Galat Rãmba 3 - WẼNNAAM SEBRE 2014

Ned deegda Sɩɩg-sõng ne tẽebo

¹ Yãmb Galasi neb sẽn ka yam! Ãnda n belg yãmba, b bilga yãmb a Zeezi Kiris b sẽn ka da-pɩk zugã yellã vẽenegã ãnda n belg yãmba?

² Ad bũmb ning bal mam sẽn dat tɩ yãmb leok maam: Yaa yãmb sẽn maan tõogã sẽn yeelã yĩng la yãmb deeg Sɩɩg-sõngã bɩ, bɩ yaa yãmb sẽn kelg koe-noogã ne tẽebã?

³ Yãmb ka yamã taa a woto? Yãmb sẽn sɩng ne Sɩɩgã pãngã, yãmb na n baasa ne yĩng rẽnd moasã la?

⁴ Bũmb nins fãa yãmb sẽn yã wã yɩɩ zaalem la? Sã n yaẽ la zaalem!

⁵ Soab ning sẽn kõt yãmb Sɩɩgã la b maand bõn-bãn yãmb sʋkã, yaa yãmb sẽn sakd tõogã yĩng la b maand bɩ, bɩ yaa yãmb sẽn kelgd koe-noogã ne tẽebã yĩnga?

Wẽnnaam kãabg ne a Abrahaam

⁶ La ne a Abrahaam, a tẽe Wẽnnaam, la Wẽnnaam ges-a-la wa nin-tɩrga, a tẽebã yĩnga.

⁷ Dẽ wã, bɩ y reeg tɩ yaa neb nins sẽn tẽedã n yaa a Abrahaam kamba.

⁸ Woto, Wẽnnaam gʋls-sõamyã sẽn pĩnd n neẽ tɩ Wẽnnaam na n kɩtame tɩ bu-zẽmsã yɩ tɩrs tẽeb yĩngã, b pĩnd n togsa a Abrahaam koe-no-kãngã n yeele: Buud fãa na n paama bark fo yĩnga.

⁹ Woto, neb nins sẽn tar tẽebã naaga ne tẽeb soab a Abrahaam n paam barka.

¹⁰ Sɩd me, neb nins fãa sẽn teegd tõog tʋʋmã bee kãab-wẽng pʋgẽ, bala, b gʋlsame n yeele: Kãab-wẽng n be ned ning fãa sẽn ka sakd bũmb nins fãa sẽn gʋls seb-kãngã pʋgẽ, la a ka maand wa sẽn gʋlsã zugu.

¹¹ La yaa vẽeneg tɩ ned baa a yembr kõn paam tɩrlem Wẽnnaam taoor tõog yĩng ye, bala, nin-tɩrg na n vɩɩ ne tẽebo.

¹² Tõog yaool n ka yit tẽebẽ ye. La tõogã yetame tɩ ned ning sẽn na n maan-a wa sẽn gʋlsã, bõn-kãens na kɩt t'a vɩɩmde.

¹³ Kiris yolsa tõnd ne kãab-wẽngã, bãmb sẽn lebg kãab-wẽng tõnd yĩngã yĩnga. Bala, b gʋlsame tɩ kãab-wẽng n be ned ning sẽn lulg raoog zugã zugu.

¹⁴ Woto, a Abrahaam barkã na n zĩnda a Zeezi Kiris pʋgẽ bu-zẽmsã yĩnga, la ne tẽebo, bɩ tõnd deeg Sɩɩgã Wẽnnaam sẽn kãabã.

¹⁵ M ba-biisi, m dɩk ninsaalb mamsgo: Ned sã n gʋls sebr n wilg a sũur gomde, a sẽn dat tɩ yɩ to-to a kũum poore, baa ne sẽn yaa ninsaal n gʋlsã, ned baa a yembr ka kɩɩsd gomdã wall a paas-a bũmb ye.

¹⁶ Kãabdã sẽn kãabã yaa a Abrahaam ne a yagengã. B ka yeel tɩ yagense, wa b yaa wʋsg ye. Yaa a yembr tãa. B sẽn yeel tɩ ‹fo yagengã› dat n togsame tɩ Kirisi.

¹⁷ Ad mam gomdã võore: Yaa tɩ yam-yãkr ning Wẽnnaam sẽn yãke, n togs tɩ bu-zẽmsã, ka tõog sẽn yaool n wa yʋʋm kobs-naas la pis-tã rẽnda zugẽ wã n na n kiis-a, n kɩt tɩ kãabgã yɩ zaalem ye.

¹⁸ Bala, rogem‑pʋɩɩrã sã n dag n yitẽ tõogã pʋgẽ, a rag n kõn leb n yi kãabgẽ ye. Yaool n yaa kãabg pʋgẽ la Wẽnnaam ning b barkã a Abrahaam zugu.

Tõogã võore

¹⁹ La yaa bõe yĩng la b wa ne tõogã? Wẽnnaam yaool n waa ne tõogã n na puk nebã beegre, hal tɩ yageng ning Wẽnnaam kãabgã sẽn be a zugã na wa. Malegs n moon kãab-kãnga, la b tũnuga sɛ-yõakda.

²⁰ Sã n yaool n yaa nin-yend yelle, a ka baood sɛ-yõakd ye. La Wẽnnaam yaool n yaa b yembre.

²¹ Dẽ wã, tõogã kɩɩsda Wẽnnaam kãabgã la? Ayo! B sã n dag n kõẽ tõog sẽn tõe n kõ vɩɩm, tõogã dag n na n sɩd waa ne tɩrlem.

²² Wẽnnaam gʋls-sõamyã yeelame tɩ dũni gill fãa bee yel-wẽn maaneg pʋgẽ. Woto, yaa neb nins sẽn tẽed a Zeezi Kirisã n na n paam kũun ning Wẽnnaam sẽn kãabã, b sẽn tẽ wã yĩnga.

²³ Sẽn deng tẽebã waoongo, tõnd dag n bee tõogã yembdẽ n gũud tẽebã sẽn na n wa pukã.

²⁴ Woto, tõog yɩɩ tõnd gũuda n na n tɛ tõnd n taas Kiris nengẽ, tɩ ne tẽebo, tõnd na lebg tɩrse.

²⁵ Tẽebã sẽn wa wã, ka leb n yaa gũud‑kãng n so tõnd yɛs ye.

²⁶ Bala, yãmb sẽn tẽed a Zeezi Kirisã yãmb fãa yaa Wẽnnaam kamba.

²⁷ Yãmb sẽn deeg lisg Kiris pʋgẽ wã, Kiris luda yãmb wa fuugu.

²⁸ Ka leb n be tɩ m yaa Zʋɩf bɩ Gɛrka, yamb bɩ burkĩna, dao bɩ pag ye. Bala, yãmb fãa yaa yembr a Zeezi Kiris pʋgẽ.

²⁹ La yãmb sã n yaa Kiris nebã, dẽnd yãmb yaa a Abrahaam yagense, n yaa pʋɩt-n-taas ne a rogem-pʋɩɩrã wa b sẽn kãabã.