Galat Rãmba 5 - WẼNNAAM SEBRE 2014

Yals kãenkãe lohorem pʋgẽ

¹ Kiris yolsa tõnd tɩ d na vɩ ne lohorem. Dẽ yĩngã, yals-y kãenkãe n da leb n kẽes y mens yembdẽ ye.

² Ade, maam a Poll yeta yãmb tɩ yãmb sã n kɩt tɩ b kẽes-y bãongo, Kiris ka na n zĩnd yõod ne yãmb ye.

³ Mam leb n yeta ned ning fãa sẽn kɩt tɩ b kẽes-a bãong t'a tog n pidsa tõogã gilli.

⁴ Yãmb dãmb sẽn baood zemsg tõog sakr pʋgẽ wã, yãmb welga ne Kirisi, yãmb monga y mens barkã.

⁵ Ne tõndo, yaa tẽeb pʋgẽ la tõnd gũud tɩ Wẽnnaam kɩt tɩ tõnd lebg nin-tɩrse, Sɩɩg-sõng pãngã yĩnga.

⁶ Bala, bũmb ning sẽn be yõod Kiris pʋgẽ wã ka bãongã wall moonemã ye, yaa tẽeb sẽn tʋmd ne nonglem.

⁷ Yãmb dag n zoeta sõama, la ãnda n gɩdg yãmb tɩ y ra sak sɩdã, n kɩt tɩ y yalse?

⁸ Tags-kãng ka yi sẽn boond-a yãmbã nengẽ ye.

⁹ Rã-bɩll bilf bal wukda bur zom-nagdgã gilli, wa b sẽn mi n yetẽ wã.

¹⁰ Ne maam, mam sũurã keema ne yãmb Zu-soabã pʋgẽ, tɩ y tagsg ka na n yɩ toor ye. La ned ning sẽn dãmbda yãmbã, baa a sẽn yaa ned ning fãa, a na n deega a sɩbgre.

¹¹ M ba-biisi, ne maam, sã n yaa tɩ mam moondame tɩ b kẽes nebã bãongo, bõe yĩng tɩ b namsd maam? Dẽ, a Zeezi da-pɩkã koɛɛg sẽn yaa wa kug-lakdg tɩ mam moondẽ wã ka leb n beegd ned ye.

¹² Mam datẽ lame tɩ neb nins sẽn dãmbd yãmbã tolg n wã b mens n baase.

¹³ M ba-biisi, b boola yãmb tɩ y vɩɩmd lohorem pʋgẽ. La bɩ y da rɩk lohorem‑kãng n na n vɩɩmd wa yĩngã sẽn datã ye. Vɩɩmd-y ne nonglem, la y tʋm n kõ taaba.

¹⁴ Bala, gomd a yembr tãa n pidsd tõodã gilli. A yetame tɩ: Nong f to wa f menga.

¹⁵ La yãmb sã n wãbd taab wa baase, la y namsd taaba, bɩ y gũus n da wa gõdg n sãam taab ye.

Sɩɩg-sõng biisi, la yĩngã ratem tʋʋma

¹⁶ Dẽ, mam yeta yãmb tɩ y kẽn wa sẽn zems Wẽnnaam Sɩɩgã sẽn tɛt yãmbã, la yãmb kõn maan y yĩngã sẽn dat ye.

¹⁷ Bala, yĩngã tara ratem sẽn yaa lebend ne Wẽnnaam Sɩɩgã rẽnda, la Wẽnnaam Sɩɩgã tara ratem sẽn yaa lebend ne yĩngã rẽnda. B kɩɩsda taaba, tɩ yãmb kõn maan y sẽn datã ye.

¹⁸ La sã n yaa Wẽnnaam Sɩɩgã n tɛt yãmba, yãmb ka be tõog sakr pʋgẽ ye.

¹⁹ La yĩngã tʋʋm yaool n yaa vẽenese. Yaa yoobo, rẽgdo, tʋʋm‑wẽns maanego,

²⁰ wẽn-naands pʋʋsgo, tɩɩm, beem, ka-wʋmd-taaba, sũ-kiiri, sũ-yikri, no-koɛɛma, welgre, yi-taaba,

²¹ zoe-bõne, rã-tɩgre, yão-beedo, la bũmb sẽn wẽnd a woto. Mam pĩnd n keoogda yãmb wa mam sẽn da zoe n maanã. Neb nins sẽn maand bõn-kãensã kõn paam Wẽnnaam soolem tɩ yɩ b pʋɩɩr ye.

²² La Sɩɩg-sõng bilã yaa nonglem, la sũ-noogo, la bãane, la sũ-mare, la sõmblem, la maan-neere, la maan-sɩda, la bʋgsem, la yõk-m-menga.

²³ Tõogã ka kɩɩsd bõn-kãensã ye.

²⁴ Neb nins sẽn be a Zeezi Kiris pʋgẽ wã kaa b yĩngã ne a sẽn nonge, la a raabã fãa da-pɩk zugu.

²⁵ Tõnd sã n vɩ ne Wẽnnaam Sɩɩgã pãnga, bɩ d kẽn wa sẽn zems bãmb Sɩɩgã sẽn tɛt tõndã me.

²⁶ Bɩ d da lebg wuk-m-mens rãmba, n baood taab noore, la d maand sũ-kiir ne taab ye.