Rom Dãmba 2 - WẼNNAAM SEBRE 2014

Wẽnnaam kaoo bʋʋd tɩrga

¹ Dẽ, fo sẽn yaa ned ning fãa, fo sẽn kaood f taab bʋʋdã, fo kõn paam bũmb n dõd n yi ye. Sɩdã, fo sẽn kaood neb a taabã bʋʋdã, fo rogenda yell f meng zugu. Bala, fo kaooda f taab bʋʋdo, la f yaool n maand wa bãmb bala.

² Sɩd me, tõnd miime tɩ Wẽnnaam bʋ-kaoorã neb nins sẽn maand a woto wã yĩng tũuda sɩda.

³ Fo tẽedame tɩ f sẽn kaood f taab bʋʋdo, n maand wa bãmbã fo na n põsa Wẽnnaam bʋ-kaoorã?

⁴ Bɩ fo ka nand bãmb sõmblmã, la bãmb sũ-bʋgsmã, la bãmb sũ-marã sẽn waoogã, n ka miẽ tɩ Wẽnnaam sõmblmã tusda foom tɩ f tek yam n kos sugri?

⁵ La ne fo sũurã riglingã la f sũurã sẽn ka baood tekrã, fo tigsda sũ-puugr n bĩngd f meng Wẽnnaam sũ-puugrã daar yĩnga, daar ning bãmb bʋ-kaoorã sẽn zemsã sẽn na n pukã,

⁶ bãmb sẽn na n keo ned kam fãa wa sẽn zems a tʋʋmdã:

⁷ neb nins sẽn modgd tɩ maan neere, n baood ziiri, la waoogre, la b baood vɩɩm sẽn kõn sa wã na n paam-a lame,

⁸ la neb nins no-koɛɛm sɩɩg sẽn tar tɩ b kɩɩsd sɩd la b sakd ka-tɩrlmã na n paama Wẽnnaam sũ-yikri la b sũ-puugri.

⁹ Zʋɩf-rãmb pipi tɩ sẽn ka-b Zʋɩf-rãmbã pʋgda. Ned ning fãa sẽn maand wẽngã na n paama yel-pakre, la pelen-yɩgre.

¹⁰ Ned ning fãa sẽn maand neere, na n paama ziiri, waoogre la bãane. Zʋɩf-rãmbã pipi tɩ sẽn ka-b Zʋɩf-rãmbã pʋgda.

¹¹ Bala, Wẽnnaam ka bakd neb ye.

¹² Neb nins fãa sẽn ka bãng tõogã, la sẽn maan yel-wẽnã na sãam me tɩ tõog toor kaẽ ye. La neb nins sẽn paam tõogã la sẽn maan yel-wẽnã, tõogã la b na n ges n kao bãmb bʋʋdo.

¹³ Sɩd me, ka neb nins sẽn kelgd tõogã n zems Wẽnnaam nifẽ ye. La yaa neb nins sẽn sakd tõogã n na n paam zemsgo.

¹⁴ Buud a taabã sẽn ka tar tõogã sã n kell n maand bũmb nins tõogã sẽn yetã, bãmb sẽn ka tar tõogã, bãmb mensã mii b sẽn tog n maane.

¹⁵ B wilgdame tɩ bũmb nins tõogã sẽn datã gʋlsa bãmb sũyã pʋse. Bãmb sũ-bãngrã kɩta rẽnda kaseto, la bãmb tagsgã rõta bãmba wall a zabd n sõngd bãmba.

¹⁶ Daar ning Wẽnnaam sẽn na n kɩt t'a Zeezi Kiris kao nebã tʋʋm-solgdsã bʋʋd wa koe-noog ning mam sẽn moondã sẽn yetã, bõn-kãens na n pukame.

Zʋɩf-rãmbã ne tõogã

¹⁷ Fo boonda f meng tɩ Zʋɩfe, n teegd tõogã, n waoogd f menga, f sẽn yaa wẽn-tũudã yĩngã.

¹⁸ Fo yetame tɩ f mii bãmb daabã, tɩ tõogã sẽn zãms foomã yĩnga, fo mii bũmb ning sẽn yaa sõama la sẽn yaa wẽng n bake.

¹⁹ Fo sẽn yet f meng tɩ f yaa zoens tɛtã, la neb nins sẽn be lik bida pʋgẽ wã vẽenemã,

²⁰ n yaa ka-yam dãmbã zãmsdã, la kamb karen-saambã, yaa tɩ fo tẽedame tɩ f tara bãngr la sɩd sor tõogã pʋgẽ.

²¹ Fo zãmsda neb a taabã, la f ka zãmsd f meng ye.

²² Fo moondame n yetẽ tɩ b ra zu ye, la f yaool n zuuda! Fo yetame tɩ b ra yo ye, la f yaool n yooda! Fo geta wẽnd-naands wa bõn-põosgo, la f yaool n kẽed b rotẽ wã n zuud-ba!

²³ Fo sẽn dɩk tõogã n waoogd f mengã, fo kɩɩsda tõogã n paoogd Wẽnnaam.

²⁴ Bala, buud a taabã neb paoogda Wẽnnaam yʋʋr yãmb yĩnga, wa sẽn be gʋls-sõamyã pʋgẽ wã.

²⁵ Sɩda, bãong yaa bũmb sẽn be yõodo, fo sã n sakda tõogã. La fo sã n kɩɩs tõogã, fo bãongã lebga moonem bala.

²⁶ La sẽn ka kẽ-a bãong sã n sakd bũmb nins sẽn gʋls tõogã pʋgẽ wã, b ka na n ges a moonemã wa bãong kõom sɩda?

²⁷ Sẽn ka tol n kẽ-a bãongã sã n pidsd tõogã sẽn yetã, a kõn kao fo bʋʋdo, fo soab sẽn tar tõogã sebr la bãongã sɩda?

²⁸ Ka ned ning sẽn tar-a Zʋɩf yalẽ wã bal n yaa Zʋɩf ye. La bãongã ka bũmb ning b sẽn ne yĩn-nemdã pʋgẽ wã ye.

²⁹ La Zʋɩf yaa ned ning sẽn yaa-a Zʋɩf a sũur pʋgẽ, la bãong meng yaa sũurẽ dẽnda, sẽn zems Sɩɩgã rẽnda, la ka tõogã rẽnd ye. Zʋɩf‑kãng pẽgr ka yit ninsaalb nengẽ ye, la yaa Wẽnnaam nengẽ.