Maan‑kʋʋre 15 - WẼNNAAM SEBRE 2014

Rao rẽgeng a raolem wɛɛngẽ

¹ Sẽn-Ka-Saab yeela a Moyiis ne a Aarõ yaa:

² «Yeel-y Israyɛll nebã yaa: ‹Taoor bãag sã n yõk raoa, kɩtdame t'a lebg rẽgdo.

³ Ad bũmb ning yĩng sẽn kɩt tɩ taoor bãagã sẽn tar a soabã lebg rẽgdã. A zɩɩm sã n yita wall ka yita, baoosg zãnga, a soabã ket n yaa rẽgdo.

⁴ Sã n wa yaa a woto, ned ning zɩɩm sẽn yitã sẽn gãand gãag ning zugu, gã-kãng lebga rẽgdo, la a soabã sẽn na n zĩnd bũmb ning zug fãa lebgda rẽgdo.

⁵ Ned sã n sɩɩs gã-kãngã, bɩ a soab pegs a futu, la a so koom, la baoosgo, a na n yɩɩ rẽgd hal tɩ ta zaabre.

⁶ Ned sã n zomb zĩig ning ned ning zɩɩmã sẽn daagdã sẽn zombẽ wã, a soabã tog n pegsa a futu, la a so koom, la baoosgo, a na n yɩɩ rẽgd hal tɩ ta zaabre.

⁷ Ned sã n sɩɩs rao ning zɩɩmã sẽn daagd a soabã yĩnga, a tog n pegs a futu, la a so koom, la baoosgo, a na n yɩɩ rẽgd hal tɩ ta zaabre.

⁸ Ned ning zɩɩm sẽn daagdã sã n tʋbs ned sẽn yaa yɩlemde, nin-kãng tog n pegs a futu, la a so koom, la baoosgo, a na n yɩɩ rẽgd hal tɩ ta zaabre.

⁹ Ned ning zɩɩm sẽn daagdã sẽn na n zomb gaar ning fãa n tog sore, gaarã lebgda rẽgdo.

¹⁰ Ned ning zɩɩm sẽn daagdã sã n zĩnd n bʋʋg bũmbu, baa sẽn yaa bũmb ninga, tɩ ned sɩɩs bũmbã, nin-kãng tog n pegsa a futu, la a so koom, la baoosgo, a na n yɩɩ rẽgd hal tɩ ta zaabre.

¹¹ Ned ning zɩɩm sẽn yitã sã n sɩɩs neda, n ka reng n pegs a nusã ne koom, bɩ a soabã pegs a futu, la a so koom, la baoosgo, a na kell n yɩɩ rẽgd hal tɩ ta zaabre.

¹² Ned ning zɩɩm sẽn yitã sã n sɩɩs yagd laoko, bɩ b wãag laok-kãnga, la a sã n yaa laok sẽn maan ne raoogo, bɩ b los-a koomẽ n peke.

¹³ Ned ning sẽn tar-a pend bãag t'a zɩɩm yitã sã n dat n yɩlg a menga, bɩ a rɩk rasem a yopoe tõr a yɩlgrã yĩnga. Yẽnda tog n pegs a futu, la a tɩ bao ko-bundum n so, n yaool n tõog n yɩ yɩlemde.

¹⁴ La rasem a nii wã daare, bɩ a bao wal a yiibu, wall man-wan-bi a yiibu, n kẽng Sẽn-Ka-Saab taoore, sɛk roogã noore, n dɩk-b n kɩs maan-kʋʋdã.

¹⁵ La bɩ maan-kʋʋdã reeg-b n dɩk a yembr n maan yel-wẽnã maoongo, la a rɩk a to wã, n maan maoong sẽn yõogd bugum. Bɩ maan-kʋʋdã maan a woto n yɩlg a soabã Sẽn-Ka-Saab taoore, a zɩɩmã sẽn yitã yĩnga.

¹⁶ Rao rogem bõn-buud koom sã n daagdẽ, a soabã tog n so a yĩngã tõr koom, la a na n kell n yɩɩ rẽgd hal tɩ ta zaabre.

¹⁷ Rogem bõn-buudã koom sã n daag n mad fuugu, wall gãongo, bɩ b los-b koomẽ n pegse, la b na n kell n yɩɩ rẽgd hal tɩ ta zaabre.

¹⁸ Rao ne pag sã n kẽ ne taaba, bɩ b so koom, la b na n kell n yɩɩ rẽgd hal tɩ ta zaabre.› »

Pag rẽgengo, a poglem wɛɛngẽ

¹⁹ «Pag sã n yãnd a pekre, a na n yɩɩ rẽgd hal tɩ ta rasem a yopoe tõre. La ned sã n sɩɩs-a, yẽnda soab na n yɩɩ rẽgd hal tɩ ta zaabre.

²⁰ Pʋg-kãng sã n gãand gãag zug a pekrã wakate, gãagã na n yɩɩ rẽgdo, la bũmb ninga fãa zug pʋg-kãng sẽn na n zomb na n yɩɩ rẽgdo.

²¹ Ned ning sẽn na n sɩɩs-a gãag ning pʋg-kãng sẽn gãand a zugã, tog n pegs a futu, la a so koom, la a na n kell n yɩɩ rẽgd hal tɩ ta zaabre.

²² Ned ning sẽn sɩɩs-a bũmb ning pʋg-kãng sẽn zombã, a soabã tog n pegsa a futu, la a so koom, la a na n kell n yɩɩ rẽgd hal tɩ ta zaabre.

²³ Pagã sẽn gãand gãag ning zugã, wall a sẽn zomb bũmb ningã, ned sã n sɩɩs-ba, a soab na n yɩɩ rẽgd hal tɩ ta zaabre.

²⁴ Rao sã n gãand ne pʋg-kãngã, t'a zɩɩmã sẽn daagdã bol-a, rao-kãng na n yɩɩ rẽgd hal tɩ ta rasem a yopoe, la gãag ning fãa zug rao-kãng sẽn na n gãandã na yɩɩ rẽgdo.

²⁵ Pag zɩɩm sã n daagdẽ t'a pekr wakat ka ta, wall a pekrã sã n kaoos n yɩɩg rasem sõor ning sẽn zems pekr rasmã, pʋg-kãng na n yɩɩ rẽgd hal n tãag a zɩɩmã raagr sɛɛbo, wa yẽnda sẽn yãnd a pekrã wakatã.

²⁶ La yẽnda sẽn na n gãand gãag ning fãa zug na n kell n yɩɩ rẽgd wa gãag ning zug yẽnda sẽn gãand a pekrã wakatã, la bũmb ning fãa yẽnda sẽn na n zomb a zugu, a na n yɩɩ rẽgd wa yẽnda sẽn yãnd a pekrã wakatã.

²⁷ Ned ning sẽn na n sɩɩs-a bãmb na n yɩɩ rẽgdo. A soabã tog n pegs a futu, la a so koom, la a na n kell n yɩɩ rẽgd hal tɩ ta zaabre.

²⁸ Pagã sã n paam yɩlgr ne a zɩɩmã sẽn daagdã, na n taa rasem a yopoe, t'a yaool n yɩ yɩlemde.

²⁹ La rasem a nii wã daare, bɩ a bao wal a yiibu wall man-wan-bi a yiibu, n tall n tɩ kɩs maan-kʋʋdã sɛk roogã noore.

³⁰ La bɩ maan-kʋʋdã reeg-b n yãk a yembr n maan yel-wenã maoongo, la a rɩk a to wã n maan maoong sẽn yõogd bugum. Bɩ maan-kʋʋdã maan a woto n yɩlg-a Sẽn-Ka-Saab taoore, t'a paam a meng ne zɩɩmã sẽn dag n dẽgm-a wã.

³¹ Bɩ y kɩt tɩ Israyɛll nebã sã n wa be rẽgd pʋga, bɩ b zãag b mens ne sɛk-roogã. Dẽ, bãmb ka na n ki b rẽgdã yĩng ye. Yaa sẽn na n yɩlẽ tɩ bãmb da wa rẽgem mam sɛk-zĩigã sẽn be bãmb sʋkã ye.

³² Woto yaa tõog pend bãag yĩnga, la ne rogem bõn-buud koom sẽn daagd yĩnga.

³³ Yaa pag sẽn yãnd a pekre, wall pag bɩ rao zɩɩm sẽn daagde, la rao sẽn na n kẽ ne pag sẽn yãnd a pekre.»