Kʋʋr yɩɩla 5 - WẼNNAAM SEBRE 2014

¹ Sẽn-Ka-Saabo, tẽeg-y bũmb ning sẽn paam tõndã yelle. Tags-y la y ges tõnd yãndã yelle.

² B rɩka tõnd pʋɩɩrã n kõ sãambã, tõnd sẽn ka mi-b rãmbã reega tõnd yiyã n sooge.

³ Tõnd yaa kɩɩbs sẽn ka ba, la d ma-rãmbã yaa wa pʋg-kõapa.

⁴ Tõnd daada koom ne ligd n yũuda. Tõnd yaooda ligd n yaool n paam d raado.

⁵ Neb nins sẽn digd tõndã paama tõnd n yõke. Tõnd yɛɛ zãnga, la b ka basd tõnd tɩ d vʋʋs ye.

⁶ Tõnd tẽega d nus n tees Ezɩpt ne Asiiri sẽnẽ n na n paam dɩɩb n dɩ.

⁷ Tõnd ba-rãmbã kongame, bãmb ka leb n be ye, la yaa tõnd n deegd bãmb yel-wẽnã sɩbgre.

⁸ Yembs n so tõndo, la ned ka sẽn na n fãag tõnd bãmb nusẽ ye.

⁹ Tõnd gẽnegda d yõy n baood dɩɩbo, la neb bee we-raoog pʋgẽ ne sʋʋs n dat n kʋ tõndo.

¹⁰ Komã wɩnga tõnd wʋsg hal tɩ tõnd gãndã yõog wa wʋng bugum sẽn dɩ.

¹¹ Bãmb yõga pagbã n sãam bãmb Sɩyõ tẽngã pʋgẽ. La b maana pʋg-sadbã me woto Zʋʋda tẽmsã pʋsẽ.

¹² Bãmb yõga nanambsã n luuli. Bãmb ka waoog nin-kẽembã ye.

¹³ B kɩtame tɩ kom-bɩɩsã tʋk neere, la kom-dibli wã tʋka raad n lengdẽ.

¹⁴ Nin-kẽembã ka leb n kẽnd tẽngã noor ye. La kom-bɩɩsã ka leb n yɩɩnd ye.

¹⁵ Tõnd sũ-noogã sɛɛme. Tõnd saoogã lebga sũ-sãanga.

¹⁶ Tõnd maanfã sẽn dag n fõg tõnd zugã lʋɩɩme. Toog bee tõnd zutu, bala, tõnd kongame.

¹⁷ Bõn-kãng yĩng n kɩt tɩ tõnd namsd d sũyã pʋse, tɩ tõnd nensã sobda.

¹⁸ Bala, Sɩyõ tãngã sãamame, tɩ waas gõod beenẽ.

¹⁹ La yãmba, Sẽn-Ka-Saabo, yãmb paada wakat sẽn ka sɛta. Yãmb naam geerã na n paa zamaan fãa.

²⁰ Bõe yĩng tɩ yãmb na n yĩm tõnd yell wakat fãa? Bõe yĩng tɩ yãmb na n bas tõnd n kaoos wakat wʋsgo?

²¹ Sẽn-Ka-Saabo, bɩ y wẽnemd tõnd neng n tees yãmba, la tõnd na leb n wa yãmb nengẽ. Leb-y n kõ-y tõnd dasem nins sẽn yaa wa kʋdem-wẽndẽ dẽnda.

²² Yãmb basa tõnd zãng fasɩ bɩ, yãmb sũurã puuga ne tõnd hal tɩ loog bɩ?