Rom Dãmba 10 - WẼNNAAM SEBRE 2014

Tẽeb gomd sẽn wat ne fãagr

¹ M ba-biisi, mam sũurã raabo, la mam bõosg ne Wẽnnaam b yĩng yaa tɩ b paam fãagre.

² Bala, mam kɩta bãmb kaset n yetẽ tɩ b tara ratem wʋsg Wẽnnaam yĩnga, la b ka tar bãngr ye.

³ Bãmb sẽn zɩ Wẽnnaam tɩrlmã yellã, la b rat n zĩndg b meng tɩrlmã, b ka sak n tũ Wẽnnaam tɩrlmã ye.

⁴ Bala, Kiris yaa tõogã baoosg zĩiga, tɩ ned ning fãa sẽn tẽed na paam tɩrlem.

⁵ Sɩd me, a Moyiis gʋlsa tɩrlem ning tõogã sẽn wat ne wã yell n yeele: Ned sã n maan wa tõogã sẽn yeelã, tõogã na kɩt t'a vɩɩmde.

⁶ La tɩrlem ning tẽeb sẽn wat ne wã yeta a woto: Da tags f sũurẽ tɩ: Ãnda n na n dʋ arzãna? A rʋʋb yaa tɩ sigs Kirisã be.

⁷ Wall ãnda n na n sig bog-zulungã pʋgẽ? A sigb yaa tɩ tak Kiris n yiis kɩɩm-kulgu.

⁸ Sã n yaa a woto, tẽebã yetame tɩ bõe? Gomdã pẽe foom, a bee fo noorẽ la f sũurẽ. Yaool n yaa tẽeb gomdã la tõnd moonda.

⁹ Fo sã n kɩs Zu-soab a Zeezi kaset ne f noore, la fo sã n tẽ f sũurẽ tɩ Wẽnnaam vʋʋga bãmb n yiis kũum sʋka, fo na paam fãagre.

¹⁰ Bala, yaa ned sẽn na n tar tẽeb a sũurẽ la a paamd tɩrlem, la yaa ned sẽn na n kɩs kaset ne a no-goam la a paamd fãagre,

¹¹ wa Wẽnnaam gʋls-sõamyã sẽn yetã: Ned ning fãa sẽn tẽed bãmb kõn paam yãnd ye.

¹² Sɩd me, welgr ka be Zʋɩf ne Gɛrk sʋk ye: B fãa tara Zu-soab a yembr sẽn maand neb nins fãa sẽn boond bãmbã neer wʋsgo.

¹³ Bala, ned ning fãa sẽn na n bool Zu-soabã yʋʋr na n paama fãagre.

Koe-noogã yõodo

¹⁴ La bãmb na n yɩɩ a wãn n bool ned ning b sẽn ka tẽedã yʋʋre? La b na n yɩɩ a wãn n tẽ ned tɩ b ka wʋm tɩ b gomd a yelle? La b na n yɩɩ a wãn n wʋm tɩ b gomd a yelle, koe-moaandb sã n ka beẽ?

¹⁵ La koe-moaandb na n yɩɩ wãn n zĩndi, ned sã n ka tʋm-ba? Wa b sẽn gʋlsã: Neb nins sẽn moond koe-noogã nao tara rasãnde.

¹⁶ La ka nebã fãa n sak koe-noogã ye. Dẽ n kɩt t'a Ezayi yeel yaa: Zu-soaba, ãnda n tẽ tõnd sẽn togsã?

¹⁷ Woto, yaa bũmb ning ned sẽn wʋmdã n wat ne tẽebo, la bũmb ning a sẽn wʋmdã yita Kiris goamã pʋgẽ.

¹⁸ La mam sokdame tɩ b ka wʋm la? B wʋm yã! Bãmb koɛɛg saaga tẽn-tõrã, la bãmb goamã taa dũni tɛk fãa.

¹⁹ La mam sokdame tɩ Israyɛll nebã ka bãng la? A Moyiis n yɩ pipi n yeel yaa: Mam na n kɩtame tɩ neb sẽn ka soolem sũ-kiir yõk yãmba, la mam na n dɩka buud sẽn ka tar yam vẽnegre, n kɩt tɩ yãmb sũyã yiki.

²⁰ La a Ezayi pʋs n paama raood n yeele: Neb nins sẽn dag n ka baood maamã yãnda maam. La mam puka m meng ne neb nins sẽn dag n ka sokd mam yellã.

²¹ La a goma Israyɛll yell n yeele: Daarã tõre, mam tẽega m nusi, n tees neb sẽn yaa kɩɩsdba, la no-koeem-wẽedba.