Kowelɛt 8 - WẼNNAAM SEBRE 2014

¹ Ãnda n zem yam soaba? Ãnda n mi yɛlã võor bilgri? Ned yam kɩtdame t'a neng pɩnda, la yẽnda nin-toolem tekdame.

² Mam yeta foom tɩ f sak rĩmã noore, fo sẽn dag n wẽen ne Wẽnnaamã yĩnga.

³ Da yɩ yãg-yãg n zãag f meng ne yẽnda ye. Ra yals yell sẽn yaa wẽng pʋgẽ n kaoos ye. Bala, yẽnda maanda bũmb ning fãa sẽn noom-a.

⁴ Bala, baa rĩm sẽn yeel bũmb ninga, yẽnda n so pãnga. Dẽ wã, ãndã n tõe n sok yẽnda t'a maanda bõe?

⁵ Yell kõn paam ned ning sẽn sakd tõogã ye. La yam soab miime tɩ bũmb fãa tara a wakate, la bʋʋdã me tara a wakate.

⁶ Bala, yell fãa bʋʋd tara a wakate. Ninsaal toog yaa zɩsg ne-a.

⁷ Sɩd me, yẽnda ka mi bũmb ning sẽn na n wa zĩnd ye. Ãnda n tõe n wilg yẽnda sẽn na n wa yɩ to-to?

⁸ Ned ka be n so a vɩɩm n tõe n gɩdg-a ye. La ned me ka be n tar pãng ne a kũum daar ye. Yolsg ka be zabr pʋgẽ ye. Nin-toolem ka sõngd nin-toaag t'a põs ye.

Wẽnnaam tʋʋmdã yel-solemde

⁹ Mam yãnda bõn-kãens fãa wakat ning mam sẽn tags n ges tʋʋm nins fãa sẽn maand dũni zug ka wã yellã. Wakat n be tɩ ninsaal tõe a to n maand-a wẽnga.

¹⁰ Mam yãndame tɩ b yãbd nin-wẽns yĩnga. Tẽngã nebã dag n yita zĩig sẽn welg toorã pʋgẽ n watẽ, la b lebdẽ, bãmb yĩma nin-wẽnsã sẽn dag n maan bũmb ninsã yelle. Woto me yaa zaalem.

¹¹ Bãmb sẽn ka yãgd n kao tʋʋm-wẽns bʋʋd tao-tao wã yĩnga, ninsaalbã sũyã pida ne wẽng maaneg ratem.

¹² Baa yel-wẽn-maand sã n maand wẽng naoor koabg n vɩɩmd n kaoose, baoosgo, mam miime tɩ sẽn zoet-b Wẽnnaamã na n paama sũ-noogo, bãmb sẽn zoet Wẽnnaamã yĩnga.

¹³ La nin-wẽng ka na n tol n paam sũ-noog ye. Yẽnda ka na n vɩɩmd n kaoos n yɩɩg sulunsuk ye. Yẽnda sẽn ka zoet Wẽnnaamã yĩnga.

¹⁴ Bũmb a yembr n be dũniyã pʋg n yaa zaalem. Yaa tɩ nin-tɩrs n be n paamd sẽn zems nin-wẽns tʋʋmd yaoodo. La nin-wẽns me n be n paamd sẽn zems nin-tɩrs tʋʋmd yaoodo. La mam yetame tɩ woto me yaa zaalem.

¹⁵ Dẽ, mam yeelame tɩ sũ-noog yaa sõama. Bala, bũmb ka be n yaa sõama ninsaal yĩng dũniyã ka, sã n ka t'a rɩ la a yũ la a maan sũ-noog ye. Yẽnda tog n paama woto, yẽnda tʋʋmã pʋgẽ dasem nins fãa Wẽnnaam sẽn kõ yẽnda t'a vɩɩmd dũniyã zug ka wã yĩnga.

¹⁶ Mam sẽn wa n dat n bao n bãng yam sẽn yaa bũmb ningã, la m na n tags yell ning sẽn maand dũniyã zug ka wã yelle, tɩ ninsaal ka tõe n gũs wĩntoog ne yʋngã,

¹⁷ mam tagsa Wẽnnaam tʋʋmã fãa yelle. La mam yãndame tɩ ninsaal ka tõe n bãng tʋʋmd ning fãa sẽn maand dũniyã zug ka wã yell ye. Bala, baa ninsaal sã n maood n dat n bãng a võore, yẽnda ka na n tol n yãnd-a ye. La baa yam soab sã n yeel t'a miime, yẽnda ka tõe n bãng a võorã ye.