Maan‑kʋʋre 23 - WẼNNAAM SEBRE 2014

Israyɛll nebã tiga

¹ Sẽn-Ka-Saab yeela a Moyiis yaa:

² «Yeel Israyɛll nebã yaa: ‹Yãmb sã n na n maan tig-bɛdã Sẽn-Ka-Saab yĩnga, bɩ y maan-b tɩ b yɩ tigind sẽn welg toore. Ad mam tig-bɛdã la woto.

³ Yãmb tõe n tʋma rasem a yoobe, la rasem a yopoe wã daar na n welga toor n yɩ vʋʋsg daare, la yãmb ka tog n tʋm ye. Dẽ, yãmb sẽn na n zĩnd zĩig ninga fãa, a na n yɩɩ vʋʋsg daar Sẽn-Ka-Saab yĩnga.

⁴ Ad Sẽn-Ka-Saab tig-bɛda: Yaa yãmb sẽn na n tigim taab Sẽn-Ka-Saab taoore, wa sẽn zems wakat ning yãmb sẽn yãkã.

⁵ Pipi kiuugã rasem piig la a naasã daar zaabre, yãmb na n maana Pak tigr Sẽn-Ka-Saab waoogr yĩnga.

⁶ La kiuugã rasem piig la a yoobã daare, maan-y bur sẽn ka rã-bɩll tigr n waoog Sẽn-Ka-Saabo. Rɩ-y bur sẽn ka rã-bɩllã tigr rasem a yopoe tõre.

⁷ Bɩ y maan tiging sẽn welg toor tigrã pipi daarã, la y ra tʋm tʋʋmd ba a yembr ye.

⁸ Rasem a yopoe wã fãa pʋga, bɩ y wa ne kũun b sẽn yõogd bugum Sẽn-Ka-Saab yĩnga. La rasem a yopoe wã daare, maan-y tiging sẽn welg toore, la y ka tog n tʋm badaar ye.› »

⁹ Sẽn-Ka-Saab yeela a Moyiis yaa:

¹⁰ «Yeel Israyɛll nebã yaa: ‹Yãmb sã n tɩ kẽ tẽng ning mam sẽn kõ yãmbã pʋgẽ, n na n tigs y bõn-koaadlã, bɩ y yãk y koodã dẽenem biis ka-gĩn n wa kõ maan-kʋʋdã.

¹¹ La bɩ maan-kʋʋdã reeg-a n yuum Sẽn-Ka-Saab taoor tɩ yɩ kũuni, tɩ bãmb tõe n deeg yãmb kũunã. Yaa vʋʋsg daarã vẽkembeoog la maan-kʋʋdã tog n yuum kũunã.

¹² La yãmb sẽn na n yuum kũunã daare, bɩ y bao pe-ribl sẽn zems yʋʋmde, n ka tar zanga, n maan maoong sẽn yõogd bugum n kõ Sẽn-Ka-Saabo.

¹³ La sẽn paase, yaa bõn-koaadl kũuni, la tog n yɩɩ zom-bãaneg wamde, sẽn nag ne kaam tɩ yɩ kũun sẽn yõogd bugum t'a yaa yũ-noog Sẽn-Ka-Saab yĩnga, n leb n paas reezẽ rãam litr a yembr la pʋɩ-sʋka.

¹⁴ Yãmb ka tog n wãb buri, wall ka-sãrdɩ, bɩ ka-paala, hal tɩ ta daar ning yãmb sẽn na n yãk-a n kõ y Wẽnnaamã. Bõn-kãng yaa no-tũudg sẽn ka sɛta, yãmb yagensã fãa yĩnga, la y sẽn na n tɩ zĩnd zĩig ning fãa, wakat sẽn kõn sa yĩnga.

¹⁵ Sẽn sɩng ne vʋʋsg dãarã vẽkembeoogo, daar ning yãmb sẽn na n tall ka-gĩnã n wa tɩ b yuuma, bɩ y sõd rasem pis-naas la a wɛ.

¹⁶ Bɩ y sõd rasem pis-nu sẽn yaa vʋʋsg daarã rasem a yopoeẽ soabã vẽkembeoogã, tɩ ra-kãng me yɩ tigr Sẽn-Ka-Saab yĩnga, n wa ne ka-paalg tɩ yɩ kũuni.

¹⁷ Yãmb sã n yit y zagsã pʋse, bɩ y zã bur a yiib sẽn na n kõ tɩ b yuume. Bur-kãens tog n yɩɩ bur sẽn maan ne zom-bãaneg sẽn ning rã-bɩll n kɩɩme. Rẽndã na n yɩɩ dẽenem biis kũun Sẽn-Ka-Saab yĩnga.

¹⁸ Bũmb ning sẽn tog n paas burã, yaa tɩ yãmb tog n maana maoong sẽn yõogd bugum Sẽn-Ka-Saab yĩnga, ne pe-ribli a yopoe sẽn zems yʋʋmde, n ka tar zanga, ne lol-polle, la pe-raad a yiibu, n paas ne bãmb bõn-koaadl kũunã ne kũun ning b sẽn yõogd bugum t'a yũug yaa noog Sẽn-Ka-Saab yĩngã.

¹⁹ Yãmb tog n kʋʋ boɛɛg yel-wẽnã sugr kũun yĩnga, la y maan zems-n-taar maoong ne pe-ribli a yiib sẽn zems yʋʋmde.

²⁰ Bɩ maan-kʋʋdã reeg-b n yuum Sẽn-Ka-Saab taoor tɩ yɩ kũuni, n paas ne dẽenem biisã bur n kõ n naag ne pe-ribli a yiibã. Bɩ b rɩk-b n kõ Sẽn-Ka-Saabo, la bõn-kãens na n yɩɩ maan-kʋʋdã rẽnda.

²¹ Badaar bala, bɩ y maan tigr Sẽn-Ka-Saab waoogr yĩnga. Ra-kãng na n yɩɩ daar sẽn welg toore. Bɩ y ra maan tʋʋmd ba a yembr badaar ye. Yõwã na n yɩɩ no-tũudg sẽn ka sɛta, yãmb yagensã fãa yĩnga, la zĩig ning fãa yãmb sẽn na n tɩ zĩndẽ.

²² Yãmb sã n wa n na n tigs y tẽngã koodã, bɩ y bas y pʋʋgã kɩreng n da tigs ye. La y ra wʋk bũmb ning sẽn kell tɩ b tõe n yiisã ye. Bɩ y bas rẽndã tɩ nimbãan-nebã ne sãambã paame. Bala, mam yaa Sẽn-Ka-Saab sẽn yaa yãmb Wẽnnaam.› »

²³ Sẽn-Ka-Saab yeela a Moyiis yaa:

²⁴ «Yeel Israyɛll nebã yaa: ‹Kiuug a yopoe soabã pipi daarã na n yɩɩ vʋʋsg yãmb yĩnga. Bɩ y tigim taab n tẽegd a yelle. Yaa tigr sẽn welg toore.

²⁵ Badaare, bɩ y ra maan tʋʋmd ye. Maan-y maoong sẽn yõogd bugum n kõ Sẽn-Ka-Saabo.»

²⁶ Sẽn-Ka-Saab yeela a Moyiis yaa:

²⁷ «Kiuug a yopoe soabã rasem piigã daare, na n yɩɩ yel-wẽnã sugr kosg daare. La yãmb tog n maana tiging sẽn welg toore, n loe noore, la y maan maoong sẽn yõogd bugum n kõ Sẽn-Ka-Saabo.

²⁸ Badaare, yãmb ka tog n tʋm tʋʋmd ye. Bala, yaa yel-wẽnã sugr kosg daare. Dẽ, yãmb tog n maana bõn-kãng n yɩlg y meng Sẽn-Ka-Saab sẽn yaa yãmb Wẽnnaamã taoore.

²⁹ Ned ning fãa sẽn ka sika a meng badaare, b na n yiisa a soabã a nebã sʋka.

³⁰ Ned ning sẽn na n tʋma tʋʋmd badaare, mam na n kɩtame tɩ b sãam a soabã a buudã sʋka.

³¹ Yãmb ka tog n tʋm tʋʋmd badaar ye. Yõwã yaa no-tũudg sẽn ka sɛta, yãmb yagensã yĩnga, zamaan woo zamaane, la yãmb sẽn na n tɩ zĩnd zĩig ning fãa yĩnga.

³² Badaar na n yɩɩ vʋʋsg daar yãmb yĩnga, yãmb sẽn tog n vʋʋse. La yãmb tog n loee noore. La sẽn sɩng ki-kãng rasem a wɛ wã daar zaabre, maan-y vʋʋsg daarã tigr n tɩ tãag vẽkembeoogã zaabr ning sẽn pʋgdã.»

³³ Sẽn-Ka-Saab yeela a Moyiis yaa:

³⁴ Yeel Israyɛll nebã yaa: ‹Kiuug a yopoe soabã rasem piig la a nu daarã, bɩ y maan zãn tigri. La a na n yɩɩ rasem a yopoe tigri, Sẽn-Ka-Saab waoogr yĩnga.

³⁵ Tigrã pipi daarã na n yɩɩ tigin-kãseng sẽn welg toor daare. Bɩ y ra tʋm tʋʋmd badaar ye.

³⁶ Bɩ y rɩk rasem a yopoe tõre, n wa ne kũun b sẽn yõogd bugum n wa kõ Sẽn-Ka-Saabo. La a rasem a niiẽ wã daare, bɩ y maan tigin-kãseng sẽn welg toore, la y wa ne kũun b sẽn yõogd bugum n wa kõ Sẽn-Ka-Saabo. Badaar na n yɩɩ tigin-kãseng daare, dẽ, yãmb ka tog n tʋm tʋʋmd badaar ye.

³⁷ Ade, tigin-bãmbã n yaa tig Sẽn-Ka-Saab yĩnga. Yaa tigind yãmb sẽn na n tigim nebã, tɩ yaa tigind sẽn welg toore, n wa ne kũun b sẽn yõogd bugum, ne maand sẽn yõogd bugum, la bõn-koaadl kũuni, ne maand a taaba, la bõn-yũudl kũuni, wa sẽn zems noor ning b sẽn kõ daar fãa yĩngã wɛɛngẽ.

³⁸ Sẽn paas Sẽn-Ka-Saab vʋʋsg rayã, yãmb tog n waa ne y kũunã, la y pʋleng pidsg kũunã, ne y yamleoog kũunã fãa, n wa kõ Sẽn-Ka-Saabo.

³⁹ Kiuug a yopoe soabã rasem piig la a nu wã daare, yãmb sã n dɩk y tẽngã bõn-koaadlã, bɩ y maan tigr n waoog Sẽn-Ka-Saab rasem a yopoe. Pipi daarã na n yɩɩ vʋʋsgo, la rasem a niiẽ daarã me na n yɩɩ vʋʋsg daare.

⁴⁰ Pipi daarã, bɩ y bao tɩ-sõama wã biisi, ne koms vãado, tɩɩs wil sẽn tar vãado, ne ko-soodã noor yɩlsã, n tall-b n maan sũ-noog Sẽn-Ka-Saab sẽn yaa yãmb Wẽnnaamã taoor rasem a yopoe.

⁴¹ Yʋʋmd fãa yãmb tog n maana tig-kãngã n waoog Sẽn-Ka-Saab rasem a yopoe. Yõwã yaa no-tũudg sẽn ka sɛta, yãmb yagensã fãa yĩnga, zamaan woo zamaane. Bɩ y maan tig-kãngã kiuug a yopoe soabã pʋga.

⁴² Yãmb tog n zĩnda sẽgd pʋs rasem a yopoe. Ned ning fãa sẽn yaa-a Israyɛll tẽngã neda, a tog n zĩnda sẽgd pʋse.

⁴³ Yaa sẽn na n yɩlẽ tɩ yãmb yagensã fãa tõog n bãng tɩ mam sẽn yiis Israyɛll nebã Ezɩpt tẽngã poore, mam kɩtame tɩ b zĩnd sẽgd pʋse. Bala, mam yaa Sẽn-Ka-Saab sẽn yaa yãmb Wẽnnaam.»

⁴⁴ Yaa woto la a Moyiis gom ne Israyɛll nebã, n wilg-b Sẽn-Ka-Saab tig-kãsemsã.