Malasi 3 - WẼNNAAM SEBRE 2014

¹ Saasẽ-Pãng-Soabã yetame: «Ade, mam tʋmda m koe-toagsdã t'a reng maam taoor n maneg sore. Yẽnda na n wa a roogẽ wã ne lingri. Yaa Zu-soab ning yãmb sẽn baoodã, yaa kaoolã koe-toagsd ning yãmb sẽn datã. A watame.»

² Bãmb waoongã daare, ãnda soab n na n tõog n vɩɩmde, bãmb sã n wa puki, ãndã n na n tõog n yalse? B na n yɩɩ wa boaag bugum, B na n yɩɩ wa fu-pɛgd sẽn pekd fuugu.

³ Yẽnda na n zĩnda wa ned sẽn zĩ n yẽnegd wanzuri n yɩlgd-a. Yẽnda na n yɩlga Leevi yagensã, a na n yɩlga bãmb wa b sẽn yɩlgd sãnem ne wanzuri to-to wã, la bãmb na n yɩɩ neb sẽn tõe n tall kũun n wa Sẽn-Ka-Saab yĩnga, wa sẽn zems tɩrlmã.

⁴ Dẽ, Zʋʋda ne Zeruzalɛm kũunã na n taa Sẽn-Ka-Saab yam wa pĩndã, wa yʋʋm nins sẽn loogã.

⁵ Saasẽ-Pãng-Soabã yetame: «Ade, mam na n wa y nengẽ, n wa kao y bʋʋdo. M na n yika tao-tao n mong nin-bãmbã bʋʋm: yaa bagbã, ne yoaadbã, la neb nins sẽn ka pidsd b pʋlengã, la sẽn zãmbd-b b tʋmtʋmdba, ne pʋg-kõap la kɩɩbse, la b maand sãamb pãnga, n ka zoet maamã.

⁶ Bala, maam a Sẽn-Ka-Saab ka tek ye. La yãmb dãmb sẽn yaa a Zakoob yagense, b ka menes yãmb ye.»

Piig pʋɩɩr ne nonglem kũuni

⁷ Hal sẽn sɩng ne y yaab-rãmbã wakate, yãmb bʋdg n basa mam noyã, yãmb ka sak-b ye. Lebg-y n wa-y mam nengẽ, tɩ mam me lebg n wa yãmb nengẽ. Maam a Saasẽ-Pãng-Soabã n yeele. La yãmb sokdame: «Tõnd tog n maana bõe n lebg n wa?»

⁸ Ad mam sẽn leokd yãmba: «Dẽ yĩnga, ninsaal tog n zuu Wẽnnaam sɩda? Yãmb yaool n zuuda maam, la y sokdẽ: ‹Tõnd zuu yãmb ne bõe?› Yaa piig pʋɩɩrã ne nonglem kũunã pʋg la yãmb zuud maam!

⁹ Ade, kãab-wẽng paamda yãmb buudã tõre, bala, yãmb zuuda maam!»

¹⁰ Ade, Saasẽ-Pãng-Soabã yetame: «Tall-y piig pʋɩɩrã fãa n wa laogã bĩngr doogẽ, tɩ rɩɩb tõe n zĩnd m doogẽ wã. M kotame tɩ y mak maam a woto, la mam na n paka yĩngr kʋɩlemsã y yĩnga, n kɩt tɩ barkã sig yãmb zugu, hal tɩ seke!

¹¹ Mam na n lenga sẽn sãamd-a wã, n gɩdg-a t'a ra sãam y koodã ye. La y reezẽ tɩɩsã ka na n pa n ka wom biis y pʋtẽ wã ye. Maam a Saasẽ-Pãng-Soabã n yeele.

¹² Buud toor-toorã fãa na n yeelame tɩ bark bee yãmb zugu. Bala, yãmb tẽngã na n yɩɩ tẽn-noogo. Maam a Saasẽ-Pãng-Soabã n yeele.»

Sẽn-Ka-Saab tɩrlmã pukri

¹³ Sẽn-Ka-Saab yetame: «Ade, yãmb goma maam gom-kegemse, la y yaool n yeele: ‹Tõnd goma yãmb yell wẽng ne taab a wãn-wãna?›

¹⁴ Yãmb yeelame: ‹Tõnd sẽn sakd Wẽnnaamã yaa zaalem bala. Tõnd sẽn maand bãmb tʋʋmdã, la d kẽnd ne sũ-sãang Saasẽ-Pãng-Soabã yĩngã, nafa tõnd ne bõe?

¹⁵ Moasã, tõnd yetame tɩ tɩtaam dãmbã tara barka, bala, bãmb maanda wẽnga, la ne rẽ fãa, b tɩlgdame. Bãmb makda Wẽnnaam, la b ka paamd sɩbgr ye!»

¹⁶ Dẽ, sẽn zoet-b Sẽn-Ka-Saabã goma ne taaba. Sẽn-Ka-Saab kɩlla b tʋbre, n wʋme. B gʋlsa tẽegr sebr bãmb taoore, n na n tẽegd neb nins sẽn zoet Sẽn-Ka-Saabo, la b waoogd bãmb yʋʋrã yelle.

¹⁷ Maam a Saasẽ-Pãng-Soabã yetame: Bãmb na n yɩɩ mam dẽnda, b na n yɩɩ mam mengã soolem, daar ning mam sẽn segendã yĩnga. Mam na n zoee bãmb nimbãanega, wa ned sẽn zoet a biig sẽn sakd-a nimbãanegã.

¹⁸ Woto, yãmb na n leb n yãnda welgr ning sẽn be nin-tɩrg ne nin-wẽng sʋka, la welgr ning sẽn be sẽn sakd-b Wẽnnaam ne sẽn ka sakd-b Wẽnnaamã sʋka.

¹⁹ Bala, daarã watame, a na n yɩɩ toog daare, wa bugum wʋnga. Tɩtaam dãmbã ne sẽn maand-b wẽngã na n yɩɩ wa moodo. Daarã sẽn watã na n dɩɩ bãmb zãnga, a ka na n tol n bas bãmb yẽgende, tɩ b pa gomd b wilã ye. Maam a Saasẽ-Pãng-Soabã n yeele.

²⁰ La ne yãmb dãmb sẽn zoet mam yʋʋrã, tɩrlem wĩndg na n puka yãmb yĩnga, la a na n waa ne maagre. Yãmb na n yitame n yɩgd n tirsd wa nag-bi sẽn be yãgrẽ.

²¹ Ade, Saasẽ-Pãng-Soabã yetame: «Daar ning mam sẽn segendã daare, yãmb na n taba nin-wẽnsã, bala, bãmb na n yɩɩ wa tompeglem yãmb naoã tẽngre.»

A Eli sẽn na n lebg n wa

²² «Tẽeg-y tõog ning m sẽn dag n kõ m tʋmtʋmd a Moyiisã. Orɛɛb tãngã zugu, mam dag n kõo yẽnda noy la no-tũuds Israyɛll nebã fãa yĩngã.

²³ Mam tʋmda m no-rɛɛs a Eli yãmb nengẽ, tɩ Sẽn-Ka-Saab daarã sẽn yaa ra-kãsenga, la a kẽesd rabeemã nan ka ta ye.

²⁴ Daarã na n kɩtame tɩ ba-rãmb leb n nong b kamba, la a kɩt tɩ kamb leb n nong b ba-rãmba, tɩ m da wa kãab tẽngã wẽng n kɩt t'a sãam ye.»