Maan‑kʋʋre 6 - WẼNNAAM SEBRE 2014

¹ Sẽn-Ka-Saab yeela a Moyiis yaa:

² «Yeel a Aarõ ne a kambã a woto: ‹Ad tõog ning sẽn kẽed ne maoong sẽn yõogd bugmã wɛɛngẽ wã. Maoongã tog n kell n paa tẽn-kugrã bug-toaalg zug yʋngã tõre, hal tɩ tãag yibeoogo, la tẽn-kugrã bugum tog n kell n wita beenẽ.

³ Maan-kʋʋdã tog n yeelga a fuug ning sẽn wʋg ne gĩs-bãanegã, la a sẽgen gĩs-bãaneg põge. La bɩ a yãk bugmã sẽn dɩ maoongã tompeglem tẽn-kugrã zugã, n dʋʋg-a tẽn-kugrã sɛɛga.

⁴ Rẽ poore, bɩ a yees a futã, la a ning fut a taaba, n dɩk tompeglmã n yi sik zĩigã pʋg n kẽng zĩig sẽn welg toor pʋga.

⁵ La bugmã tog n kell n wita tẽn-kugrã zugu, la a ka tog n ki ye. Yibeoog fãa, maan-kʋʋdã tog n yõgna raado, la a rɩk maoongã n dogl zugẽ, la a yõog laafɩ maoongã kaam.

⁶ Bugmã tog n wita wakat fãa tẽn-kugrã zugu, la a ka tog n ki ye.

⁷ Ad tõog ning sẽn kẽed ne bõn-koaadl kũunã wɛɛngẽ wã la woto. A Aarõ kamb n tog n maan maoon-kãng Sẽn-Ka-Saab taoore, n tees tẽn-kugrã nen-taoore.

⁸ Bɩ maan-kʋʋdã yõng bõn-koaadl kũun zom-bãanegã, ne kaamã, la ne wisdã b sẽn naag kũunã, n dɩk bõn-kãng n yõog bugum tẽn-kugrã zug tẽegr yĩnga, tɩ yɩ yũ-noog Sẽn-Ka-Saab yĩnga.

⁹ Bɩ a Aarõ ne a kom-dibli wã rɩ sẽn kellã. La b tog n dɩ-a lame n ka ning rã-bɩll ye. La yaa zĩ-sõngã sẽn yaa sɛk roogã samandã pʋg la b tog n dɩ-a.

¹⁰ B ka tog n ning zomã rã-bɩll n yaool n dʋg-a ye. Bala, maand ning sẽn yõogd bugum mam yĩnga pʋga, rẽndã yaa pʋɩɩr mam sẽn kõ bãmba. Bõn-kãng na n yɩɩ bũmb sẽn welg toore. A na n yɩɩ wa kongr maoongã ne beegr maoongã sẽn yaa to-to wã.

¹¹ A Aarõ kambã sẽn ya-b kom-dibli wã tõe n dɩɩ rɩ-kãnga. Yõwã yaa no-tũudg sẽn ka sɛta sẽn kẽed ne maoong sẽn yõogd bugum Sẽn-Ka-Saab yĩngã wɛɛngẽ, yãmb zamaan-dãmbã fãa yĩnga. La bũmb ning fãa sẽn na n sɩɩs-a na n welga toore.»

¹² Sẽn-Ka-Saab goma ne a Moyiis n yeele:

¹³ «Daar ning b sẽn na n sudg a Aarõ ne a kambã zut kaamã, ad kũun ning bãmb sẽn na n kõ Sẽn-Ka-Saabo: ‹B tog n waa ne zom-bãaneg wamde, tɩ yɩ kũun wakat fãa yĩnga, la b welg zom wamdã a yiib n wa ne pʋɩ-sʋkã yibeoogo, la a wa ne pʋɩ-sʋk a to wã zaabre.

¹⁴ B tog n naga zomã ne kaam n kɩɩm-a ne rʋko. La bɩ f rɩk-a n kalem taab n wes-a n kõ tɩ yɩ kũun b sẽn kɩɩme, t'a yũugã yaa noog Sẽn-Ka-Saab yĩnga.

¹⁵ A Aarõ biig ning sẽn paam kaam sudgr n lebg maan-kʋʋd n na n deeg a ba wã zĩigã tog n kõo kũun-kãnga. Yaa no-tũudg sẽn ka sɛta Sẽn-Ka-Saab yĩnga. B tog n yõoga maoon-kãng bugum zãnga.

¹⁶ Maan-kʋʋd fãa kũun tog n yõoga bugum zãnga, la b ka tog n dɩk-a n dɩ ye.»

¹⁷ Sẽn-Ka-Saab goma ne a Moyiis n yeele:

¹⁸ «Yeel a Aarõ ne a kambã yaa: ‹Ad yel-wẽnã maoong tõog sẽn yaa to-to. Yaa zĩig ning b sẽn maand maoongã la b na n kodg rũngã b sẽn kõ yel-wẽnã yĩngã Sẽn-Ka-Saab taoore. Yõwã yaa bũmb sẽn welg toor zãnga.

¹⁹ Maan-kʋʋd ning sẽn na n kodg-a rũngã yel-wẽnã yĩngã tõe n dɩ-a lame. B tog n dɩ-a-la zĩig sẽn welg toorã pʋga, yaa sɛk roogã samandẽ.

²⁰ Bũmb ning fãa sẽn na n sɩɩs-a maoongã nemd na n lebga bũmb sẽn welg toore. La a zɩɩmã sã n yɩk n tosg fuugu, bɩ f pek-a zĩig sẽn welg toorã pʋga, zĩig ning zɩɩmã sẽn yi wã.

²¹ B tog n wãaga tãnd dʋk ning b sẽn tall n kɩɩm nemdã. Sã n mikame tɩ yaa zũud rʋk la b tall n dʋg-a, bɩ y ru rʋkã, la y waaga ne koom.

²² La maan-kʋʋd fãa sẽn yaa rao tõe n dɩ-a lame. Yõwã yaa bũmb sẽn yaa sõama zãng fasɩ.

²³ La b sã n maan maoong yel-wẽnã yĩnga, n yãk a zɩɩmã n tall n wa ne sɛk roogẽ wã n maan sugr kosg zĩ-sõngã pʋga, bɩ b ra rɩ-a ye. B tog n yõog-a-la bugum.»