Maan‑kʋʋre 5 - WẼNNAAM SEBRE 2014

¹ Ned tʋbr sã n wʋm yelle, wall a nif sã n yãnd tɩ ned n maan yelle, la yẽnda sã n wʋm tɩ b kotame tɩ b wa kɩs yellã kaseto, t'a ka kẽng n tɩ kɩs kasetã, yẽnda maana yel-wẽnde.

² Sã n mikame tɩ ned n sɩɩs bũmb sẽn yaa rẽgdo, rat n yeel tɩ rũm-rẽgd sẽn yaa kɩɩnga, sã n yaa we-rũnga, wall yir dũnga, baa sã n yaa ne yĩdgu, a soabã lebga rẽgdo, la a ninga yell a meng zugu.

³ Ned sã n sɩɩs ninsaal sẽn yaa rẽgdo, n dẽgem a meng n ka bãnge, n yaool n wa bãng tɩ yẽnda sɩɩsa kũum, a ninga yell a meng zugu.

⁴ Ned sã n gom kʋʋsem goam n ka gũus a menga, n wẽen n yeel tɩ yẽnda na n maana wẽnga, bɩ a na n maana sẽn yaa sõama, n yaool n wa bãng yẽnda sẽn maanã, gom-kãens yell na n zĩnda yẽnda zugu.

⁵ Dẽ wã, ned sã n kong ne yɛl nins b sẽn wilgã yell a yembre, a tog n kosa a kongrã sugri,

⁶ la yẽnda tog n talla rũm-sãd-bãooneg n wa kõ Sẽn-Ka-Saabo. Yaa pe-sãdga, bɩ bʋ-sãdg la a wat ne tɩ b maan maoong a kongrã sugr kũun yĩnga.

⁷ Yẽnda sã n ka tar pãn-tõog n tõe n da rũngã, bɩ a tall wal a yiibu, wall manwan-bi a yiib n wa Sẽn-Ka-Saab taoor n wa maan maoong a kongrã yĩnga. A yembr n tog n yɩ yẽnda kongrã sugr kũun yĩnga, la a to wã yaa maoong sẽn yõogd bugum.

⁸ Yẽnda tog n talla bãmb n kẽng maan-kʋʋdã nengẽ, t'a reng n dɩk kongrã sugr kũun dẽndã n kodg-a ne nug-yẽega, la a ka tog n fiuug a zugã ye.

⁹ Maan-kʋʋdã tog n yãka kongr maoongã zɩɩm n mes tẽn-kugrã kɩrenga, la a rɩk zɩɩm ning sẽn kellã n daag tẽn-kugrã sɛɛga. Woto yaa kongr sugr kosg maoongo.

¹⁰ Dẽ poore, maan-kʋʋdã tog n dɩka sẽn ket-a wã, n maan wa sẽn zems miningã, la a rɩk-a n maan maoong sẽn yõogd bugum, a soabã kongrã yĩnga, la a na n paama a kongrã sugri.

¹¹ Ned ning sẽn beegã sã n ka tar pãn-tõog n na n da wal a yiibã, bɩ man-wal a yiibã, bɩ a wa ne zom-bãaneg sẽn zems wamd a yembre, tɩ yɩ kũun a kongrã yĩnga. La a ka tog n ning zomã kaam bɩ tɩdar ye. Bala, yaa kongr maoong yĩnga.

¹² Yẽnda tog n talla zomã n wa kɩs maan-kʋʋdã, tɩ maan-kʋʋdã yõng zomã n pid a nugu, tẽegr yĩnga, la a rɩk-a n yõog bugum tẽn-kugrã zugu. A tog n naag-a-la ne maand a taabã b sẽn yõogd bugum Sẽn-Ka-Saab yĩngã. Rẽndã yaa kongr maoongo.

¹³ Yaa woto la maan-kʋʋdã tog n maan tɩ yɩ sugr kosg yẽnda kongrã yĩnga, t'a paam sugri. La zom ning sẽn kellã na n yɩɩ maan-kʋʋdã rẽnda, bala yaa bõn-koaadl kũuni.

Beegr maoong noyã

¹⁴ Sẽn-Ka-Saab goma ne a Moyiis n yeele:

¹⁵ «Ned sã n beege, baa beegrã sã n yaa yĩdgu, a sã n yãk bũmb ning sẽn welg toor Sẽn-Ka-Saab yĩngã, ad bũmb ning yẽnda sẽn tog n tall n wa Sẽn-Ka-Saab taoor a beegrã yĩnga: Yaa pe-raoog sẽn ka tar zang a sẽn yãk a rũm-bãoonegã sʋka, la pe-raoog ning sẽn na n yɩ maoong beegrã yĩngã ligd tog n zemsa ne yaood ning b sẽn zĩnig sɛk roogã pʋgẽ wã.

¹⁶ La yẽnda tog n yaoo bũmb ning sẽn welg toor Zu-soabã yĩng tɩ yẽnda rɩkã, la a tog n dogla yaoodã sẽn pʋɩ zĩis a nu pʋɩɩr a yembre, n dɩk-a n kɩs maan-kʋʋdã. La bɩ maan-kʋʋdã rɩk pe-raoogã n maan paasg maoong a beegrã yĩnga, la a na n paama sugri.

¹⁷ Ned sã n maan bũmb sẽn ka zemse, n kɩɩs Sẽn-Ka-Saab tõogã, baa sã n yaa ne yĩdgu, yẽnda na n yɩɩ bɛɛgda, la yellã bee a meng zugu.

¹⁸ Yẽnda tog n talla pe-raoog sẽn ka tar zang n wa ne maan-kʋʋdã nengẽ, la tog n yaa rũng sẽn zems yaood ning b sẽn yãkã. La maan-kʋʋdã na n deega pe-raoogã n maan maoong yẽnda sẽn beeg ne yĩdgã yĩnga, la yẽnda na n paama a beegrã sugri.

¹⁹ Maoon-kãng yaa beegr maoongo, bala, nedã sẽn dag n maanã yaa beegr meng-meng a sẽn beeg Sẽn-Ka-Saabo.»

²⁰ Sẽn-Ka-Saab goma ne a Moyiis n yeel-a yaa:

²¹ «Ned sã n maan yel-wẽnd n beeg Sẽn-Ka-Saabo, n yag zĩrẽ ne a ba-biig bũmb a sẽn bĩng a nengẽ wɛɛngẽ, wall bũmb a sẽn gãneg ne-a wɛɛngẽ, bɩ bũmb a sẽn zuk wɛɛngẽ, wall a sẽn maan zãmb n deeg a to bũmbu,

²² sã n ka rẽ bɩ a yãnda bũmb sẽn menem n dɩk n yaool n wẽendẽ tɩ yaa yẽnda rẽnda, wall a wẽen n yeel tɩ yẽnda ka maan beegr nins b sẽn sõdgã baa a yembre,

²³ a sã n maan a woto, a maana yel-wẽnd n beege. Dẽ, yẽnda na n lebsa bũmb ning yẽnda sẽn dag n zukã, wall a sẽn dag n maan pãng n deegã zãnga, wall b sẽn dag n gũnug yẽnda ne bũmb ningã.

²⁴ Wall sã n yaa bũmb a to yẽnda sẽn maan kaset-zĩrẽ n deege, yẽnda na n lebs-a-la zãnga, la a paas bũmbã sẽn pʋɩ zĩis a nu pʋɩɩr a yembre, n dɩk-a n kɩs bũmbã soaba. La tog n yɩɩ daar ninga yẽnda sẽn na n maan a beegrã maoongã.

²⁵ Rẽ zugẽ, bɩ a tall pe-raoog sẽn ka tar zang n wa kɩs maan-kʋʋdã, yẽnda sẽn beeg Sẽn-Ka-Saabã yĩnga. La a tog n baoo pe-raoogo, t'a ligdã zems wa beegr maoong rũng ligd b sẽn tog n kõ maan-kʋʋdã.

²⁶ La bɩ maan-kʋʋdã maan sugr kosg tʋʋmd Sẽn-Ka-Saab taoore, la yẽnda na n paama a beegrã sugri, baa sẽn dag n yaa yell ning la yẽnda maan yã.»