Rom Dãmba 8 - WẼNNAAM SEBRE 2014

Vɩɩm Sɩɩg-sõng sẽn kõta

¹ Woto yĩnga, sɩbgr ka be neb nins sẽn be a Zeezi Kiris pʋgẽ [n kẽnd wa sẽn zems Wẽnnaam Sɩɩgã raabã la ka yĩng ratmã] zut ye.

² Sɩd me, Sɩɩg sẽn kõt vɩɩm a Zeezi Kiris pʋgẽ wã tõog yolsa maam ne yel-wẽnã tõogo, la ne kũum tõog yembdo.

³ Bala, Wẽnnaam sẽn tʋm b meng Bi-riblã ne yĩng sẽn wẽnd yel-wẽnã rẽndã, yaa yel-wẽnã yiisg yĩnga. Bi-riblã zĩnda b yĩngã pʋgẽ n wilg tɩ yel-wẽnã ka sõama ye. La tõogã ka tõe rẽnda ye. Bala, yĩngã kɩtame t'a ka pãng ye.

⁴ Kiris maana a woto tɩ tɩrlem ning tõogã sẽn yeel tɩ d tog n paamame wã na pid tõnd pʋsẽ, tõnd sẽn kẽnd wa sẽn zems Sɩɩgã raabo la ka yĩng rẽndã yĩnga.

⁵ Sɩd me, neb nins sẽn vɩ wa yĩngã sẽn datã, yĩngã sẽn dat bũmb ninsã n tusd bãmba, la yaa Sɩɩgã sẽn dat bũmb ninsã n tɛt neb nins sẽn kẽnd wa Sɩɩgã sẽn datã.

⁶ Yĩngã ratem sakr wata ne kũum, la Sɩɩgã ratem sakr wata ne vɩɩm la bãane.

⁷ Bala, yĩngã ratem sakr yaa beem ne Wẽnnaam, tɩ bõe, yĩngã ka sakd Wẽnnaam tõogã ye, la a pʋs n ka tõe n sak-a me ye.

⁸ La neb nins yĩngã ratem sẽn so wã yaool n ka tõe n ta Wẽnnaam yam ye.

⁹ Ne yãmba, yĩngã ratem ka leb n so yãmb yɛs ye, yaa Sɩɩgã n so yãmba, sã n yaa tɩ Wẽnnaam Sɩɩgã bee yãmb pʋse. Ned sã n ka tar Kiris Sɩɩgã, a ka bãmb dẽnd ye.

¹⁰ La Kiris sã n be yãmb pʋgẽ, yaa sɩd tɩ yĩngã yaa kũum yel-wẽnã yĩnga, la Sɩɩgã kõta vɩɩm, tɩrlmã yĩnga.

¹¹ La soab ning sẽn vʋʋg a Zeezi tɩ b yi kũum sʋkã Sɩɩg sã n be yãmb pʋgẽ, soab‑kãnga, sẽn vʋʋg-a a Zeezi Kiris tɩ b yi kũum sʋkã na n kõo yãmb yĩn-kiidsã me vɩɩm, bãmb Sɩɩgã sẽn be yãmb pʋgẽ wã maasem yĩnga.

¹² Woto yĩngã, m ba-biisi, tõnd tara samde, la ka yĩngã samde, n na n vɩɩmd wa yĩngã sẽn dat ye.

¹³ Yãmb sã n vɩɩmd wa yĩngã sẽn data, yãmb na ki. La yãmb sã n kɩt tɩ yĩngã tʋʋm ki ne Sɩɩgã pãnga, yãmb na vɩɩmde.

¹⁴ Bala, neb nins fãa Wẽnnaam Sɩɩgã sẽn tɛt yaa Wẽnnaam kamba.

¹⁵ Yãmb ka reeg yembd sɩɩg n na n ket n vɩ rabeem pʋgẽ ye. La yãmb reega Sɩɩg sẽn kɩtd tɩ yãmb lebg Wẽnnaam kamba, tɩ Sɩ-kãng maasem yĩnga, tõnd yetame tɩ Abba, sẽn dat n yeel tɩ «m ba.»

¹⁶ Wẽnnaam Sɩɩgã meng kɩta kaset ne tõnd sɩɩgã n yetẽ tɩ tõnd yaa Wẽnnaam kamba.

¹⁷ La tõnd sã n yaa bãmb kamba, tõnd yaa b rãmb nins sẽn na n soog bãmb paoong me. Tõnd na n sooga Wẽnnaam paoongã, la d yaa pʋɩt-n-taas ne Kirisi, a sã n yaa tɩ tõnd lagma ne bãmb n namse, tɩ d tõe n naag bãmb n paam waoogr me.

¹⁸ Sɩdã, mam getame tɩ namsg nins sẽn tar tõnd moasã wã ka tõe n dɩk n mak ne ziir ning sẽn na n puk tõnd yĩng nindaarã ye.

¹⁹ Dẽnda n kɩt tɩ dũni bõn-naandsã fãa gũud Wẽnnaam kambã pukr ne datem kãsenga.

²⁰ Bala, bõn-naandsã kẽe faoolem pʋgẽ. Ka ne b meng yamleoog ye, la yaa ned ning sẽn kẽes-a bãmb be wã yĩnga.

²¹ B be faoolmã pʋgẽ ne tẽeb pidsg gũudum‑kãngã: Bõn-naands kãens na n paama yolsg ne yembdo, la sãoongã, n paam pʋɩɩr ne Wẽnnaam kambã lohorem sẽn be ziirã.

²² Tõnd yaool n miime tɩ hal tɩ ta moasã, bõn-naandsã fãa wẽeda siri, tɩ rogem toog tar-ba.

²³ Sẽn yɩɩda, tõnd mensã sẽn zoe n paam Sɩɩgã reng-n-lɛmbgã, tõnd me wẽeda sir d pʋsẽ, n gũud wakat ning Wẽnnaam sẽn na n deeg tõnd n maan b kambã, la d gũud tɩ b yols tõnd yĩngã n baase.

²⁴ Bala, tõnd paama fãagre, la yaa ne tẽebo. La bũmb ning fo sẽn gũud ne tẽebã sã n yaa bũmb f sẽn ne, ka leb n ya tẽeb yell ye. Fo sã n ne bũmbu, f tõe n leb n tẽe a paoong yɛsa?

²⁵ La tõnd sã n tẽed tɩ d na n paama bũmb nins tõnd sẽn ka ne, tõnd maood n gũud-a lame.

²⁶ Woto me, Sɩɩgã wat n sõngda tõnd d pãn-komsmã pʋgẽ, bala, tõnd ka mi d sẽn segd n kos bũmb nins d pʋʋsg pʋgẽ ye. La Sɩɩgã meng yõkda sɛɛg ne sir ned sẽn ka tõe n togs ye.

²⁷ La soab ning sẽn feesd sũyã mii bũmb ning Sɩɩgã sẽn data. Bãmb yõkda Wẽnnaam sɛɛg nin-sõamyã yĩng wa sẽn zemsd Wẽnnaam daabo.

Tõaagdb hakɩɩka

²⁸ La tõnd miime tɩ bũmb fãa tʋmda ne taab neb nins sẽn nong Wẽnnaamã, b rãmb sẽn paam boolg wa sẽn zems Wẽnnaam yam-yãkrã sõngr yĩnga.

²⁹ Bala, neb nins Wẽnnaam sẽn pĩnd n bãngã, b pĩnd n yãka yam tɩ b na n wẽnega bãmb Bi-riblã, tɩ bãmb Bi-riblã na yɩ bi-rẽeng ba-biis wʋsg sʋka.

³⁰ La neb nins bãmb sẽn pĩnd n tʋlsã, b bool-b lame: La bãmb sẽn bool-b rãmbã, b kɩtame me tɩ b zemse. La neb nins bãmb sẽn kɩt tɩ b zemsã, b waoog-b lame me.

³¹ Dẽ, tõnd na n yeelame tɩ bõe ne yel-kãnga? Wẽnnaam sã n bee ne tõndo, ãnda n tõe n zab ne tõndo?

³² Bãmb sẽn ka bas b meng Bi-riblã tɩ b põse, n dɩk-b n kõ tɩ b kʋ tõnd fãa yĩngã, na n yɩɩ wãn tɩ b ka lagem bũmbã fãa ne bãmb n kõ tõndo, nimbãan-zoeer yĩngã?

³³ Ãnda n na n dõd Wẽnnaam nin-tũusdsã? Yaa Wẽnnaam la sẽn kɩtd tɩ ned lebg tɩrgã.

³⁴ Ãnda n na n kao b bʋʋd n sɩbg-ba? A Zeezi Kiris la sẽn ki-a wã. La sẽn yɩɩda, bãmb vʋʋgame, b bee Wẽnnaam nug-rɩtgo, b yõkda sɛɛg tõnd yĩnga.

³⁵ Bõe n na n welg tõnd ne Kiris nonglmã? yel-pakr bɩ? Sũ-sãang kãseng bɩ? namsgo bɩ? Kom bɩ? bɩ naongo, bɩ Sãoongo, bɩ zabr sʋʋga?

³⁶ Wa b sẽn gʋlsã: B kʋʋda tõnd daarã tõr fo yĩnga. B geta tõnd wa piis b sẽn koota.

³⁷ La bõn-kãens fãa pʋgẽ, tõnd yaa tõaagdb hakɩɩka, sẽn nong-a tõndã maasem yĩnga.

³⁸ Bala, mam sũur keemame tɩ kũum, wall vɩɩm, wall malegse, wall pãn-soaadba, wall bũmb sẽn be moasã, wall bũmb sẽn wata,

³⁹ wall pãense, wall yĩngr nebã, wall tẽngr nebã, wall bõn-naandg a to baa a yembr kõn n welg tõnd ne Wẽnnaam nonglem sẽn be tõnd Zu-soab a Zeezi Kiris pʋgẽ wã ye.