Rom Dãmba 14 - WẼNNAAM SEBRE 2014

Neb nins sẽn ka pãng tẽeb pʋgẽ

¹ Reeg-y ned ning sẽn ka-a pãng tẽeb pʋgẽ wã sõama, la y ra wẽ no-koeemd ne-a a tagsg wɛɛngẽ ye.

² Nina tẽedame t'a tõe n dɩɩ bũmba fãa. Ned a to sẽn yaa pãn-komsem soab rɩta zẽ-vãad bala.

³ Bɩ ned ning sẽn dɩt-a wã ra paoog sẽn ka rɩt-a wã ye, la bɩ ned ning sẽn ka rɩt-a wã ra bʋ sẽn dɩt-a wã bʋʋd ye. Bala, Wẽnnaam reeg-a-la sõama.

⁴ Fo sẽn kaood f to tʋmtʋmd bʋʋdã, foom la ãnda? A yɛsa yĩngr t'a lʋɩtame, paka a zu-soabã. La a na n yalsa yĩngri, bala, Zu-soabã tara pãn-tõog tɩ tebend-a.

⁵ Nina tagsdame tɩ daar yɩɩda a to. Tɩ ned a to getẽ tɩ b zema taaba. Bɩ ned fãa bãng t'a sẽn tagsdã zemsame.

⁶ Ned ning sẽn tagsd dayã yellã, yaa Zu-soabã yĩng la a tagsd b yelle. Sẽn dɩt-a wã, yaa Zu-soabã yĩng la a rɩta, bala, a pʋʋsda Zu-soabã barka. Sẽn ka rɩt-a wã, yaa Zu-soabã yĩng la a ka rɩta. Yẽnda me pʋʋsda Wẽnnaam barka.

⁷ Sɩd me, tõnd ned baa a yembr ka vɩ a meng yĩng ye, la baa a yembr ka kiid a meng yĩng ye.

⁸ Bala, tõnd sã n vɩya, yaa Zu-soabã yĩng la tõnd vɩ. La tõnd sã n ki, yaa Zu-soabã yĩng la tõnd kiyã. Tɩ tõnd vɩ, tɩ d ya kũum me, tõnd yaa Zu-soabã rẽnda.

⁹ Bala, Kiris kiime n lebg n vʋʋge, tɩ b tõe n yɩ sẽn ki-bã ne sẽn vɩ-bã Zu-soaba.

¹⁰ La yaa bõe tɩ fo yẽ kaood f ba-biig bʋʋdo? Wall yaa bõe yĩng tɩ fo yẽ paoogd f ba-biiga? Tõnd fãa na n yalsa Wẽnnaam bʋʋd geerã taoore.

¹¹ Bala, b gʋlsame tɩ: Zu-soabã yeelame tɩ b vɩɩme, tɩ rũmã fãa na n yĩgimda bãmb taoore, la tɩ zɛlma fãa na n kõo Wẽnnaam waoogre.

¹² Woto tõnd ned kam fãa na n togsa Wẽnnaam a meng yelle.

¹³ Woto yĩnga, bɩ d da leb n kao taab bʋʋd ye. Ayo! Tʋm-y ne y tagsgã n da wa n ning kug-lakdg wall bũmb sẽn tõe n lub neda, y ba-biig taoor ye.

¹⁴ Mam miime, la Zu-soab a Zeezi pʋgẽ, mam mii hakɩɩka, tɩ bũmb ka be n yaa rẽgd a toor ye. La ned sã n tags tɩ bõn-kãngã yaa rẽgdo, dẽ a yaa rẽgd ne yẽnda.

¹⁵ Fo ba-biig sũur sã n sãam fo bõn-dɩtl poorẽ, ad fo ka leb n kẽnd ne nonglem ye. Da sak tɩ f bõn-dɩtl wa ne f ba-biiga, soab ning Kiris sẽn ki a yĩngã sãoong ye.

¹⁶ Bũmb ning sẽn yaa sõama ne yãmbã ka tog n wa ne tẽn-kãnem ye.

¹⁷ Bala, Wẽnnaam soolmã, ka tɩ rɩ wall tɩ yũ ye, la yaa tɩrlem la bãane, la sũ-noogo, Sɩɩg-sõng sẽn kõta.

¹⁸ Ned ning sẽn maand Kiris tʋʋmd a woto tata Wẽnnaam yam, la nebã me wilgdame t'a sẽn maandã zemsame.

¹⁹ Woto yĩnga, bɩ d bao bũmb ning fãa sẽn wat ne laafɩ la ne taab bɩɩsgo.

²⁰ Da sãam Wẽnnaam tʋʋmd rɩɩb yĩng ye. Sɩd-sɩdã, bũmb fãa yaa sõama rɩɩb yĩnga. La ned sã n dɩ-a n lebg kug-lakdg neb yĩnga, a yaa wẽnga.

²¹ Yaa sõama tɩ ra wãb nemdo, wall yũ rãam, wall tɩ bas n da sɩɩs bũmb ning sẽn na n yɩ kug-lakdg f ba-biig yĩnga [n kɩt a lʋɩ wall a maan pãn-komsem.]

²² Tẽeb ning fo sẽn tarã, tall-a f meng yĩng Wẽnnaam taoore. Ned sẽn geend tɩ bũmb ning yaa sõama wã sã n ka kaood a bʋʋdo, sũ-noog soab la yẽnda.

²³ La ned sã n wa sãmbd ne bũmb ning a sẽn dɩta, a bʋʋd zoe n kaoome, bala, ka tẽeb n [kɩt t'a maan a sẽn maandã ye.] La bũmb ning fãa sẽn ka tẽeb n kɩt tɩ f maan yaa yel-wẽnde.