Maan‑kʋʋre 27 - WẼNNAAM SEBRE 2014

Pʋleng tõodo

¹ Sẽn-Ka-Saab yeela a Moyiis yaa:

² «Yeel Israyɛll nebã yaa: ‹Ned sã n pʋlem Sẽn-Ka-Saab n yeel t'a na n kõo ninsaala, bɩ a yao ligd sẽn zems b sẽn wilgã.

³ Sã n yaa rao sẽn zems yʋʋm pisi tɩ ta yʋʋm pis-yoob yaoodo, bɩ f geelg sẽn zems wanzuri wakɩ-koeems pis-nu n yao, wa sẽn zems sɛk roogã bõn-makdgã.

⁴ La sã n yaa paga, bɩ f geelg sẽn zems wanzuri wakɩ-koeems pis-tã n yao.

⁵ Yẽnda sẽn dɩk a soab n pʋlmã sã n yaa ned sẽn zems yʋʋm a nu tɩ ta yʋʋm pisi, bɩ f geelg sẽn zems wanzuri wakɩ-koeems pisi bi-ribl yĩnga, la wanzuri wakɩ-koeems piiga, bi-pugl yĩnga.

⁶ La a soabã sã n zemsa kiuug a yembre, n tɩ ta yʋʋm a nu, bɩ f geelg sẽn zems wanzuri wakɩ-koeems a nu, bi-ribl yĩnga, la wanzuri wakɩ-koeems a tãabo, bi-pugl yĩnga.

⁷ La sã n yaa ned sẽn tar yʋʋm pis-yoobe, bɩ sẽn yɩɩd woto, bɩ f geelg sẽn zems wanzuri wakɩ-koeems piig la a nu rao yĩnga, la wanzuri wakɩ-koeems piiga, pag yĩnga.

⁸ La sã n mikame tɩ ned ning sẽn maan-a pʋlengã yaa naong soab wʋsg n ka tar n na n yao wa sẽn zems gɛɛlã, bɩ b tall-a n kẽng maan-kʋʋdã nengẽ, la bɩ maan-kʋʋdã geelg n zems sẽn maan-a pʋlengã sẽn tõe n yao.

⁹ La sã n yaa rũng sẽn zems b sẽn tõe n dɩk n maan maoong n kõ Sẽn-Ka-Saabo, dẽ, b sẽn pʋlem rũng ningã fãa na n kell n yɩɩ Sẽn-Ka-Saab rẽnda.

¹⁰ B ka tog n tek rũngã, la b ka tog n dɩk rũm-sõngã n tek ne rũng sẽn ka sõama ye. B ka tõe n dɩk rũng sẽn ka sõama n tek ne rũm-sõng ye. B sã n dɩk rũng n tek ne a to, rũms a yiibã fãa na n lebga Sẽn-Ka-Saab rẽnda.

¹¹ La sã n mikame tɩ rũngã yaa rũm-dẽgdo, tɩ b ka tõe n dɩk-a n maan maoong n kõ Sẽn-Ka-Saabo, baa sẽn yaa rũng ninga, bɩ a tall rũngã n kẽng maan-kʋʋdã nengẽ.

¹² La bɩ maan-kʋʋdã ges rũngã n wilg a sã n yaa rũm-sõng bɩ a ka rũm-sõngo, la a saag a ligdã, la maan-kʋʋdã sẽn yeel ligd ningã la b tog n yao.

¹³ La b sã n dat n leb n yao n deeg rũngã, bɩ b rogl yaoodã sẽn pʋɩ zĩis a nu pʋɩɩr a yembre, yaoodã zugu.

¹⁴ Ned sã n dɩk a roog n kõ Sẽn-Ka-Saabo, bɩ maan-kʋʋdã ges roogã n bãng a sã n yaa sõama wall ka sõama, n wilg a ligdã wa sẽn zems a sẽn yaa to-to wã, la roogã soab na n yaoo wa maan-kʋʋdã sẽn yeel bũmb ningã.

¹⁵ La roogã soab sã n dat n leb n yao n deeg a roogã, bɩ a rogl roogã ligd sẽn pʋɩ zĩis a nu pʋɩɩr a yembre, yaoodã zugu. Dẽ, roogã na n leb n lebga yẽnda rẽnda.

¹⁶ Ned sã n dɩk a pʋʋg n kõ Sẽn-Ka-Saabo, bɩ f geelg t'a ligdã zems wa pʋʋgã kood waooglem sẽn yaa bũmb ningã. Kood konkong piig a la a nii la bɛk ligd segd n zemsa wanzuri wakɩ-koeems pis-nu.

¹⁷ Sã n yaa sẽn sɩng ne kɩdeng yʋʋmdã la yẽnda rɩk a pʋʋgã n kõ Sẽn-Ka-Saabo, bɩ a yao wa sẽn zems fo sẽn geelg to-to wã.

¹⁸ La sã n mikame tɩ yaa kɩdeng yʋʋmdã poor la a rɩk a pʋʋgã n kõ, bɩ maan-kʋʋdã geelg ligdã tɩ zems yʋʋm sõor ning sẽn ket tɩ kɩdeng yʋʋmdã yaool n ta wã, n boog-a tɩ zems fo sẽn geelg n wilgã.

¹⁹ Ned ning sẽn dɩk-a a pʋʋgã n kõ wã sã n dat n yao n leb n deeg a pʋʋgã, bɩ a rogl pʋʋgã yaood sẽn pʋɩ zĩis a nu pʋɩɩr a yembr yaoodã zugu, la pʋʋgã na n kell n yɩɩ yẽnda rẽnda.

²⁰ La yẽnda sã n ka yao n deeg a pʋʋgã, tɩ b rɩk-a n koos ne ned a to, b ka leb n tõe n yao n deeg-a ye.

²¹ Ned ning sẽn dag n da-a pʋʋgã sã n bas tɩ kɩdeng yʋʋmdã ta, pʋ-kãng na n lebga Sẽn-Ka-Saab rẽnda, n yaa pʋʋg sẽn welg toore. Yaa maan-kʋʋdã n so pʋ-kãnga.

²² La ned sã n da pʋʋgo, n dɩk-a n kõ Sẽn-Ka-Saabo, tɩ yaool n ka yẽnda meng pʋʋgo,

²³ bɩ maan-kʋʋdã geelg yʋʋm sõor ning sẽn ket tɩ kɩdeng yʋʋmdã ta wã, n wilg a sẽn geelã ligdi, n kɩt tɩ sẽn dɩk-a pʋʋgã n kõ wã yao. La yaa badaar bal la a tog n yao. Bala, lebga Sẽn-Ka-Saab rẽnda.

²⁴ La kɩdeng yʋʋmdã sã n ta, bɩ b rɩk pʋʋgã n leb n lebs ned ning sẽn dag n koos-a wã. Bala, dag n yaa yẽnda pʋʋgo.

²⁵ Gɛɛl buudã fãa tog n zemsa ne sɛk roogã magdgã. Wanzuri koɛɛng a yembr yaa wakɩy piiga.

²⁶ Ned ka tõe n dɩk a rũng bi-rẽeng n kõ Sẽn-Ka-Saabo, sã n yaa naafo wall pesgo, wall bʋʋg ye. Bala, bi-rẽeng fãa zoe n yaa Sẽn-Ka-Saab rẽnda.

²⁷ La sã n mikame tɩ yaa rũm-dẽgd bi-rẽenga, a soabã tõe n yaoo n deeg-a lame. La a tog n dogla rũngã yaood sẽn pʋɩ zĩis a nu yaood ning maan-kʋʋdã sẽn wilgã zugu. La a sã n ka tõog n yao n deeg-a, bɩ maan-kʋʋdã koos-a wa sẽn zems yaood ning yẽnda sẽn wilgã.

²⁸ Bũmb ning fãa ned sẽn na n dɩk n kõ Sẽn-Ka-Saabo, b sẽn dɩk n kõ tɩ lebg Sẽn-Ka-Saab rẽnda, b ka tõe n koos-a wall b yao n deeg-a, baa sẽn yaa bũmb ning fãa. Sã n yaa ninsaala, rũnga wall pʋʋg sẽn yaa yẽnda soolem.

²⁹ La b sã n dɩk ninsaal n kõ Sẽn-Ka-Saabo, b ka tõe n yao n deeg-a ye. B tog n kʋ a soabã.

³⁰ Bũmb sẽn be me, b tog n yãka tẽn-gãongã bõn-koaadl biis piig pʋɩɩr n kõ Sẽn-Ka-Saabo. Sã n yaa bũmb ning b sẽn bʋt tẽn-gãongã zugu, wall tɩɩsã biisi, yaa Sẽn-Ka-Saab rẽndã. Bõn-kãng yaa bũmb sẽn welg toor Sẽn-Ka-Saab yĩnga.

³¹ Ned sã n dat n lebg n deeg a piig pʋɩɩrã bɛk n da, bɩ a soabã rogl yaoodã sẽn pʋɩ zĩis a nu pʋɩɩr a yembre.

³² La sẽn kẽed ne rũmsã piig pʋɩɩre, sã n yaa rũm-bãooneg wall rũm-bɛda, piig fãa pʋgẽ, a yembr yaa Sẽn-Ka-Saab n so. Yẽnda tog n tẽega rasaare, tɩ rũmsã fãa pɩʋʋgd rasaarã tẽngr n loogdẽ. La piigẽ soabã, a ningd-a-la bãnd t'a lebg Sẽn-Ka-Saab rẽnda.

³³ La wakat-kãnga, rũmsã soab ka tog n tũusi, sã n yaa rũm-sõng bɩ rũm-dẽgd ye. Yẽnda sã n dɩk rũng a to n tek ne a to, bãmb b yiibã fãa na n lebga Sẽn-Ka-Saab rẽnda, la a ka leb n tõe n yao n deeg ba a yembr ye.»

³⁴ Woto yaa tõod nins Sẽn-Ka-Saab sẽn dag n kõ a Moyiis Sinayi tãngã zug t'a kõ Israyɛll nebã.