Sɩngrẽ 16 - WẼNNAAM SEBRE 2014

A Agaar ne a Ismayɛll kibare

¹ A Abram pag a Sarayi rag n ka tõog n dog biig n kõ a Abram ye. A Sarayi rag n tara a yem-poak a yembr sẽn yaa Ezɩpt tẽng bi-pugla, t'a yʋʋr boondẽ t'a Agaare.

² A Sarayi yeela a Abram yaa: «Sẽn-Ka-Saab sẽn ka kõ maam dogmã yĩnga, m kot-y lame tɩ y kẽ ne mam yem-poakã, tɩ daar ninga a na rog bi-ribl n kõ-ma.» Dẽ, a Abram kelga a Sarayi goamã.

³ A Abram sẽn zĩnd Kana soolem tɩ yʋʋm piiglẽ, yẽnda pag a Sarayi rɩka a yem-poak a Agaar sẽn yaa Ezɩpt buudã nedã n kõ a sɩd a Abram t'a maan a paga.

⁴ A Abram kẽe ne a Agaare, la a rɩka pʋga. La a Agaar sẽn mik tɩ yẽnda tara pʋgã, yẽnda ka leb n nand a zu-soben-poakã ye.

⁵ Dẽ, a Sarayi yeela a Abram yaa: «Paoogr ning mam sẽn paamd moasã wã bee yãmb zugu. Yaa mam meng n dɩk m yem-poak n kõ yãmba. La moasã, a sẽn mik t'a tʋtame wã, a ka leb n nand maam ye. Bɩ Sẽn-Ka-Saab yɩ yel-kãngã sẽn be yãmb ne maam sʋkã bʋ-kaooda.»

⁶ A Abram leoka a Sarayi yaa: «Fo yem-poakã bee fo nugẽ, maan fo sẽn dat ne-a.» La a Sarayi namsa a Agaar hal wʋsg t'a Agaar zoe n bas-a.

⁷ Sẽn-Ka-Saab malɛɛkã yãnda a Agaar ko-bundum zĩig sɛɛg we-raoogã pʋga. Yaa ko-bundum zĩig ning sẽn be Suur sorã noorã.

⁸ Malɛɛkã yeela a Agaar yaa: «A Sarayi yem-poak a Agaare, fo yii yɛɛnẽ woto, la fo rabda yɛ?» A Agaar leokame: «Mam zoetame n na n zãag ne m zu-soben-poak a Sarayi.»

⁹ Sẽn-Ka-Saab malɛɛkã yeela yẽnda: «Lebg n kẽng f zu-soben-poakã nengẽ n tɩ sik f meng a taoore.»

¹⁰ Malɛɛkã leb n yeel-a-lame: «Mam na n kɩtame tɩ fo yagensã yɩ wʋsgo, la b na yɩɩ wʋsg tɩ ned ka tõe n sõd-b n sɛ ye.»

¹¹ Sẽn-Ka-Saab malɛɛkã yeel-a lame: «Ade, fo tʋtame! Fo na n doga bi-ribla. La fo na n pʋda a yʋʋr t'a Ismayɛlle. Bala, Sẽn-Ka-Saab wʋma fo koɛɛgã, f paoogrã pʋga.

¹² Bi-kãng na n yɩɩ wa we-bõanga, yẽnda na n zabda ne nebã fãa, la nebã fãa na n zabda ne yẽnda, La yẽnda na n vɩɩmda toor ne a ba-biisã fãa.»

¹³ A Agaar pʋda Wẽnnaam ning sẽn gom ne yẽndã wã yʋʋr tɩ: Ata-Ɛll-Royi. Sẽn dat n yeele: «Bãmb yaa Wẽnnaam sẽn ne maam!» Bala, a yeelame: «Mam yãnda bãmb n ket n vɩ.»

¹⁴ Yaa woto n kɩt tɩ b pʋd bulgã yʋʋr tɩ ‹Lakayi-Royi.› Sẽn dat n togs tɩ ‹sẽn vɩ-a n ne maamã bulga.› Bulgã bee Kadɛɛs ne Berɛɛd sʋka.

¹⁵ A Agaar roga a Abram bi-ribla. La a Abram pʋda yẽnda biig ninga a Agaar sẽn dogã yʋʋr t'a Ismayɛlle. Sẽn dat n togs tɩ ‹Wẽnnaam wʋmdame.›

¹⁶ A Agaar sẽn wa n dog a Abram biig a Ismayɛllã, t'a Abram dag n tara yʋʋm pis-nii la a yoobe.