Maan‑kʋʋre 21 - WẼNNAAM SEBRE 2014

Maan-kʋʋdb vɩɩm tõogo

¹ Sẽn-Ka-Saab yeela a Moyiis yaa: «Yeel a Aarõ kom-dibli wã sẽn yaa maan-kʋʋdbã yaa: ‹Maan-kʋʋd ka tog n sɩɩs a buudã ned kũum n dẽgem a meng ye.

² Sã n ka tɩ mikame tɩ yaa a roagd meng-menga, rat n yeel t'a ma, a ba, a bi-ribl bɩ a bi-pugla, a kẽem bɩ a yao,

³ la a tão-poak sẽn nan ka bãng raoa, a sẽn dag n nan ka kẽ kãadmã, yẽnda tõe n sɩɩs-a lame, rao sẽn dag n nan ka so-a wã yĩnga. Yẽnda tõe n dẽgma a meng a tão-poakã yĩnga.

⁴ Maan-kʋʋdã sẽn yaa taoor soab a nebã sʋkã yĩnga, a ka tog n maan yaar n dẽgem a meng ye.

⁵ Maan-kʋʋdbã ka tog n põng b zug tẽn-sʋka, la b ka tog n kok b toɛɛnga, la b ka tog n bog b yĩngã ye.

⁶ Bãmb tog n yɩɩ pʋ-peelem dãmb b Wẽnnaamã yĩnga, la b ra paoog b Wẽnnaamã yʋʋr ye. Bala, bãmb n wat ne rɩɩb kũun b Wẽnnaamã yĩnga, n maand maand sẽn yõogd bugum n kõt Sẽn-Ka-Saabo. Bãmb tog n yɩɩ pʋ-peelem dãmba.

⁷ Bãmb ka tog n peeg pʋg-yoodr bɩ bi-pugl sẽn sãam n maan b pag ye. B ka tog n dɩk pag a sɩd sẽn dig n bas n maan b pag ye. Bala, maan-kʋʋd yaa pʋ-peelem soab a Wẽnnaamã yĩnga.

⁸ Bɩ y geelg maan-kʋʋd wa ned sẽn welg toore, bala, yaa yẽnda n kõt yãmb Wẽnnaamã kũunã. Yẽnda tog n yɩɩ pʋ-peelem soab fo yĩnga, bala, maam a Sẽn-Ka-Saab yaa pʋ-peelem soaba, la yaa maam n kɩt tɩ yãmb yaa pʋ-peelem dãmba.

⁹ Maan-kʋʋd bi-pugl sã n maan yoob n dẽgem a menga, a paooga a ba. B tog n lob-a-la bugmẽ.

¹⁰ Maan-kʋʋd ning b sẽn pʋdg a zug kaam n dogl-a maan-kʋʋr tʋʋmdã, la b yeelg-a fu-welgdsã n kɩt t'a yaa a saam-biisã kãsmã ka tog n zũndg a zoobdo, la a ka tog n pãrs a fut me ye.

¹¹ Maan-kʋʋr kãsmã ka tog n pẽneg kũum n dẽgem a meng ye, baa sã n yaa a ba bɩ a ma n ki.

¹² Maan-kʋʋr kãsmã ka tog n yi sɛk roogã pʋg ye, la a ka tog n paoog yẽnda Wẽnnaamã sɛk roogã ye. Bala, b pʋdga yẽnda zug ne a Wẽnnaamã nug-tikr kaam n welg-a toore. Mam yaa Sẽn-Ka-Saabo.

¹³ Maan-kʋʋr kãsmã tog n peega pag sẽn nan ka bãng rao n maan a paga.

¹⁴ Yẽnda ka tog n dɩk pʋg-kõore, a ka tog n dɩk pag b sẽn digi, a ka tog n dɩk pʋg-yoodre, wall a rɩk bi-pugl sẽn sãam n maan a pag ye. La a tog n peega a buudã sʋk bi-pugl sẽn nan ka bãng rao n maan a paga.

¹⁵ Woto, maan-kʋʋr kãsmã ka na n dog kamb sẽn ka zems n kẽes a buudã sʋk ye. Bala, yaa maam a Sẽn-Ka-Saab n welg yẽnda toore.»

¹⁶ Sẽn-Ka-Saab yeela a Moyiis

¹⁷ t'a yeel a Aarõ yaa: «Fo yagensã sẽn na n pʋgl foomã sʋka, ned baa a yembr sẽn tar zang a yĩngã pʋg ka tog n kolg n na n dɩk a rɩɩb kũun n kõ a Wẽnnaamã ye.

¹⁸ Ned ning yĩng sẽn tar zang t'a ka tõe n kolg n kõ kũunã la woto: Yaa zoanga, woabga, wall ned yõor sẽn golme, wall a yĩngã wil a yembr sẽn yaa koɛɛg tɩ looge, wall will a yembr sẽn yaa wok tɩ looge.

¹⁹ Leb n yaa ned naoor bɩ a nug sẽn kaooge,

²⁰ bɩ ned sẽn yaa yẽoogo, bɩ ned sẽn yaa wagre, la sẽn tar nin-bulga, wall sẽn tar rasempʋɩɩga, bɩ nod-kʋdre, sã n ka rẽ bɩ a yaa ned lan-biis sẽn pusi.

²¹ Maan-kʋʋd a Aarõ yagensã sʋka, ned sã n be beenẽ n tar zanga, a ka tog n kolg n maan maoong sẽn yõogd bugum n kõ Sẽn-Ka-Saab ye. Yẽnda sẽn tar zangã yĩnga. Yẽnda ka tog n kolg n dɩk a rɩɩb kũunã n kõ a Wẽnnaamã ye.

²² Yẽnda tõe n yãka a Wẽnnaamã rɩɩb b sẽn kõ tɩ yaa bũmb sẽn welg toor wʋsgã, ne bũmb nins b sẽn welg toorã n dɩ.

²³ La bũmb sẽn be yaa tɩ yẽnda ka tog n kolg fu-lillidgã, wall a kolg tẽn-kugrã ye. Yẽnda sẽn tar zang a yĩngẽ wã yĩnga. Bɩ yẽnda ra maan n paoog mam zĩ-sõngã ye. Bala, mam yaa Sẽn-Ka-Saab sẽn welg bãmb toore.»

²⁴ Dẽ, a Moyiis rɩka gom-kãens n togs a Aarõ ne a kom-dibli wã, la ne Israyɛll nebã fãa.