Sɩngrẽ 23 - WẼNNAAM SEBRE 2014

A Abrahaam pag a Saara kũum

¹ A Saara vɩɩmda yʋʋm koabg la pisi la a yopoe. Yaa woto n yɩ a Saara yʋʋmã sõore.

² A Saara kii Kiryat-Arba, sẽn dat n togs tɩ yaa Ebrõ sẽn be Kana soolmẽ wã. La a Abrahaam wa n yãba a Saara kʋʋrã.

³ Woto, a Abrahaam yikame n bas a pag a Saara kũumã, la a gom ne Hɛt-rãmbã n yeele:

⁴ «Mam yaa sãana, la nin-loaagdg n be ne yãmba, dẽ wã, sõng-y maam tɩ m paam yaad zĩig yãmb nengẽ n dɩk m pagã kũum n mum.»

⁵ Hɛt-rãmbã leoka a Abrahaam yaa:

⁶ «M zu-soaba, kelg-y tõndo, yãmb yaa Wẽnnaam na-biiga, n be tõnd sʋka, bao-y yaoog ning sẽn ta yãmb yam tõnd yaadã sʋka, n mum y pagã. Tõnd ned baa a yembr kõn zãgs t'a ka na n kõ yãmb a yaoog tɩ y mum y pagã kũum ye.»

⁷ A Abrahaam yikame n wõgemd tẽngã nebã sẽn yaa Hɛt-rãmbã taoore.

⁸ Yẽnda yeela bãmb yaa: «Yãmb sã n sakame tɩ mam na n dɩk m pagã kũum n tɩ mume, bɩ y kelg maam neere, la y yõk a Sofaar biig a Efrõ sɛɛg n kõ-ma,

⁹ t'a tõe n sak n kõ maam Makpela tãn-bokã sẽn yaa yẽnda n so tɩ be a pʋʋgã noorã. Bɩ a koos-a ne maam tɩ m da ne m ligdi, tɩ lebg mam yaad zĩig yãmb sʋka.»

¹⁰ A Efrõ rag n bee Hɛt-rãmbã sẽn yaa yẽnda buudã sʋka. La a Efrõ leoka a Abrahaam Hɛt nebã fãa ne neb nins sẽn dag n tũud yẽnda tẽngã rignoorẽ n kẽedẽ wã fãa nifẽ, n yeele:

¹¹ «Ayo! M soaala, kelg-y maam! Mam kõta yãmb pʋʋgã ne tãn-bokã sẽn be beenẽ wã. Mam kõt-a-la yãmb mam buudã nebã fãa taoor tɩ y mum y pagã kũum.»

¹² La a Abrahaam wõgemda tẽngã nebã fãa taoore.

¹³ A Abrahaam yeela a Efrõ tẽngã nebã fãa nifẽ yaa: «Bɩ fo me kelg maam moasã! Mam na n daa pʋʋgã ne ligdi. Mam kot-f lame tɩ f sak n deeg ligdã mam sẽn na n yao wã, tɩ mam tõe n mum m pagã kũum beenẽ.»

¹⁴ A Efrõ leoka a Abrahaam n yeel yaa:

¹⁵ «M soaala, kelg-y maam! Zĩig ligd sẽn zems wakɩ-koeems kobs-naas yõod yaa bõe maam ne yãmb sʋka? Bɩ y tɩ mum y pagã kũum.»

¹⁶ Dẽ, a Abrahaam sẽn wʋm a Efrõ sẽn gom woto wã, yẽnda sõda ligdã tɩ zems sõor ning b sẽn dag n yeelã Hɛt nebã fãa nifẽ n kõ-a, yaa wanzuri wakɩ-koeems kobs-naase, wa sẽn zems lɛɛbdbã sẽn tar n leebdẽ wã.

¹⁷ Woto, sẽn sɩng ne badaare, a Efrõ pʋʋgã sẽn be Makpela n dabd Mamre sẽnẽ wã, pʋʋg ning tãn-bokã sẽn be a pʋgẽ wã, ne tɩɩsã sẽn gũbg pʋʋgã fãa,

¹⁸ lebga a Abrahaam soolem. La yaa Hɛt nebã fãa, ne neb nins sẽn dag n kẽed tẽngã rignoorẽ wã taoore.

¹⁹ Rẽ poore, a Abrahaam muma a pag a Saara tãn-bok ning sẽn be Makpela pʋʋgã pʋgẽ wã pʋga, yaa Mamre tẽnga noore. Rat n yeelame tɩ yaa Ebrõ sẽn be Kana soolmẽ wã.

²⁰ Rẽ kɩtame tɩ pʋʋgã ne tãn-bokã sẽn be a pʋgã kell n lebg a Abrahaam yaad zĩig a sẽn da ne a ligd Hɛt nebã nengẽ.