Sɩngrẽ 21 - WẼNNAAM SEBRE 2014

A Izak rogem

¹ Sẽn-Ka-Saab tẽega a Saara yell wa bãmb sẽn dag n yeelã, la Sẽn-Ka-Saab maana wa bãmb sẽn dag n goma.

² A Saara rɩka pʋg n dog a Abrahaam bi-ribl a kʋʋlem wakate, wa sẽn zems wakat ning Wẽnnaam sẽn dag n togs yẽnda wã.

³ La a Abrahaam pʋda yẽnda bi-ribl ning a Saara sẽn dogã yʋʋr t'a Izake, sẽn dat n togs t'a ‹Laado.›

⁴ A Abrahaam bi-ribl a Izak sẽn wa n tar rasem a nii, a kẽes-a-la bãongo, wa Wẽnnaam sẽn dag n yeel yẽnda t'a maanã.

⁵ A Abrahaam dag n tara yʋʋm koabga, yẽnda biig a Izak rogmã wakate.

⁶ Dẽ, a Saara yeelame: «Wẽnnaam kõo maam laado. Ned ning fãa sẽn na n wʋm-a yel-kãngã, na n pusga laad mam wɛɛngẽ!»

⁷ A Saara leb n yeelame: «Ãnda n dag n na n yeel a Abrahaam t'a Saara na n yẽsma kamba? La baoosgo, mam doga a Abrahaam bi-ribl a kʋʋlem wakate.»

⁸ Biigã bɩɩme, la a b yãk-a-la bĩisim. La b sẽn yãk a Izak bĩismã daare, a Abrahaam maana tig-kãsenga.

A Agaar ne a biig a Ismayɛll rigbu

⁹ A Saara yãnda a Abrahaam biig ning Ezɩpt tẽng bi-pugl a Agaar sẽn dogã sẽn laade.

¹⁰ La a Saara yeela a Abrahaam yaa: «Rig-y yem-poakã ne a biigã tɩ b looge, bala, yem-pog-kãngã biigã ka na n naag mam biig a Izak n paam dogem pʋɩɩr ye.»

¹¹ Gom-kãngã ka tol n yɩ a Abrahaam noog ye, a Ismayɛll me sẽn yaa yẽnda bi-ribla yĩnga.

¹² La Wẽnnaam yeela a Abrahaam yaa: «Da maan sũ-sãang f bi-riblã ne f yem-poakã yĩng ye. Maan bũmb nins fãa a Saara sẽn kot foomã n kõ-a. Bala, na n yɩɩ ne a Izak la fo na n paam yagens sẽn na n tar fo yʋʋrã.

¹³ Mam na n kɩtame me, tɩ fo yem-poakã biig yɩ bu-kãsenga, bala, yẽnda me yaa fo biiga.»

¹⁴ A Abrahaam yika yibeoog pĩnda, n bao rɩɩbo, la a sui koom ne waooga n kõ a Agaar t'a palg a bãoko. La a rɩk biigã me n kõ-a, la a rig-a t'a looge. A Agaar loogame n menem n kẽ Bɛɛr-Seba weoogã n gõodẽ.

¹⁵ La Ko-waoogã koom wa n sɛɛme, dẽ, a Agaar rɩka biigã n gãneg tuug tẽngr maasmẽ,

¹⁶ la a bas n kẽng n tɩ zĩnd yɩɩg sẽn zems tãp pĩim tãoobo. Bala, yẽnda rag n yetame: «Mam ka rat n get m biigã t'a kiidẽ ye!» Woto, a Agaar zĩndame n tees n get biigã, la a yãbd n wiisdẽ.

¹⁷ Wẽnnaam wʋma bi-riblã koɛɛga. La Wẽnnaam malɛɛk zĩnda yĩngr n bool a Agaar n yeel-a yaa: «Agaare, yaa bõe n tar foom? Da zoe rabeem ye, tɩ bala, Wẽnnaam wʋma bi-riblã koɛɛgã a sẽn beẽ wã.

¹⁸ Yik n dɩk biigã, la f gãd a nugã tɩ mam na n kɩtame t'a yɩ bu-kãsenga.»

¹⁹ Wẽnnaam puka a Agaar ninã t'a yãnd bulg sẽn tar koom, la a kẽng n tɩ pidsa a ko-waoogã n kõ a biigã t'a yũ.

²⁰ La Wẽnnaam dag n bee ne biigã, la a bɩɩme, n zĩnd weoogã pʋg n lebg tãb-tãood sẽn mi tãp tãoob sõama.

²¹ A Ismayɛll zĩnda Paarã weoogã pʋga, la a ma wã baoo Ezɩpt tẽng bi-pugl n kõ-a t'a maan a paga.

A Abrahaam ne a Abimelɛk kaoola

²² Wakat-kãnga, a Abimelɛk tãb-biisã naab a Pikoll tũu yẽnda tɩ b wa a Abrahaam nengẽ, n yeel a Abrahaam yaa: «Wẽnnaam bee ne foom f tʋʋma fãa pʋse.

²³ Dẽ wã, bɩ f wẽen ne Wẽnnaam yʋʋre, tɩ f ka na n zãmb maam bɩ m kambã, wall mam yagensã ye. La tɩ fo na n maana maam ne soolem ning fo sẽn yaa sãan a pʋgẽ wã neere, wa mam sẽn maan foom neerã.»

²⁴ A Abrahaam yeelame: «Mam na n wẽena woto.»

²⁵ La a Abrahaam yẽgma ne a Abimelɛk bulg ninga a Abimelɛk tʋmtʋmdbã sẽn yõk n deeg ne pãngã poorẽ.

²⁶ La a Abimelɛk yeela a Abrahaam yaa: «Mam ka mi sẽn yaa ned ning n maan yel-kãng ye. Fo ka togs maam bõn-kãng ye, la sã n ka rũndã, mam dag n ka bãng ye.»

²⁷ Woto, a Abrahaam yãka rũm-bãooneg ne rũm-bɛd n kõ a Abimelɛke, la bãmb maana kaool bãmb b yiibã ne taab sʋka.

²⁸ A Abrahaam yãka pe-yãans a yopoe piisã sʋk n welg toore.

²⁹ La a Abimelɛk yeela a Abrahaam yaa: «Fo sẽn yãk pe-bi-bãmba b yopoe wã n welg toorã yaa bõe yĩnga?»

³⁰ A Abrahaam leokame: «Mam datame tɩ yãmb sak n deeg pe-bãmba b yopoe wã tɩ yɩ kaset tɩ yaa maam n tu bul-kãngã!»

³¹ Yaa woto n kɩte, tɩ b boond zĩ-kãng tɩ Bɛɛr-Seba. Bala yaa beenẽ la bãmb b yiibã wẽen ne taaba.

³² Dẽ, bãmb maana kaool ne taab Bɛɛr-Seba. Rẽ poore, a Abimelɛk yika ne a tãb-biisã naab a Pikoll tɩ b lebg n leb Filistẽ-dãmbã tẽngẽ.

³³ A Abrahaam sela tɩɩg sẽn boond tɩ Tamariis beenẽ, la a pʋʋs ne Wẽnnaam Sẽn-Ka-Saab yʋʋre.

³⁴ A Abrahaam zĩnda sãand Filistẽ-dãmbã tẽngẽ n kaoos wʋsgo.