Maan‑kʋʋre 20 - WẼNNAAM SEBRE 2014

Pʋʋsg sẽn ka noom Wẽnnaam

¹ Sẽn-Ka-Saab yeela a Moyiis t'a

² wilg Israyɛll nebã yaa: «Israyɛll nebã sʋk neda, wall sãan sẽn be yãmb sʋkã sã n dɩk a biig n kɩs tɩ b kõ Moloke, a soabã sɩbgr na n yɩɩ kũum. Tẽngã nebã tog n loba a soab ne kug t'a ki.

³ Mam na n kisga a soabã, la m na n yiisa a soabã a buudã sʋk n kɩt tɩ b kʋ, tɩ bala, yẽnda rɩka a biig n kɩs tɩ b kʋ n kõ Moloke, n kɩt tɩ mam sɛk roogã rẽgme, la a kɩt tɩ mam yʋʋrã sẽn welg toorã paam paoogre.

⁴ Tẽngã nebã sã n yãk yam n mum b nin n bas ned ning sẽn dɩk-a a biig n kõ Molokã, la b sã n bas-a n ka kʋ,

⁵ mam meng n na n sɩbg a soabã, la m sɩbg a buudã, la mam na n yiisa a soabã a buudã sʋka, la mam na n yiisa neb nins fãa sẽn wẽnemd n bas maam n maan yoob ne a Molokã.

⁶ Ned sã n wẽnemd n bas maam n pʋʋs kɩɩmse, wall a bas n pʋg bagba, bõn-kãng wẽnda yoobo, la mam na n wẽnemdame n zab ne a soabã, la m na n yiis-a-la a buudã sʋka.

⁷ Bɩ y yɩlg y mens n yɩ pʋ-peelem dãmba, bala, maam a Sẽn-Ka-Saab sẽn yaa yãmb Wẽnnaamã yaa pʋ-peelem soaba.

⁸ Bɩ y sak mam tõodã, n sak n maan wa b sẽn wilgã. Mam yaa Sẽn-Ka-Saabo, la yaa maam n welg yãmb toore.

⁹ Ned sã n tʋʋs a ba, bɩ a ma, a soab sɩbgr tog n yɩɩ kũum. Yẽnda sẽn tʋʋs a ba wã bɩ a ma wã yĩnga, yẽnda zɩɩmã raagr taal be a meng zugu.

¹⁰ Ned sã n maan yoob ne pag sẽn tar sɩda, a sã n maan yoob ne a to paga, bɩ b kʋ pagã ne raoã sẽn yaa yoaadbã fãa.

¹¹ Rao sã n kẽ ne a ba paga, n ning a ba wã yãnde, bɩ b kʋ raoã ne pagã, la bãmb zɩɩmã taal bee b meng zugu.

¹² Rao sã n kẽ ne a bi-paga, bɩ b kʋ bãmb b yiibã fãa. Bãmb maana yel-beedo, dẽ bãmb zɩɩmã taal bee bãmb meng zugu.

¹³ Raop a yiib sã n gãand taab wa rao sẽn kẽed ne pag to-to wã, bãmb b yiibã fãa maana yel-beedo. Bãmb b yiibã fãa tog n kiime, la bãmb zɩɩmã taal be b meng zugu.

¹⁴ Rao sã n dɩk bi-pugl ne a ma n maan a pagba, yaa yãn-tʋʋmã. Bɩ b yõog raoã ne pagbã fãa bugum, sẽn na n yɩlẽ tɩ yãn-tʋʋm-kãngã ra leb n zĩnd yãmb sʋk ye.

¹⁵ Rao sã n gãand rũnga, bɩ b kʋ a soabã, la b kʋ rũngã me.

¹⁶ Pag sã n dɩk a meng n kõ rũng t'a gãand-a, bɩ b kʋ pagã ne rũngã fãa. Bɩ y kʋ-ba, la b zɩɩmã taal bee b meng zugu.

¹⁷ Rao sã n peeg a tão-poaka, n kẽ ne-a, sã n yaa a ba-biig bɩ a ma-biiga, yaa yãnde. Bɩ b rig-b b tẽngã nebã fãa nifẽ n yiis b buudã sʋka. Bala, rao-kãng kẽe ne a tão, la a kongrã taal be a meng zugu.

¹⁸ Rao sã n peeg pag n kẽ ne-a a pekr wakate, n yãnd pagã zɩɩmã, tɩ pagã me yã zɩɩmã, bɩ b rig bãmb b yiibã fãa n yiis b buudã sʋka.

¹⁹ Bɩ f ra sak n kẽ ne f ma tão-poaka, wall ne f ba tão-poak ye. Bala, f maana yãnd ne f roagdba. Neb nins sẽn maan-b woto wã kongrã taal na n zĩnda b mens zutu.

²⁰ Rao sã n kẽ ne a ba kẽem paga, bɩ a ba yao paga, bãmb yel-wẽndã taal na n zĩnda b meng zugu, la bãmb na n kiime n ka paam biig ye.

²¹ Ned sã n dɩk a ba-biig pag n maan a paga, a maana rẽgdo. Bãmb ka na n tol n paam kamb ye.

²² Bɩ y sak mam no-tũudsã fãa ne mam noyã fãa, la y ning-b b nao-kẽndr zugu, dẽ, tẽng ning mam sẽn na n tall yãmb n kẽng tɩ y tɩ zĩnd a pʋgẽ wã ka na n zãgs yãmb ye.

²³ Bɩ y ra sak buud nins mam sẽn na n dig yãmb taoorã no-tũudsã ye. Bala, bãmb maana tʋʋm-be-kãensã fãa tɩ mam yamã yi-ba.

²⁴ Mam yeela yãmb tɩ yaa yãmb n na n deeg tẽngã n sooge. Mam mengã n na n kõ yãmb tẽngã tɩ y sooge. Beenẽ yaa tẽng sẽn tar bĩisim ne sɩɩdo. Bala, mam yaa Sẽn-Ka-Saab sẽn yaa yãmb Wẽnnaam sẽn welg yãmb toor buud a taabã sʋka.

²⁵ Yaa rẽ yĩnga, tɩ yãmb tog n bãng rũms nins sẽn yaa yɩlmã n welg ne rũms nins sẽn ya-b rẽgdã, la y bãng bõn-yɩgdɩ nins sẽn yaa rẽgdã n welg ne sẽn ya-b yɩlmã wã, sẽn na n yɩlẽ tɩ yãmb mensã ra lebg bõn-dẽgd rũm-bãmbã yĩnga, la ne bõn-yɩgdɩ wã, la ne bũmb nins fãa sẽn saagd tẽn-gãongã zugã mam sẽn lebs kɛɛng n wilg-y tɩ b yaa rẽgdã yĩng ye.

²⁶ Yãmb tog n yɩɩ pʋ-peelem dãmb mam yĩnga, bala, maam a Sẽn-Ka-Saab yaa pʋ-peelem soaba. Mam welga yãmb toor buud a taabã sʋka, tɩ yãmb tõe n yɩ mam dẽnda.

²⁷ Rao bɩ pag sã n tar pãn-tõog n tõe n bool kɩɩms wall a yaa baga, bɩ b kʋ-ba. B tog n loba bãmb ne kug tɩ b ki. La bãmb zɩɩmã taal na n zĩnda b meng zugu.»