Kowelɛt 3 - WẼNNAAM SEBRE 2014

Bũmb fãa tara a wakate

¹ Bũmb fãa tara a wakate. Bũmb nins fãa sẽn maand dũniyã zugã tara b wakate.

² Rogem tara a wakate, la kũum me tara a wakate. Selb tara a wakate, la võob me tara a wakate.

³ Kʋʋb wakat beeme, la tɩpg wakat me beeme. Siigr wakat beeme, la meeb wakat me beeme.

⁴ Yãbr wakat beeme, la laad wakat me beeme. Wiisg wakat beeme, la saoog wakat me beeme.

⁵ Kug lobr wakat beeme, la b wʋkr wakat me beeme. Mobg taab wakat beeme, la zãag taab wakat me beeme.

⁶ Baoob wakat beeme, la meneng wakat me beeme. Zãab wakat beeme, la lobr wakat me beeme.

⁷ Fuug kẽegr wakat beeme, la a sẽeb wakat me beeme. Sĩndim wakat beeme, la goam wakat me beeme.

⁸ Nonglem wakat beeme, la kisgr wakat me beeme. Zabr wakat beeme, la vɩ-bãan wakat me beeme.

⁹ Tʋmtʋmd sẽn tʋmdã, bõe yõod la a paamda?

¹⁰ Mam yãnda tʋʋmd ning Wẽnnaam sẽn kõ ninsaalbã tɩ b maanã.

¹¹ Wẽnnaam maana bũmb fãa sõama n zems a wakate. Bãmb ninga wakat sẽn ka sɛt tagsg ninsaal sũur pʋgẽ, baa ne yẽnda sẽn ka tõe n tags n bãng tʋʋmd ning Wẽnnaam sẽn maan hal sɩngr tɩ ta sɛɛbã.

¹² La mam miime tɩ bũmb ka be sẽn noom ninsaal n yɩɩd yẽnda sẽn na n paam sũ-noog la naar a vɩɩmã wakat ye.

¹³ Ned sã n dɩtẽ la yũuda, la a paam sũ-noogo, a bãng tɩ yaa Wẽnnaam kũuni.

¹⁴ Mam miime tɩ bũmb ning fãa Wẽnnaam sẽn maan paada wakat sẽn ka sɛta. Bũmb ka be n na n paas-a wall boog-a ye. Wẽnnaam n maan-a t'a yɩ woto tɩ nebã zoe bãmba.

¹⁵ Bũmb ning sẽn be wã rag n zĩnda pĩnda. La bũmb ning sẽn na n wa zĩndã rag n zoe n zĩndame. Wẽnnaam kɩtdame tɩ bũmb nins sẽn dag n loogã leb n wa.

¹⁶ La sẽn paase, mam yãndame tɩ dũniyã ka, b basda bʋ-sɩdã n maand wẽnga, b basda tɩrlem n maand wẽnga.

¹⁷ Mam tagsa m sũur pʋgẽ tɩ Wẽnnaam na n kaoo nin-tɩrg la nin-wẽng bʋʋdo. Bala, yɛlã fãa tara b zĩiga, la tʋʋmd fãa tara a wakate.

¹⁸ Mam tagsa ninsaal yell m sũur pʋgẽ, n yeel tɩ Wẽnnaam rag n makda ninsaalbã n na n ges tɩ b mensã tõe n bãng tɩ b yaa wa rũms bala.

¹⁹ Bala, bũmb ning sẽn paamd ninsaalbã ne bũmb nins sẽn paamd rũmsã yaa bũmb a yembre. A yembr kiida wa a to. Bãmb b yiibã fãa yõy vʋʋsem yaa bũmb a yembre. Ninsaal ka yɩɩd rũng ye. La bũmbã fãa yaa zaalem

²⁰ Bãmb fãa rabda zĩ-yende. B fãa maana ne tẽng tom, la b fãa na n leba tẽng tomẽ.

²¹ Ãnda n mi ninsaal yõy vʋʋsem sã n kẽngda yĩngr tɩ rũms rẽnd sigd tẽnga?

²² Mam yãame tɩ bũmb ka be sẽn noom ninsaal n yɩɩd a sẽn na n maan sũ-noog ne a tʋʋmã ye. Yaa woto la yẽnda rẽnda. Ãnda n na n kɩt tɩ yẽnda lebg n wa yãnd bũmb ning sẽn na n wa zĩnd yẽnda loogr poorẽ wã?