ne a Madiyã la a Yisebak ne a Suwa.

³ A Yoksan n dog a Seba ne a Dedan. A Dedan yagens yaa Asʋʋr-dãmbã la Letʋʋs-dãmba, ne Lewum-dãmbã.

⁴ A Midiyã kamb yaa a Efa, a Efɛɛre, a Henoke, a Abida ne a Ɛldaa. Bãmb fãa rag n yaa a Ketʋra kom-dibli.

⁵ A Abrahaam rɩka bũmbã fãa n kõ a biig a Izake.

⁶ Sẽn deng a Abrahaam kũum, a baoo kũun n kõ a pʋg-rɩkdsã kambã, la a kɩt tɩ b yi n kẽng tẽms nins sẽn be yaangã n zãag ne yẽnda biig a Izake.

A Abrahaam kũum

⁷ A Abrahaam vɩɩmdame n kaoos yʋʋm koabg la pis-yopoe la a nu.

⁸ A Abrahaam kiime. Yẽnda paama yõ-wok n yaool n ki. A Abrahaam vɩɩmdame n kaoose, la a paama sũ-noog a kʋʋlem wakate, n yaool n ki tɩ b mum-a t'a bʋʋg a saam-dãmba.

⁹ A Abrahaam kambã, a Izak ne a Ismayɛll tɩ muma a Abrahaam Makpela tãn-bokã sẽn be Hɛt rao a Sowaar biig a Efrõ pʋʋgã pʋgã, n pẽneg Mamre.

¹⁰ Yaa pʋ-kãng la a Abrahaam sẽn dag n da Hɛt nebã nengẽ wã. B muma a Abrahaam ne a pag a Saara beenẽ.

¹¹ A Abrahaam kũumã zugẽ, Wẽnnaam ninga a Abrahaam biig a Izak zug barka. A Izak rag n tilga a yirã n pẽneg Lakayi-Royi bulgã.

A Ismayɛll kamb ne a yagense

¹² Ad a Abrahaam biig a Ismayɛll a Saara yem-poak a Agaar sẽn yaa Ezɩpt nedã sẽn dogã yagense.

¹³ Ad a Ismayɛll kom-dibli wã yʋy wa sẽn zems b buudã roto: Yaa a Ismayɛll bi-kãseng a Nebayote, a Kedaare, a Adbeyɛlle, a Mibsam,

¹⁴ a Misma, a Duma, a Masa,

¹⁵ a Hadaade, a Tema, a Yetʋʋre, a Nafis ne a Kedma. Bãmb yaa a Ismayɛll yagense.

¹⁶ Yaa bãmb yʋyã ne b tẽmse, la b sik zĩisi. Yaa nanambs piig la a yiibu, wa b buudã sẽn yaa to-to wã.

¹⁷ A Ismayɛll vɩɩmd n kaoosa yʋʋm koabg la pis-tã la a yopoe. A Ismayɛll kiime n bʋʋg a saam-dãmba.

¹⁸ A Ismayɛll yagensã kell n zĩnda sẽn sɩng ne Havɩla n tɩ ta Sʋʋr tẽngã sẽn be Ezɩpt yaangã, n dabd Asiiri soolmã sẽnẽ. A Ismayɛll yagensã tilga b yiyã n tees b saam-biisã fãa.

A Ezayu ne a Zakoob rogem

¹⁹ Ad a Abrahaam biig a Izak yagense. A Abrahaam n dog a Izake.

²⁰ A Izak sẽn wa n na n peeg a Rebeka n maan a pagã t'a tara yʋʋm pis-naase. A Rebeka yaa Aram tẽng ned a Betuwɛll sẽn be Padan-Aramã bi-pugla, n yaa a Labã sẽn yaa Aram tẽng nedã tão-poaka.

²¹ A Izak pʋʋs n kosa Sẽn-Ka-Saabo, a pag a Rebeka yĩnga. Bala, a rag n ka tar dogem ye. La Sẽn-Ka-Saab wʋma a kosgã. La a Izak pag a Rebeka rɩka pʋga.

²² La kambã sẽn dag n bee a Rebeka pʋgẽ wã rag n zabda taaba, t'a Rebeka mi n yetẽ tɩ: «Yaa bõe tɩ yel-kãngã paamd maam?» A Rebeka kẽngame n tɩ sok Sẽn-Ka-Saab n na n gese.

²³ Sẽn-Ka-Saab yeela a Rebeka yaa: «Yaa soolem a yiib n be fo pʋgẽ wã. La buud a yiib-kãens na n welga taaba, fo sẽn na n dog-bã wakate. Buud a yembr pãng na n yɩɩga a to, la yao wã na n sooga kãsmã.»

²⁴ A Rebeka rogmã wakat sẽn wa n ta, b mikame tɩ yaa kinkirs n dag n be a pʋgẽ wã.

²⁵ Pipi biigã yiime, la a yaa moeega, n tar yĩn-kõabnenga, la b pʋda yẽnda yʋʋr t'a Ezayu.

²⁶ La rẽ poore, yao wã pʋgl n yiime, la a nugã rag n gãda a Ezayu nao-kãsenkãarã. La b pʋda yẽnda yʋʋr t'a Zakoobe. Bãmb sẽn wa n na n dogã, t'a Izak rag n tara yʋʋm pis-yoobe.

A Ezayu koosa a rogem pʋɩɩre

²⁷ Kom-dibli a yiibã bɩɩme. A Ezayu lebga tãoosa, n mi tãoosg sõama, n gõod weoogẽ. La a Zakoob dag n yaa ned sẽn zĩ sɩɩ, n vɩ fu-rot pʋse.

²⁸ A Izak rag n nonga a Ezayu, bala, a dag n wat n kõta yẽnda weoog nemd t'a wãbdẽ. La a Rebeka rag n nonga a Zakoobe.

²⁹ La daar a yembre, a Zakoob rag n dʋgda a rɩɩbo, la a Ezayu yii a weoogã n lebg n wa, la a rag n yɛɛ zãnga.

³⁰ A Ezayu yeela a Zakoob yaa: «Mam kotame tɩ f yãk f rɩ-moomdã n kõ-m tɩ m dɩ. Bala, mam yɛɛ zãnga.» Rẽ kɩtame tɩ b pʋd a Ezayu yʋʋr t'a Edom, sẽn dat n togs tɩ ‹rɩ-moomde.›

³¹ A Zakoob yeela a Ezayu yaa: «Bɩ f reng n koos f bi-kãsen-pʋɩɩrã ne maam nanda.»

³² La a Ezayu leokame: «Gese, mam dat n kiime, dẽ wã, bi-kãsen-pʋɩɩrã yõod ne maam yaa bõe?»

³³ Dẽ, a Zakoob yeel-a lame: «Sã n yaa woto, bɩ f reng n wẽene.» La a Ezayu wẽena ne a Zakoobe, n dɩk a bi-kãsen-pʋɩɩrã n koos ne a Zakoobe.

³⁴ La a Zakoob yãka buri, ne bɛnga n kõ a Ezayu. La a rɩɩme la a yũ, la a yi n looge. Yɩɩ woto, t'a Ezayu ka geelg a bi-kãsen-pʋɩɩrã ye.