Maan‑kʋʋre 8 - WẼNNAAM SEBRE 2014

B welga a Aarõ ne a kom-dibli wã toore

¹ Sẽn-Ka-Saab goma ne a Moyiis n yeel-a yaa:

² «Peeg a Aarõ ne a kom-dibli wã, la f rɩk fut ne kaam ning b sẽn pʋdgd maan-kʋʋdbã zutã, ne loalg sẽn na n maan maoong yel-wẽnã sugr yĩnga, la f wa ne pe-raad a yiibu, ne bur sẽn ka ning rã-bɩll peoogo.

³ La f tigim Israyɛll nebã fãa sɛk roogã noore.»

⁴ A Moyiis maana wa Sẽn-Ka-Saab sẽn yeel yẽnda wã. La nebã wa n tigma taab sɛk roogã noore.

⁵ A Moyiis yeela nebã yaa: «Sẽn-Ka-Saab sẽn yeel tɩ d maan bũmb ningã la woto.»

⁶ A Moyiis kɩtame t'a Aarõ ne a kom-dibli wã kolge, la yẽnda kɩtame tɩ b so bãmb koom.

⁷ La a rɩka fuugã n yeelg a Aarõ, la a rɩk sẽbdg n sẽbg a Aarõ sɛɛgã. A Moyiis yeelg-a-la fu-wokã, la a ning-a yãoog lilldgã, la a naag-a n loe ne yãoog lilldgã sẽbdg a poorẽ wã.

⁸ B rɩka yãoog lilldg n ning-a, la b rɩk Urimã ne Tumimã n ning pʋgẽ.

⁹ A Moyiis leb n dɩka rĩ-tɛɛgã n vil a Aarõ zugã, n yaool n dɩk maan-kʋʋr bãndã sẽn maan ne sãnemã n ning a rĩirẽ wã n naage, wa Sẽn-Ka-Saab sẽn dag n yeel a Moyiis t'a maan to-to wã.

¹⁰ Rẽ poore, a Moyiis rɩka bark ningr kaamã n ning sɛk roogã, ne bũmb nins fãa sẽn dag n be a pʋgẽ wã n welg-b toore.

¹¹ A Moyiis rɩka kaamã n mes tẽn-kugrã naoor a yopoe, la a mes tẽn-kugrã ne a teedã fãa, la ne yɩlg-m-meng laagã ne a rogendsã.

¹² A Moyiis rɩka bark ningr kaamã n sudg a Aarõ zug n na n welg-a toore.

¹³ A Moyiis kɩtame t'a Aarõ ne a kom-dibli wã kolge, la a yeelg-b-la b futã, n sẽbg-b ne sẽbdse, la a fõgen bãmb pugli wa Sẽn-Ka-Saab sẽn dag n yeel a Moyiisã.

¹⁴ A Moyiis kɩtame tɩ b kolg ne loalg ning b sẽn na n maan maoong yel-wẽnã yĩngã. Dẽ, a Aarõ ne a kom-dibli wã rɩka b nus n palg loalg ning sẽn na n maan maoong yel-wẽnã yĩngã zugã.

¹⁵ A Moyiis kodga loalgã, n dɩk a zɩɩmã, n tẽk ne nug-bil n ning tẽn-kugrã kũnã zĩigẽ, n gilg tẽn-kugrã n yɩlg-a. A Moyiis rɩka zɩɩmã n walg tẽn-kugrã kɩremsã n yɩlg-a.

¹⁶ La a Moyiis rɩka pʋ-teedã kaamã zãnga, ne sãoorã kaamã, ne yiim a yiibã ne b kaamã, n yõog bugum tẽn-kugrã zugu.

¹⁷ La b rɩka loalgã gãongã, a nemdã ne a bĩndã n yiis sik zĩigã yɩng n yõog bugum, wa Sẽn-Ka-Saab sẽn dag n yeel a Moyiisã.

¹⁸ La a Moyiis kɩtame tɩ b wa ne maoong sẽn yõogd bugmã pe-raoogã. A Aarõ ne a kom-dibli wã rɩka b nus n tik pe-raoogã zugu.

¹⁹ Dẽ, a Moyiis kodga pe-raoogã, n dɩk a zɩɩmã n daag n gilg tẽn-kugrã kɩremsã.

²⁰ A Moyiis pasa pe-raoogã, n dɩk a zugã ne a nem-võyã la a kaamã n yõog bugum.

²¹ A Moyiis peka pe-raoogã pʋ-teedã ne a karsã ne koom, la a rɩk pe-raoogã tõr n yõog bugum tẽn-kugrã zugu. Rẽndã yɩɩ maoong sẽn yõogd bugum, t'a yũugã yaa noog Sẽn-Ka-Saab yĩnga, tɩ yɩ wa Sẽn-Ka-Saab sẽn dag n yeel a Moyiisã.

²² A Moyiis waa ne pe-raoog a to wã. Pe-rao-kãng yaa maan-kʋʋr tʋʋmd sɩngr maoong peosgo. A Aarõ ne a kom-dibli wã rɩka b nus n palg pe-raoogã zugu.

²³ A Moyiis kodga pe-raoogã, n yãk a zɩɩmã n tẽgs a Aarõ rɩtg tʋb-kɩrgã, ne a rɩtg nug-raoogã, ne a rɩtg nao-raoogã.

²⁴ Dẽ, a Moyiis kɩtame t'a Aarõ kom-dibli wã kolge, la yẽnda rɩka zɩɩmã n tẽgs b rɩtg tʋb-kɩrsã, ne b rɩtg nug-raadã, la b rɩtg nao-raadã. La a Moyiis rɩka zɩɩmã sẽn kellã n daag n gilg tẽn-kugrã kɩremsã fãa.

²⁵ A Moyiis yãka kaamã, ne zʋʋrã, ne kaam ning sẽn gãneg pʋ-teedã zutã, ne kaam ning sẽn be sãoorã zugã ne yiim a yiibã ne b kaamã, n paas ne rɩtg gerã.

²⁶ A Moyiis gesa bur sẽn ka ning rã-bɩllã peoogã sẽn dɩg Sẽn-Ka-Saab taoorã pʋga, n yãk boaal-boaal sẽn ka ning rã-bɩlle, ne bur sẽn nag ne kaam, la samsa. La a rɩk-b lame n dogl rũngã kaamã ne rɩtg gerã zugu.

²⁷ La a Moyiis rɩka rẽ fãa n ning a Aarõ ne a kom-dibli wã nusẽ, n kɩt tɩ b yuum-a Sẽn-Ka-Saab taoore, tɩ yɩ kũuni.

²⁸ Dẽ poore, a Moyiis reega kũun-kãens bãmb nengẽ n yõog bugum tẽn-kugrã zugu, n naag maoong sẽn yõogd bugmã. Yaa rẽndã n yaa maan-kʋʋr tʋʋmd sɩngr maoongo. Woto yaa maoong sẽn yõogd bugum t'a yũug yaa noog Sẽn-Ka-Saab yĩnga.

²⁹ A Moyiis rɩka pe-raoogã yãoog n yuum Sẽn-Ka-Saab taoore. Rẽnda n yɩ a Moyiis pʋɩɩr wa Sẽn-Ka-Saab sẽn dag n yeel yẽnda wã.

³⁰ A Moyiis rɩka bark ningr kaamã ne zɩɩmã sẽn dag n be tẽn-kugrã zugã n mes a Aarõ ne a futã, la a mes a kom-dibli wã me ne b futã. Woto, yẽnda welga a Aarõ ne futã, la a kom-dibli wã me ne b futã toore, b tʋʋmdã yĩnga.

³¹ Dẽ, a Moyiis yeela a Aarõ ne a kambã yaa: «Kɩt-y tɩ b rʋg nemdã sɛk roogã noore, la yaa beenẽ la yãmb tog n wãb nemdã, ne bur ning sẽn be peoogã pʋgã, wa mam sẽn dag n yeel yãmb tɩ yaa a Aarõ ne a kom-dibli wã n tog n dɩ-a wã.

³² La yãmb tog n dɩka nemdã ne burã sẽn kellã n yõog bugum.

³³ La yãmb na n paa sɛk roogã noor rasem a yopoe, hal tɩ yãmb yãkrã rasem wa sɛ. Bala, yaa rasem a yopoe n tog n yɩ yãkrã yĩnga.

³⁴ Bũmb ning sẽn maand rũndã wã, yaa Sẽn-Ka-Saab n yeel tɩ b maan-a yãmb yɩlgr yĩnga.

³⁵ Dẽ wã, yãmb na n paa sɛk roogã noor rasem a yopoe. La yʋng ne wĩndga, yãmb tog n maana wa Sẽn-Ka-Saab sẽn yeelã, sẽn na n yɩl tɩ yãmb da ki ye. Bala, Sẽn-Ka-Saab dag n yeela maam woto.»

³⁶ A Aarõ ne a kom-dibli wã maana bũmbã fãa wa Sẽn-Ka-Saab sẽn kɩt t'a Moyiis togs bãmbã.