Malasi 1 - WẼNNAAM SEBRE 2014

Sẽn-Ka-Saab nonga Israyɛll nebã

¹ Ad sɩbgr koɛɛg Sẽn-Ka-Saab sẽn tũnug a Malasɩ n gom ne Israyɛll nebã.

² Sẽn-Ka-Saab yeelame yaa: «Mam nonga yãmba.» La yãmb yetame: «Bõe n wilgd tɩ y nonga tõndo?» «A Ezayu dag n ka a Zakoob ba-biig sɩda? Ne rẽ fãa, mam nonga a Zakoobe. Maam a Sẽn-Ka-Saab n yeele.

³ Mam yaool n kisga a Ezayu. Mam kɩtame t'a tãmsã lebg zĩ-vɩɩdo, n kɩt t'a soolmã lebg we-baasã sẽn be we-raoogẽ wã zĩiga.»

⁴ Maam a Saasẽ-Pãng-Soabã yetame: Edom nebã sã n yeele: ‹B sãama tõnd tẽngã, la tõnd na n leb n me d raboodã.› B rat bɩ b lebs n me-a, tɩ m na n leb n wã-a lame! B na n boola tẽngã tɩ wẽng maaneg soolem, b na n bool-a lame tɩ buud Sẽn-Ka-Saab sũurã sẽn puud ne wakat fãa wã.

⁵ Yãmb nin na n yãnda bõn-kãense, la yãmb mens na n yeelame tɩ Sẽn-Ka-Saab yaa kãsenga, hal baa sẽn gãndg Israyɛll todsã!

Maan-kʋʋdbã kongre

⁶ Saasẽ-Pãng-Soabã yetame: «Biig waoogda a ba, tɩ yamb waoogd a Zu-soabã. Sã n yaa tɩ mam yaa yãmb Ba, waoogr ning b sẽn tog n waoog maamã bee yɛɛnẽ? La sã n yaa tɩ mam yaa yãmb Zu-soaba, zoees ning yãmb sẽn tog n zoe maamã bee yɛɛnẽ? Yãmb a maan-kʋʋdbã paoogda mam yʋʋrã, n yaool n sokdẽ: ‹Tõnd maana bõe n paoog yãmb yʋʋrã?›

⁷ Ade, yãmb tallda rɩ-rẽgd n wat m tẽn-kugrã zugu. La y yaool n sokdẽ: ‹Tõnd maana bõe n dẽgem yãmba?› Yaa yãmb sẽn yeel tɩ Sẽn-Ka-Saab tẽn-kugrã yaa bõn-zaalgã.

⁸ Yãmb sẽn talld rũng sẽn yaa zoang n wat n na n maan maoongã, ka bõn-wẽng sɩda? Yãmb sẽn talld rũng sẽn yaa woabg bɩ bãad n wat tẽn-kugrẽ wã, ka bõn-wẽng sɩda? Mam kotame tɩ y rɩk rũng a woto buud n tɩ kõ y tẽngã gʋvɛrneer n gese, a sũur na yɩ noog ne yãmba? Yãmb tẽedame t'a na n deeg-y-la sõama sɩda? Maam a Saasẽ-Pãng-Soab n yeele.

⁹ Moasã, mam kot-y lame tɩ y maan y sẽn tõe n sigs Wẽnnaam sũurã, tɩ b tõe n zoe tõnd nimbãanega! Bala, yellã yita yãmb nengẽ. Bãmb na n deeg-y-la sõama sɩda? Maam a Saasẽ-Pãng-Soabã n yeele.

¹⁰ Ãnda n be yãmb sʋkã, n na n pag Wẽnd doogã kʋɩlemse, tɩ yãmb ra leb n yõgen bugmã mam tẽn-kugrã zug zaalem? Mam sũur ka noom ne yãmba, la y kũunã me ka tat mam yam ye. Maam a Saasẽ-Pãng-Soabã n yeele.

¹¹ Bala, sẽn sɩng yaang n tãag nin-taoore, mam yʋʋrã yaa kãseng buud toor-toorã fãa sʋka. B yita zĩig zãng n wat n yõogd wisd mam yʋʋrã yĩnga, la b wat ne kũun sẽn yaa yɩlemde. Bala, mam yʋʋrã yaa kãseng buud toor-toorã fãa sʋka. Maam a Saasẽ-Pãng-Soabã n yeele.

¹² La yãmba, yãmb paoogda maam n yetẽ: ‹Zu-soabã tẽn-kugrã yaa rẽgdo, la a sẽn wat ne rɩɩb ningã yaa bõn-zaalga.›

¹³ La yãmb yetame tɩ y namsda y mens zaalem, la y maand y toog kae ne maam. Maam a Saasẽ-Pãng-Soabã n yeele. Yãmb sẽn talld rũms nins n wat n kõt maamã yaool n yaa wagdem dũmsi, rũm-wobse, wall rũms sẽn yaa bãad-rãmba. Kũun a woto buud la yãmb talld n wat n kõt maam! Mam na reeg yãmb nusã kũun-kãngã sɩda? Maam a Saasẽ-Pãng-Soabã n yeele.

¹⁴ Kãab-wẽng bee zãmb soab zugu, yẽnda sẽn tar pe-raoog sẽn yaa sõama a rũms sʋka, n yaool n dɩk rũng sẽn tar zang n maan maoong n na n pids a pʋleng ne Zu-soabã yĩnga. Bala, maam a Saasẽ-Pãng-Soabã yetame: ‹Mam yaa rĩm-kãsenga, la mam yʋʋrã seka zoees buud toor-toorã sʋka.› »