Sɩngrẽ 24 - WẼNNAAM SEBRE 2014

B baoo pag n wa kõ a Izake

¹ A Abrahaam dag n kʋʋlame n tar yʋʋm wʋsgo. La Sẽn-Ka-Saab ning-a-la bark bũmbã fãa pʋgẽ.

² A Abrahaam yeela a zakã tʋmtʋmd ning sẽn yaa kãsem n kaoos yẽnda zakẽ wã, n dag n get yẽnda laogã fãa yellã yaa: «Tik mam gerã,

³ tɩ m na n kɩtame tɩ f wẽen ne Sẽn-Ka-Saab sẽn yaa saasẽ la dũniyã Wẽnnaamã yʋʋre, tɩ f ka na n bao Kana soolmã mam sẽn be a pʋgẽ wã bi-pugl n kõ mam bi-riblã ye.

⁴ La tɩ fo na n kẽnga mam mengã tẽngẽ wã, mam ba-yirã, n tɩ bao pag beenẽ n wa kõ mam bi-ribl a Izake.»

⁵ La tʋmtʋmdã leoka a Abrahaam yaa: «Tõeeme tɩ pagã tɩ zãgs t'a ka na n tũ maam n wa tẽn-kãngã ye, dẽ wã, mam tog n lebg n wa peega yãmb biig a Izak n tall-a n kẽng tẽng ning yãmb sẽn yiẽ wã bɩ?»

⁶ La Abrahaam leokame: «Gũus f meng n da wa peeg mam bi-riblã n leb tẽng ning mam sẽn yiẽ wã ye!

⁷ Sẽn-Ka-Saab sẽn yaa saasẽ Wẽnnaamã sẽn kɩt tɩ mam yi n bas m buudã ne m ba-yirã, bãmb sẽn gom ne maam n wẽen n yeel tɩ bãmb na n kɩtame tɩ mam yagensã soog tẽn-kãngã wã, bãmb mengã na n tʋma b malɛɛk t'a lʋɩ fo taoore, la yaa beenẽ la fo na n bao pag n wa kõ mam biigã.

⁸ Pagã sã n tɩ zãgs t'a ka na n tũ foom n wa, wẽeneg ning mam sẽn kɩt tɩ fo wẽenã taal ka na n zĩnd fo zug ye. La bũmb ning sẽn be bala, ra tall m biigã n kẽng beenẽ ye.»

⁹ Tʋmtʋmdã rɩka a nug n tik a zu-soab a Abrahaam gerã n wẽen n yeel t'a na n maana wa b sẽn yeelã.

¹⁰ Tʋmtʋmdã yãka a soaal a Abrahaam yʋgma piiga, ne a soaalã bõn-sõama fãa, la a loogame. Tʋmtʋmdã yikame n kẽng n ta Mezopotami tẽngã n ta a Nakoor tẽngã.

¹¹ Yẽnda pẽnega tẽngã n kɩt tɩ yʋgma wã gãand bulg sɛɛgẽ. La rag n yaa zaabre, wakat ning pagbã sẽn yit n kẽnd n toogd koomã.

¹² Tʋmtʋmdã pʋʋsame n yeele: «M soaal a Abrahaam Wẽnnaam Sẽn-Ka-Saabo, mam kota yãmb tɩ y sõng-ma, tɩ m paam bũmb ninga mam sẽn baoodã rũndã, la m kot-y lame tɩ y maan m soaal a Abrahaam neere!

¹³ Ade, mam na n yalsa ko-nifã sɛɛga, la tẽngã pʋg-sadb na n yiime n wa toog koom ka.

¹⁴ Dẽ, pʋg-sad ning mam sẽn na n yeel tɩ m kotame t'a sik a yʋʋrã tɩ m yũ koomã, t'a leoke: ‹Bɩ y yũ, la mam na n yũnuga yãmb yʋgma wã me.› Mam datame tɩ yɩ pʋg-sad-kãng la yãmb yãk yã, t'a na n yɩ yãmb tʋmtʋmd a Izak paga! Dẽ, mam na n bãngame tɩ yãmb maana mam soaal a Abrahaam neere.»

¹⁵ La yẽnda sẽn nan ket n gomd bal yee, a nee a Rebeka sẽn yi tẽngã pʋg n palg a yʋʋr a bãokẽ n watẽ. A Rebeka yaa a Betuwɛll bi-pugla. A Betuwɛll yaa a Nakoor pag a Milka bi-ribla, la a Nakoor yaa a Abrahaam yao.

¹⁶ Pʋg-sadã rag n yaa neer hal wʋsgo. La a rag n yaa pʋg-sad sẽn ka mi rao ye, la rao baa a yembr dag n nan ka bao-a ye. Pʋg-sadã siga ko-nifẽ wã n toog koomã n pid a yʋʋrã n lebg n yi.

¹⁷ A Abrahaam tʋmtʋmdã wudgame n seg-a n yeel-a: «Mam kotame tɩ f kõ-m f yʋʋrã koom bilf tɩ m yũ.»

¹⁸ La pʋg-sadã leokame: «M zu-soaba, yũ-y-yã!» La a kɩlla a yʋʋrã noor tao-tao n kõ tʋmtʋmdã koomã t'a yũ.

¹⁹ Pʋg-sadã sẽn kõ tʋmtʋmdã koomã t'a yũ n sɛ, pʋg-sadã yeelame: «Mam na n wii koomã n yũnug yãmb yʋgma wã me hal tɩ b yũ n tɩge.»

²⁰ Pʋg-sadã wudga tao-tao n kiig a yʋʋrã koom gaolgã pʋga, la a wudg n kẽng bulgẽ wã n na n tɩ toog koomã yɛs n wa. La a wii koomã n yũnug yʋgma wã fãa.

²¹ La raoã rag n sĩndame, la a sokd a meng a Rebeka wɛɛngẽ n na n bãng sã n yaa Sẽn-Ka-Saab sẽn dat n maneg yẽndã sorã la woto.

²² Yʋgma wã sẽn yũ n sɛ, raoã yãka sãnem tʋblond zɩslem sẽn ta wakɩ-koɛɛng pʋɩ-sʋk zɩslem, la a bao zũy a yiibu, b zɩslem sẽn zems wakɩ-koeems piig zɩslem, n kõ pʋg-sadã.

²³ Tʋmtʋmdã soka pʋg-sadã yaa: «Fo yaa ãnda bi-pugla? Mam kotame tɩ f togs maam. Rẽ yĩnga, zĩig bee fo ba wã zakẽ tɩ tõnd tõe n bõos n gãand be yʋngã?»

²⁴ Pʋg-sadã leokame: «Mam baaba yaa a Betuwɛlle. A Betuwɛll yaa a Nakoor pag a Milka bi-ribla.»

²⁵ Pʋg-sadã leb n yeelame: «Tõnd tara kãenkãe la yamd wʋsg yiri, la zĩig me bee yãmb sẽn tõe n gãand yʋngã.»

²⁶ Woto, raoã wõgemdame n fõgen a neng tẽng Sẽn-Ka-Saab taoore.

²⁷ Yẽnda pʋʋsa a woto: «Bɩ Sẽn-Ka-Saab sẽn yaa mam soaal a Abrahaam Wẽnnaamã paam pẽgre! Bãmb wilga b nonglem ne b pʋ-peelem mam soaalã yĩnga. Sẽn-Ka-Saab talla maam n wa kẽes mam soaalã roagdb zakẽ.»

²⁸ La bi-puglã zoe n kẽnga a ma nengẽ n tɩ togs-a yellã fãa.

²⁹ La mikame t'a Rebeka rag n tara kẽem-bi-ribl yʋʋr sẽn boond t'a Labã. La a Labã yiime n zoe n babs raoã ko-nifã sɛɛga.

³⁰ A Labã sẽn yãnd tʋb-londã ne zũyã sẽn be a yao a Rebeka nugẽ wã, la a sẽn wʋm a Rebeka sẽn dag n gomd n togsd raoã sẽn yeel bũmb ninsã, yẽnda zoeeme n babs raoã, n mik-a t'a yas ne a yʋgma wã ko-nifã sɛɛga.

³¹ A Labã yeela raoã yaa: «Yãmb yaa soab ning sẽn tar Sẽn-Ka-Saab barka! Wa-y-yã! Bõe yĩng tɩ yãmb yas yɩnga? Mam manega roogo, la m bao zĩig yʋgma wã yĩnga.»

³² Raoã kẽe zakã pʋga. A Labã kɩtame tɩ b sik yʋgma wã zɩɩbã n bao kãenkãe ne yamd n kõ-ba, la a bao koom n kõ raoã ne neb nins sẽn tũ yẽnda wã tɩ b waas b nao.

³³ La b talla rɩɩb n wa kõ raoã. La yẽnda yeelame: «Mam ka na n dɩ, n nan ka togs koɛɛg ning mam sẽn tar n dat n togsã ye.» La a Labã yeelame: «Togs-y-yã.»

³⁴ Dẽ, tʋmtʋmdã yeelame: «Mam yaa a Abrahaam tʋmtʋmda.

³⁵ Sẽn-Ka-Saab ninga mam soaal a Abrahaam bark wʋsgo. Bãmb lebga nin-kãsenga. Sẽn-Ka-Saab kõo mam soaal a Abrahaam rũm-bɛd ne rũm-bãoonego, la wanzuri ne sãnem, la b kõ-b yem-daad ne yem-pogse, la yʋgma ne bõense.

³⁶ Mam soaal a Abrahaam pag a Saara roga mam soaalã bi-ribl a kʋʋlem wakate. La b rɩka b paoongã fãa n kõ bi-ribl-kãnga.

³⁷ Mam soaalã kɩtame tɩ mam wẽene.» Bãmb yeelame: «Wẽen tɩ f ka na n bao pag Kana soolmã pʋga, tẽng ning pʋg tõnd sẽn beẽ wã kom-pugli sʋka, n kõ mam biigã ye.

³⁸ Kẽng mam ba-yirã, mam buudã sʋka, n tɩ bao pag be n wa kõ mam biigã.»

³⁹ La mam yeela m soaalã tɩ tõeeme, tɩ pagã ka sak n na n tũ maam n wa ye.

⁴⁰ Mam soaalã yeelame: «Mam sẽn tũud Sẽn-Ka-Saab sẽn yaa soab ning mam sẽn tũudã na n tʋma b malɛɛk t'a yãag foom n kɩt tɩ f kẽndã yɩ neere. Bao pag mam ba-yirã, mam buudã sʋka, n wa kõ mam biigã.

⁴¹ Sẽn na yɩl tɩ wẽenegã taal ra zĩnd fo zugu, fo sã n ta mam buudã sʋka, tɩ bãmb ka sak n kõ foom bi-pugla, wẽeneg ninga mam sẽn kɩt tɩ fo wẽenã taal ka na n zĩnd fo zug ye.

⁴² Dẽ, mam taa bulgẽ wã rũndã, la mam yeela Sẽn-Ka-Saab yaa: «M soaal a Abrahaam Wẽnnaam, sõng-y-m tɩ m so-toakã yɩ neere.

⁴³ Ade, mam na n yalsa ko-nifã sɛɛga, tɩ pʋg-sad ning sẽn na n wa-a, n wa toog koomã, tɩ mam yeel-a: mam kotame tɩ f sulg n kɩll f yʋʋrã n kõ-m koom bilfã›,

⁴⁴ t'a leok maam tɩ m yũ wã, la a yeel t'a na n tooga koomã n kõ mam yʋgma wã me wã, bɩ yɩ pʋg-sad-kãng la Sẽn-Ka-Saab yãk yã, n na n kõ mam soaalã bi-ribla!

⁴⁵ La mam sẽn dag n nan ket n gomd m sũurẽ, la a Rebeka sẽn yi n palg a yʋʋr a bãokẽ n wa ta n kẽ bulgã pʋg n toog koomã. Dẽ, mam yeel-a lame: ‹Mam kotame tɩ f kõ-m koom tɩ m yũ!›

⁴⁶ La a sulgame n kɩll a yʋʋrã a sẽn dag n tʋkã tao-tao, n yeel maam tɩ m yũ. La a yeel t'a na n wii koomã n kõ mam yʋgma wã me tɩ b yũ. Mam yũume, la a kõo mam yʋgma wã me tɩ b yũ.

⁴⁷ Dẽ, mam sok-a lame: ‹Fo yaa ãnda bi-pugla?› La a leoka maam tɩ yẽnda yaa a Betuwɛll bi-pugla. T'a Betuwɛll yaa a Nakoor ne a pag Milka bi-ribla. Dẽ, mam baoo tʋb-long n ning a yõorã, la m bao zũy n pid a nusã.

⁴⁸ Rẽ poore, mam wõgemda Sẽn-Ka-Saab taoor n pẽg mam soaal a Abrahaam Wẽnnaam Sẽn-Ka-Saabo, bãmb sẽn maan pʋ-peelem n yãag maam tɩ m na n tõog n peeg mam soaalã roagd bi-pugl n tɩ kõ m soaalã bi-riblã yĩnga.

⁴⁹ Moasã, yãmb sã n na n wilga y nonglem ne y sɩd mam soaalã yĩnga, bɩ y togs maam, la y sã n ka na n maan woto me, bɩ y togs maam tɩ m tõe n bãng m sẽn na n maanega.»

⁵⁰ Dẽ, a Labã ne a Betuwɛll leoka yẽnda n yeele: «Yel-kãngã yita Sẽn-Ka-Saab meng nengẽ, tõnd ka tar koɛɛg n na n yeel yãmb ye. Tõnd ka tõe n yeel tɩ n-yẽe, d ka tõe n yeel tɩ ayo.

⁵¹ A Rebeka yẽ la sẽn yas yãmb taoorã la, peeg-y-yã-a n tall n looge, t'a tõe n tɩ yɩ yãmb soaalã bi-ribl paga, wa Sẽn-Ka-Saab sẽn yeelã.»

⁵² A Abrahaam tʋmtʋmdã sẽn wʋm a Labã ne a Betuwɛll sẽn gom woto wã, yẽnda wõgemda Sẽn-Ka-Saab taoore.

⁵³ Tʋmtʋmdã yiisa wanzuri fan-teedo, la sãnem fan-teedo, ne futu, n kõ a Rebeka. Tʋmtʋmdã kõo a Rebeka tão wã ne a ma wã me kũuni.

⁵⁴ Rẽ poore, a Abrahaam tʋmtʋmdã ne neb nins sẽn yãag yẽnda wã rɩɩme, la b yũ, la b gãand be yʋn-kãnga. Beoogã sẽn vẽege, bãmb yikame t'a Abrahaam tʋmtʋmdã yeele: «Kõ-y-m sor tɩ m lebg n leb m soaalã nengẽ.»

⁵⁵ A Rebeka tão wã ne a Rebeka ma wã yeelame: «Bas-y tɩ pʋg-sadã zĩnd ne tõnd rasem piig n paase, rẽ poore, y tõe n yaool n loogame.»

⁵⁶ A Abrahaam tʋmtʋmdã yeelame: «Ra kɩt-y tɩ m leb n kaoos ye. Bala, Sẽn-Ka-Saab manega mam so-toakã, dẽ wã, bɩ y bas-m tɩ m lebg n leb n soaalã nengẽ.»

⁵⁷ La bãmb yeelame: «Sã n yaa woto, bɩ d bool pʋg-sadã meng n sok n gese.»

⁵⁸ Woto, bãmb boola a Rebeka n sok-a: «Fo na n sak n tũu raoã n looge?» La a Rebeka leokame tɩ n-yẽe.

⁵⁹ Dẽ, bãmb basa b tão-poak a Rebeka ne a yaoondã tɩ b tũ a Abrahaam tʋmtʋmdã ne a tũud-n-taasã n looge.

⁶⁰ Bãmb ninga a Rebeka bark n yeele: «Foom, d tão sõngo, bɩ f fɩɩg n lebg tus-kẽema! Bɩ fo yagensã tõog b bɛɛbã n deeg b tẽmsã n sooge!»

⁶¹ A Rebeka yika ne a tʋmtʋmd-pogsã n zomb yʋgma n tũ raoã tɩ b na n looge. A Abrahaam tʋmtʋmdã peega a Rebeka n tall n looge.

⁶² Wakat-kãnga, rag n nan yaa a Izak sẽn yi Lakayi-Royi bulgã n wa. Bala, yẽnda rag n tɩ tilga Negɛɛv soolem.

⁶³ La daar a yembr zaabre, a Izak yiime n na n kẽng we-kɛɛng n kok pemsem. La a Izak sẽn zẽk n gese, a nee yʋgma sẽn wate.

⁶⁴ A Rebeka me zẽkame n gese, la a yãnda a Izake. Dẽ, a yɩka yʋgemdã zug n sigi.

⁶⁵ A Rebeka soka a Abrahaam tʋmtʋmdã tɩ yaa yɛɛnẽ dao la sẽn kẽnd n segd bãmbã.

⁶⁶ La tʋmtʋmdã leokame tɩ yaa yẽnda soaalã. Dẽ, a Rebeka rɩka a peendã n pil a menga. La a Abrahaam tʋmtʋmdã togsa a Izak yẽnda sẽn maan bũmb ningã fãa.

⁶⁷ A Izak peega a Rebeka n tɩ kẽes-a a ma a Saara fu-roogẽ. La a Izak peega a Rebeka n maan a paga, la a Izak nonga a Rebeka. Woto, a Izak paama belsg wʋsg a ma a Saara kũumã poore.