Malasi 2 - WẼNNAAM SEBRE 2014

Keoogr maan-kʋʋdbã yĩnga

¹ Moasã, ad bũmb ning mam sẽn yet yãmb a maan-kʋʋdbã!

² «Ade, yãmb sã n ka kelge, la y sã n ka yãk yam n kõ mam yʋʋrã waoogre, mam na n tʋma kãab-wẽngã yãmb sʋka, la m kɩt tɩ y barkã lebg kãab-wẽnga. N-yẽe, mam na n kɩtame tɩ y barkã lebg kãab-wẽnga, yãmb sẽn ka kelg m keoogrã yĩnga.» Maam a Saasẽ-Pãng-Soabã n yeele.

³ Yãmb yĩng kɩtame tɩ mam na n leng y yagensã. La m bol y nensã ne y maandã bĩndu, y sẽn kʋ rũms nins n maan y tigã bĩndu. La b na n talla yãmb ne bĩndã n looge.

⁴ Dẽ la yãmb na n bãng tɩ yaa maam n yeel yãmb koe-kãngã, sẽn na n yɩlẽ tɩ kaool ning mam sẽn maan ne Leevi buudã yagensã kell n pa. Maam a Saasẽ-Pãng-Soabã n yeele.

⁵ Mam kaoolã rag n bee ne Leevi buudã, la rag n yaa vɩɩm ne vɩ-bãane. Mam kõo bãmb bõn-kãense, sẽn na n yɩlẽ tɩ b zoe maam, la bãmb sɩd zoee maam. Bãmb zoee mam yʋʋrã rabeem.

⁶ Bãmb noyã rag n togsda sɩd zãmsgã, zãmb rag n ka be bãmb no-bɩmsẽ wã ye. Bãmb dag n kẽnda ne maam, pʋ-peelem la tɩrlem pʋgẽ, n kɩt tɩ neb wʋsg wẽnemd n bas b kongrã.

⁷ Bãngr bee maan-kʋʋdã noorẽ. Bala, yaa yẽnda nengẽ la nebã na n wa sok n bãng tõogã sẽn tog n tũ to-to, a sẽn yaa Saasẽ-Pãng-Soabã no-rɛɛsã yĩnga.

⁸ Ade, Saasẽ-Pãng-Soabã yetame: «La yãmb a maan-kʋʋdbã bʋdg n basa sorã. Yãmb dɩka tõog n kɩt tɩ neb wʋsg kẽ moogo, la y sãama kaool ning mam sẽn dag n maan ne Leevi buudã.

⁹ Mam me na n basame tɩ nebã fãa paoog yãmb la b ning-y yãnde, yãmb sẽn ka sak mam goamã yĩnga, la y sẽn dɩkd tõogã n bakd neb n kaood bʋʋdã yĩnga.»

Zʋʋda nebã sãama kaoolã

¹⁰ Rẽ yĩnga, tõnd fãa ka ba a yembr la? Ka Wẽnnaam a yembr n naan tõnd fãa la? La yaa bõe tɩ d zãmbd taab n sãamd kaool ning Wẽnnaam sẽn maan ne d yaab-rãmbã?

¹¹ Zʋʋda nebã maana zãmbo. Yel-beed la b maan Zeruzalɛm ne Israyɛlle. Bala, Zʋʋda nebã paooga Sẽn-Ka-Saab zĩ-sõngã b sẽn nongã, bãmb sẽn peeg pagb sẽn waoogd wẽn-sãamsã yĩnga.

¹² Ned ning sẽn maand-a woto, Sẽn-Ka-Saab na n menes-a lame, tɩ ned ka be n na n yeel tɩ bũmb ye. B na n yiis-a-la a Zakoob yagensã sʋka, b na n menesa ned ning sẽn wat-a ne kũun n kõt bãmbã. Baa a sã n yaa maan-kʋʋda.

¹³ Ad bũmb a yiibẽ soab yãmb sẽn leb n maandẽ: yãmb madgda Sẽn-Ka-Saab tẽn-kugrã ne y nintãmã, la y yãbrã, ne y wõosgã, Sẽn-Ka-Saab sẽn ka leb n wẽnemded n get y kũunã, la yãmb nusã kũun sẽn ka leb n tat bãmb yamã yĩnga.

¹⁴ La yãmb sokdame: «Bõe yĩng tɩ yaa a woto?» Yaa tɩ Sẽn-Ka-Saab yɩɩ kaset soaba, foom ne pag ning fo sẽn peeg f bi-bɩɩlem wakatã, pag ning fo sẽn zãmbã, baa ne yẽnda sẽn yaa fo zĩid-n-taaga, n yaa pag ning fo sẽn maan kãadem ne wã.

¹⁵ Ned ba a yembr sẽn tar yam zɩ n maan a buud ye. Ned a yembr bal n maan a woto. Bala, yẽnda rag n baood n paama biig ning Wẽnnaam sẽn kãab yẽnda wã. Dẽ wã, gũus-y y mens ne y tagsgã. Bɩ ned da wa zãmb pag ning yãmb sẽn peeg y bi-bɩɩlem wakatã ye.

¹⁶ Bala, Sẽn-Ka-Saab sẽn yaa Israyɛll Wẽnnaamã yetame: «Mam kisa ned sẽn digd a paga, wa mam sẽn kis ned sẽn maand wẽngã. Yaa maam a Sẽn-Ka-Saab sẽn yaa Israyɛll Wẽnnaamã n yeele. Dẽ wã, gũus-y y mens ne y tagsgã, la y ra maan zãmb ye.»

Bʋʋd kaoob daare

¹⁷ Sẽn-Ka-Saab yam yii ne yãmb goamã, la yãmb sokdame: «D maana bõe tɩ b yam yi-du?» Yãmb yetame tɩ ned ning fãa sẽn maand wẽng tata Sẽn-Ka-Saab yam. La y leb n yetẽ tɩ yaa ned a woto buud n noogd bãmb sũuri! Wall y sokdẽ: «Wẽnnaam ning sẽn kaood bʋʋdã bee yɛɛnẽ?»