Maan‑kʋʋre 26 - WẼNNAAM SEBRE 2014

Sakr sẽn wat ne barka

¹ Ra maan-y wẽn-naands ye. Ra maan-y bõn-naands n kõ y mense, wall y vigl kug bɩ raad y tẽngã pʋga, n wõgemd n waoog-b ye. Bala, mam yaa Sẽn-Ka-Saab sẽn yaa yãmb Wẽnnaam.

² Bɩ y sak mam vʋʋsg rayã, la y waoog mam sɛk roogã. Mam yaa Sẽn-Ka-Saabo.

³ Yãmb sã n sak mam noyã, la y sak mam tõodã n maan wa b sẽn yeelã,

⁴ mam na n kɩtame tɩ saag ni yãmb wa sẽn zems a wakate, la y koodã na n womame, la tɩɩsã sẽn be weoogẽ wã na n woma biisi.

⁵ La yãmb na n pãba kood hal tɩ ta tɩɩs wobr wakate, la y na n woba tɩɩs hal tɩ ta bʋdb wakate. Yãmb na n paama rɩɩb tɩ sek yãmba, la y na n zĩnda y tẽngã pʋg ne bãane.

⁶ Mam na n kɩtame tɩ vɩ-bãan zĩnd y tẽngã pʋga, la yãmb na n gãandame n gũs tɩ ned ka kẽes yãmb dabeem ye. Mam na n kɩtame tɩ we-rũm-wẽnsã menem n bas yãmb tẽngã. La zabr kõn tol n zĩnd yãmb tẽngẽ wã ye.

⁷ Yãmb na n diga y bɛɛbã, n kɛ-b ne sʋʋs n kʋ.

⁸ Yãmb neb a nu na n diga bãmb neb koabga, la yãmb neb koabg na n diga bãmb neb tus-piiga. La yãmb na n tõoga y bɛɛbã ne zabr sʋʋga.

⁹ Mam na n wẽnemd n gesa yãmb yelle, la m na n kɩtame tɩ y paam dogem, la m kɩt tɩ y lebg wʋsgo, la mam na n vigla m kaoolã ne yãmba.

¹⁰ Yãmb na n dɩɩ ka-kʋdgo, la y na n vaaga y ka-kʋdgã n yiis la y lebs ka-paalg n sui.

¹¹ Mam na n tilga m yir yãmb sʋka, la mam ka na n kisg yãmb ye.

¹² Mam na n kẽna yãmb sʋka, n kell n yɩ yãmb Wẽnnaam, tɩ yãmb yɩ mam nebã.

¹³ Mam yaa Sẽn-Ka-Saab sẽn yaa yãmb Wẽnnaam sẽn yiis yãmb Ezɩpt tẽngã, tɩ yãmb kõn leb n yɩ bãmb yembs ye. Mam kaoo yãmb balgrã ra-tuiidsã, n kɩt tɩ yãmb kẽn ne zu-zẽkre.

Kɩɩsg sẽn wat ne sɩbgre

¹⁴ La yãmb sã n ka kelg maam, la y sã n ka sak mam tõodã,

¹⁵ la y sã n kɩɩs mam noyã, la y kisg mam koeesã, la y sã n ka n sak mam tõodã fãa, la y sã n sãamd mam kaoolã,

¹⁶ ad mam sẽn na n maan yãmb bũmb ninga: Mam na n kɩtame tɩ y namse, yãmb na n bẽeme n faag ne yĩn-wɩngre, la a na n kɩtame tɩ y nina pãng booge, tɩ y sũyã sãame. Yãmb na n namsa y meng n bʋd y koodã zaalem. Bala, yaa yãmb bɛɛbã n na n dɩ-a.

¹⁷ Mam na n wẽnemda m neng n bas yãmba, la yãmb bɛɛbã na n tõoga yãmba. Neb nins sẽn kis yãmbã na n sooga yãmba, la yãmb na n zoeeme tɩ ned ka rigd yãmb ye.

¹⁸ La baa ne rẽ fãa tɩ yãmb sã n kell n ka kelg maam, mam na n sɩbga yãmb naoor a yopoe n yɩɩda, y yel-wẽnã yĩnga.

¹⁹ Mam na n kɩtame tɩ y sẽn tar pãng n wɩkdẽ wã sɛ, la m kɩt tɩ saagã lebg wa kutu, tɩ y tẽn-gãongã lebg wa zũudu.

²⁰ Yãmb na n tʋmame tɩ y pãng sɛ zaalem. Yãmb tẽn-gãongã ka na n sak kood ye, la tẽngã tɩɩsã ka na n wom biis ye.

²¹ Yãmb sã n kɩɩs maam, n ka sak n kelg maam, mam na n sɩbg yãmb naoor a yopoe n yɩɩda, wa sẽn zems y yel-wẽnã.

²² Mam na n tʋma we-rũms tɩ b wa zab ne yãmba, n kʋ yãmb kambã, la b kʋ y rũmsã, la b kɩt tɩ y sõorã lebg bilfu. La yãmb soayã na n lebga vɩɩdo.

²³ La baa ne woto fãa, tɩ yãmb sã n ka sak tɩ mam dems yãmba, la yãmb sã n kɩɩs maam,

²⁴ mam me na n basa yãmba, la yãmb yel-wẽnã yĩnga, mam na n sɩbga yãmb naoor a yopoe n yɩɩda.

²⁵ Mam na n kɩtame tɩ b wa zab ne yãmb ne sũ-dokr zabr sʋʋga, n dok kaoolã sũuri. Yãmb sã n zoe n tɩ tigim y tẽmsã pʋse, mam na n tʋma bã-loangdg yãmb sʋka, la m bas tɩ y bɛɛbã tõog-yã.

²⁶ Mam na n kɩtame tɩ kom kẽ yãmba, la pagb piig na n moee sag-rʋg-yɛng pʋga, la b na n talla rɩɩb bilf bal n wa kõ yãmba, la yãmb na n dɩɩme, la y ka na n tɩg ye.

²⁷ Woto fãa pʋgẽ, tɩ yãmb sã n kell n ka kelg maam, la y ka sak maam,

²⁸ mam me na n basa yãmb ne sũ-puugri, la yãmb yel-wẽnã yĩnga, mam na n sɩbga yãmb naoor a yopoe n yɩɩda.

²⁹ Yãmb na n wãba y kom-dibli ne y kom-pugli nemdo.

³⁰ Mam na n sãama yãmb maoong kʋʋb zĩisã, la m wã y wisd tẽn-kugã, la m wʋk y kũumã n dʋʋg wẽn-naan-kɩɩmsã zutu, la mam na n kisga yãmba.

³¹ Mam na n kɩtame tɩ yãmb tẽmsã lebg raboodo, la mam na n sãeega y pʋʋsgã zĩisi, la m ka na n leb n kok-y maandã yũ-noogã ye.

³² Yaa mam mengã n na n sãam tẽngã, la yãmb bɛɛbã sẽn na n wa zĩnd beenẽ wã na n yɛɛsame.

³³ Mam na n sãeega yãmb n kẽes buud a taabã sʋka, n kɩt tɩ b rig yãmb ne zabr sʋʋga. Yãmb soolmã na n wãame, tɩ y tẽmsã lebg raboodo.

³⁴ Dẽ, wakat ning fãa yãmb sẽn zĩnd sãang pʋga, n be y bɛɛbã soolmẽ wã, yãmb tẽngã na n vʋʋsame. Vʋʋs-kãng yaa sẽn na n lebs vʋʋsg yʋʋmã sẽn ka tõog n yɩ wã.

³⁵ Wakat ning fãa tẽngã sẽn lebg vɩʋʋgã, a na n vʋʋsame n lebs vʋʋsg yʋʋm nins a sẽn dag n ka paam n vʋʋs wakat ning yãmb sẽn wa n ket a pʋgẽ wã.

³⁶ La yãmb neb nins sẽn na n kell n vɩɩmd b bɛɛbã tẽngẽ wã, mam na n kɩtame tɩ rabeem yõk-ba, la tɩɩg vão-koɛɛng bʋrg na n diga bãmba. Bãmb na n zoee wa b sẽn digd ned ne sʋʋga, la b na n lags n lʋɩɩme tɩ ned ka rigd-b ye.

³⁷ Bãmb na n kanda taab n lʋɩt taab zutu, wa b sẽn digd ned ne zabr sʋʋga, tɩ ned yaool n ka rigd-b ye. Yãmb ka na n tõog n yals n zab ne y bɛɛbã ye.

³⁸ La yãmb na n kii bu-zẽmsã sʋka, la yãmb bɛɛbã tẽng n na n dɩ yãmba.

³⁹ La yãmb sʋkã neb nins sẽn na n põsã na n kii yãmb bɛɛbã tẽng pʋga, bãmb kongrã, ne b ba-rãmbã kongr yĩnga.

⁴⁰ La nin-bãmb vẽneg n togsa bãmb kongrã, ne b ba-rãmbã kongr b sẽn maan n beeg maamã, la kɩɩsg ning bãmb sẽn kɩɩs maamã.

⁴¹ Yaa rẽ tɩ mam me bas-b n tall-b n tɩ kẽes b bɛɛbã tẽngẽ. Woto, bãmb kɩɩsgã yĩnga, b na n paama paoogre, n deeg b kongrã yaood sẽn yaa sɩbgre.

⁴² La mam na n leb n tẽega mam sẽn maan kaool ning ne a Zakoobã, la a Izakã, la ne a Abrahaamã yelle, la m tẽeg b tẽngã yelle.

⁴³ La bãmb sẽn yi n bas tẽngã yĩnga, tẽngã na n vʋʋsame, a sẽn lebg vɩʋʋgã yĩnga. Bãmb na n paama b kongrã sɩbgre. Bala, bãmb kɩɩsa mam tõodã, la b kisga mam noyã.

⁴⁴ La bãmb sẽn wat n be b bɛɛbã tẽngẽ wã wakate, mam ka na n bas-ba, la m ka na n kisg-b hal n sãam-b zãng ye. La m ka na n sãam kaoolã sẽn be maam ne bãmb sʋkã ye. Bala, mam yaa Sẽn-Ka-Saab sẽn yaa bãmb Wẽnnaam.

⁴⁵ Mam na n leb n tẽega pipi kaoolã yelle. Yaa kaool ning mam sẽn maan n yiis bãmb Ezɩpt tẽngã tɩ buud a taabã yãndã, la m lebg bãmb Wẽnnaamã. Mam yaa Sẽn-Ka-Saabo.

⁴⁶ Ad yaa bõn-kãensã n yaa no-tũuds ninsi, ne noy ninsi, la tõod nins Sẽn-Ka-Saab sẽn vigl bãmb ne Israyɛll nebã sʋkã. Bãmb tũnuga a Moyiis n togs bõn-kãens Sinayi tãngã zugu.