Maan‑kʋʋre 7 - WẼNNAAM SEBRE 2014

Yel-manegr maoongo

¹ Ad beegr maoong tõogo: Yõwã yaa bũmb sẽn yaa sõama zãng fasɩ.

² B tog n kodga beegr maoong rũngã zĩig ning b sẽn maand maoong sẽn yõogd bugmã. La bɩ maan-kʋʋdã rɩk maoongã zɩɩmã n daag n gilg tẽn-kugrã.

³ La bɩ b rɩk kaamã fãa ne zʋʋrã, la kaam ning sẽn be pʋ-teedã zutã zãng n kõ Sẽn-Ka-Saabo.

⁴ Sẽn leb n paas yaa yiim a yiibã ne b kaamã, ne zʋ-kɛɛgã kaam, la kaam ning sẽn pɛ gɛyã sʋkã, ne kaam ning sẽn be sãoorã ne yiimã zutã.

⁵ La bɩ maan-kʋʋdã rɩk bõn-kãng n yõog bugum tẽn-kugrã zugu. Rẽndã yaa maoong sẽn yõogd bugum Sẽn-Ka-Saab yĩnga. Woto yaa yel-manegr maoongo.

⁶ Yaa maan-kʋʋdbã buud neb nins sẽn yaa raopã bal n tar noor tɩ rɩ maoon-kãngã nemdã. B tog n dɩ-a-la zĩig sẽn welg toor pʋga, bala, a yaa bũmb sẽn welg toor zãng fasɩ.

⁷ Yel-manegr maoongã tõod ne yel-wẽnã sugr kosg maoongã tõod fãa yaa bũmb a yembre. Rũng ning b sẽn maan maoongã yaa maan-kʋʋd ning sẽn maan-a paasg maoongã n so.

⁸ Ned sã n tall rũng n wa tɩ b maan maoong sẽn yõogd bugum, yaa maan-kʋʋd ning sẽn maan-a maoongã n tog n soog rũngã gãongo.

⁹ Bõn-koaadl kũun ning fãa b sẽn na n wʋm wʋng pʋgẽ, bɩ b rʋg rʋkẽ, wall b kɩɩm laagẽ, fãa tog n yɩɩ maan-kʋʋd ning sẽn maan-a tʋʋmdã n so.

¹⁰ La kũun ning fãa sẽn nag ne kaam wall sẽn nag koɛɛnga, na n yɩɩ a Aarõ kom-dibli wã rẽnda, la b tog n pʋɩ-a lame tɩ zems taaba.

¹¹ Ad zems-n-taar maoong sẽn kõt Sẽn-ka-Saabã tõod sẽn yaa to-to:

¹² Ned sã n wa ne zems-n-taar maoong sẽn yaa bark pʋʋsg maoongo, maoongã tog n naaga ne boaal-boaal sẽn nag ne kaam n ka ning rã-bɩlle, la a wa ne bur-maas sẽn nag ne kaam n yaool n ka ning rã-bɩlle, la a wa ne maas sẽn maan ne zom-bãaneg sẽn kalem ne kaam.

¹³ La b tog n waa ne bur sẽn ning rã-bɩlle, n naag bark pʋʋsg maoongã sẽn yaa zems-n-taar maoongã.

¹⁴ La bɩ b yãk-yãk kũunã buud toor-toorã n wilg Sẽn-Ka-Saabo. Bõn-kãens na n yɩɩ maan-kʋʋd ning sẽn maan-a zems-n-taar maoongã, la a yãk zɩɩmã n mesã pʋɩɩre.

¹⁵ La b tog n dɩɩ bark pʋʋsg maoongã sẽn yaa zesm-n-taar maoongã rũngã nemd maoongã kʋʋb daare, n da bas-a t'a kell n vẽeg beoog ye.

¹⁶ La sã n mikame tɩ ned maoong n yaa pʋleng pidsg maoongo, wall yamleoog maoongo, b tog n dɩɩ maoongã nemd maoongã daare, la a sã n kelle, b tõe n dɩ-a-la a vẽkembeoogo.

¹⁷ La maoongã nemdã sã n kell n ta rayɩtẽ-daare, b tog n yõog-a-la bugum.

¹⁸ La ned sã n baas n wãb a zems-n-taar maoong nemdo, maoongã yɩ tɩ rabɩtẽ, Sẽn-Ka-Saab ka na n deeg a maoongã ye. La b ka na n geelg yẽnda maoongã ye, la a soabã rẽgma a menga. La ned ning sẽn wãb-a maoongã nemdã rogenda yell a meng zugu.

¹⁹ La nemdã sã n sɩɩs bõn-dẽgdo, bɩ b ra leb n wãb-a ye. B tog n yõog-a-la bugum. La yaa ned ning sẽn yaa yɩlemd bal n tõe n wãb zems-n-taar maoongã nemdo.

²⁰ La ned sã n yaa rẽgdo, n yaool n dɩ zems-n-taar maoong ning b sẽn maan n kõ Sẽn-Ka-Saabã nemdo, bɩ b yiis-a a buudã sʋka.

²¹ La ned ning sẽn na n sɩɩs-a bũmb sẽn yaa rẽgdo, sã n yaa nin-saan-dẽgdo, wall rũm-dẽgdo, wall sẽn yaa rẽgd ning fãa sẽn yaa kisgu, la a yaool n dɩ zems-n-taar maoongã b sẽn maan n kõ Sẽn-Ka-Saabã nemdo, bɩ b yiis nin-kãng a buudã sʋka.

²² Sẽn-Ka-Saab goma ne a Moyiis n yeele:

²³ «Yeel Israyɛll nebã yaa: ‹Yãmb ka tog n dɩ naaf kaam, peosg kaam ne bʋʋg kaam ye.

²⁴ Rũng sã ki a toore, wall sã n yaa we-rũng n wãb-a t'a ki, yãmb tõe n dɩka a kaamã n maan bũmb a to, la y ka tog n dɩ-a ye.

²⁵ Rũng ning fãa b sẽn kʋ tɩ yɩ maoong sẽn yõogd bugum Sẽn-Ka-Saab yĩnga, ned ka tog n dɩ a kaamã ye. La ned sã n kɩɩs n dɩ-a, bɩ b yiis a soabã a buudẽ.

²⁶ Yãmb sẽn be zĩig ning fãa, y ka tog n dɩ zɩɩm ye. Sã n yaa liuula wall yaa rũng a to zɩɩm.

²⁷ Ned ning fãa sẽn na n dɩ zɩɩm, bɩ b yiis a soabã a buudã sʋka.»

²⁸ Sẽn-Ka-Saab goma ne a Moyiis n yeel-a yaa:

²⁹ «Yeel Israyɛll nebã yaa: ‹Ned ning fãa sẽn na n maan-a zems-n-taar maoong n kõ Sẽn-Ka-Saabo, bɩ a yãk Sẽn-Ka-Saab pʋɩɩr n wa kɩse.

³⁰ Yaa yẽnda meng a toor n tog n tall maoongã nem-kaam n wa kɩs tɩ b yõog bugum Sẽn-Ka-Saab taoore. La a tog n naaga ne yãoogã n wa ne, la b tog n deega yãoogã n yuum Sẽn-Ka-Saab taoore, tɩ yɩ kũuni.

³¹ Dẽ, maan-kʋʋdã reegda nem-kaamã n yõog bugum tẽn-kugrã zugu, la yãoogã na n yɩɩ a Aarõ ne a kom-dibli wã rẽnda.

³² Yãmb sã n maan y zems-n-taar maoongã, bɩ y yãk rũngã rɩtg gerã n paas maan-kʋʋdã.

³³ Rũngã rɩtg gerã na n yɩɩ a Aarõ bi-ribl ning sẽn dɩk-a zɩɩmã ne kaamã n kõ Sẽn-Ka-Saabã pʋɩɩre.

³⁴ Bala, mam yãka Israyɛll nebã zems-n-taar maoongã rũng yãoogã sẽn yuumdã, ne a rɩtg gerã n kõ maan-kʋʋd a Aarõ ne a kom-dibli wã, la na n yɩɩ no-tũudg sẽn ka sɛta. Bãmb tog n deega bõn-kãng Israyɛll nebã nengẽ.

³⁵ Yaa bõn-kãng n na n yɩ a Aarõ ne a kom-dibli wã pʋɩɩre, maoong sẽn yõogd bugum Sẽn-Ka-Saab taoorã zugu. La yaa sẽn sɩng ne daar ning bãmb sẽn lebg maan-kʋʋdb n sɩng b maan-kʋʋr tʋʋmd Sẽn-Ka-Saab yĩngã.› »

³⁶ Sẽn-Ka-Saab kõo Israyɛll nebã tõ-kãngã, n yeel tɩ b kõ a Aarõ ne a kom-dibli wã bõn-kãnga, sẽn sɩng daar ning b sẽn sudg bãmb zut kaam n welg-b toor tʋʋmdã yĩngã. La yõwã na n yɩɩ no-tũudg sẽn ka sɛta, bãmb ne b yagensã yĩnga, zamaan woo zamaane.

³⁷ Woto yaa maoong sẽn yõogd bugum tõogo, la kũun maoongo, ne yel-wẽnã maoongo, la beegr maoongo, la b sẽn na n sudg maan-kʋʋdbã zut kaam b tʋʋmdã sɩngr yĩng maoongo, la zems-n-taar maoongo.

³⁸ Yaa tõ-kãensã la Sẽn-Ka-Saab sẽn dag n kõ a Moyiis Sinayi tãngã zugã, daar ning b sẽn yeel Israyɛll nebã tɩ b maan maoong Sẽn-Ka-Saab yĩng Sinayi weoogã pʋgã.