Kowelɛt 7 - WẼNNAAM SEBRE 2014

Yel-bũna, ne yam tagsg goamã

¹ Yʋ-sõng n são kaam sẽn tar yũ-noogo. La ned kũum daar n são a rogem daare.

² Sũ-sãang roogẽ kõom n são tigr doogẽ kõom. Bala, yaa woto la ninsaal fãa baoosgo. La nin-vɩɩsã fãa tog n tagsa a yelle.

³ Sũ-sãang n são laado. Bala, nen-gãneng manegda sũuri.

⁴ Yam dãmb sũur bee sũ-sãang roogẽ, la yalembã sũur bee sũ-noog roogẽ.

⁵ Yam soab keoogr kelgr n são yalem yɩɩl kelgre.

⁶ Bugum sẽn dɩt gõos raad rʋk tẽngr t'a bʋrg yit to-to wã, yalem laad me wẽnda a woto. Woto me yaa zaalem.

⁷ Pãn-maaneg kɩtdame tɩ yam soab lebg yalma, la kũun menesda yam.

⁸ Bũmb baoosg n são a sɩngre, la sũ-mar soab n são tɩta-neda.

⁹ Ra sak tɩ f sũur yik tao-tao ye. Bala, sũ-yikr paada yalembã pʋsẽ.

¹⁰ Bɩ f ra sok tɩ yaa wãn tɩ wakat sẽn loog poorẽ wã yaa sõama n yɩɩd moasã ye. Bala, fo sã n sok woto, ka yam sokr ye.

¹¹ Yam yaa sõama wa pʋɩɩre, la a nafda nin-vɩɩs dũniyã ka.

¹² Bala, yam maasem yaa wa ligd maasem. La bãngr yõodã, yaa t'a fãagda neb nins sẽn tar-b yamã.

¹³ Bɩ f tags Wẽnnaam sẽn maand bũmb ningã yelle. Bala, bũmb ning bãmb sẽn gõde, ãndã n tõe n tẽeg-a?

¹⁴ Sũ-noog daare, maan sũ-noogo. La toog daare, bɩ f tagse. Bala, Wẽnnaam maana bãmb b yiibã fãa tɩ b yaa bũmb a yembre, sẽn na n yɩl tɩ ninsaal da bãng bũmb ning sẽn be taoor n watẽ ye.

¹⁵ Mam yãnda bõn-kãensã fãa mam vɩɩm sẽn yaa zaalmã pʋga. B tõe n yãnda nin-tɩrg sẽn kiid a tɩrlem yĩnga, la nin-wẽng sẽn paam yõ-wok a yel-wẽnã pʋgẽ.

¹⁶ Bɩ f ra yɩ nin-tɩrg tɩ loog nug ye, la f ra yɩ yam soab tɩ loog nug me ye. Bõe yĩng tɩ f na n sãam f menga?

¹⁷ Ra yɩ nin-toaag tɩ loog nug ye, la f ra yɩ yalem me ye. Bõe yĩng tɩ f na n ki tɩ f wakat ka ta?

¹⁸ Yaa neer tɩ f gãd a yembre, la f ra bas a yembrã me tɩ loog ye. Bala, ned ning sẽn zoet Wẽnnaamã na n paama sor n põs yel-bãmb fãa.

¹⁹ Yam soab yam kõta yẽnda pãng n yɩɩd nanambs piig sẽn be tẽng a yembr pʋgẽ.

²⁰ Sɩda, nin-tɩrg ka be dũniyã zug n maand tɩrg n ka maand yel-wẽnd ye.

²¹ Ra kelg goam nins fãa b sẽn gomdã, n wa wʋm f tʋmtʋmd sẽn tʋʋd foom ye.

²² Bala, fo miime tɩ naoor wʋsgo, fo me tʋʋ neb a taaba.

Neb bilf n paamd yam

²³ Mam maka yõwã fãa ne yam. Mam yeelame tɩ mam na n paama yam. La a zãaga ne maam.

²⁴ Bũmb ning sẽn be wã zãrame, la a zulma wʋsgo. Ãnda n tõe n paam-a?

²⁵ La mam maaga m meng n na n vees n bao n bãng yam, la m bãng bũmb ning sẽn be wã võore. La m bãngame tɩ nin-toolem yaa yalemdo, la gãeemd yaa zu-kaalgo.

²⁶ La mam yaool n yãndame tɩ pag ning sẽn yaa wa kuusrã, t'a sũurã ne a nusã yaa wa sẽbdsã, toolem yɩɩda kũum. La ned ning sẽn tat Wẽnnaam yamã põsda yẽnda. La yẽnda yõkda yel-wẽn-maandã.

²⁷ Koɛɛg soabã yetame: «Mam tagsa bõn-kãens fãa yell yembr-yembre, n dat n bãng b võore.

²⁸ Mam baoo ne m sũur fãa n ka yãnd ye. Mam yãnda rao a yembr bal raop tusr sʋka. La mam ka yãnd pag ba a yembr pagbã fãa sʋk ye.

²⁹ Ade, yaa bũmb a yembr bal la mam yãnd yã. Yaa tɩ Wẽnnaam naana ninsaalbã tɩrse, la nebã baoo sɩlem wʋsgo.»