Galat Rãmba 1 - WẼNNAAM SEBRE 2014

Pʋʋsem

¹ Maam a Polle, mam yaa tẽn-tʋmda, la ka tẽn-tʋmd ninsaalb wall ned sẽn yãk ye. Yaa a Zeezi Kiris la ba a Wẽnnaam, soab ning sẽn vʋʋg a Zeezi tɩ b yi kũum sʋkã n yãk maam.

² Maam ne ba-biis nins fãa sẽn be ne maamã n gʋlsd wẽnd-dotã sẽn be Galasi wã.

³ Bɩ tõnd ba a Wẽnnaam ne tõnd Zu-soab a Zeezi Kiris ning yãmb barka, la b kõ-y bãane.

⁴ Kiris yaa soab ning sẽn kõ b vɩɩm tõnd yel-wẽnã yiisg yĩnga, tɩ b tõe n fãag tõnd n yiis-d dũni‑kãngã wẽngã pʋgẽ, wa sẽn zems tõnd ba a Wẽnnaam daabã.

⁵ Bɩ bãmb paam ziir wakat fãa, ãmina!

Koe-noog a to ka be ye

⁶ Yãmb sẽn wẽnemd tao-tao n bas soab ning sẽn bool-a yãmb Kiris maasem yĩng n na n tũ koe-noog a to wã linga maam.

⁷ Ka tɩ koe-noog a to n be ye, la neb n dãmbd yãmb n dat n teem Kiris koe-noogã.

⁸ La tõnd mensã, wall arzãn malɛɛk sã n togs yãmb koe-noog sẽn yaa toor ne koe-noog ning tõnd sẽn moon yãmbã, bɩ kãab-wẽng zĩnd a zugu.

⁹ Tõnd yeela yãmb pĩnda, la mam leb n yetame: Ned sã n togs yãmb koe-noog sẽn yaa toor ne koe-noog ning yãmb sẽn deegã, bɩ kãab-wẽng zĩnd a zugu.

¹⁰ Dẽ wã, mam dat n taa nebã yam bɩ, bɩ Wẽnnaam yam? Dẽ yĩnga, mam baoodame tɩ maan sẽn noom nebã la? Mam sã n dag n ket n maandẽ sẽn noom nebã, mam dag n kõn yaẽ a Kiris tʋmtʋmd ye.

A Poll koe-mooneg tʋʋmde

¹¹ M ba-biisi, mam yeta yãmb tɩ koe-noog ning mam sẽn moona ka yit ninsaal nengẽ ye.

¹² Bala, mam mengã ka reeg-a, wall m wʋm-a ned nengẽ ye, la yaa ne a Zeezi Kiris vẽnegre.

¹³ Sɩd me, yãmb wʋma mam yel-manesem sẽn yɩ to-to pĩnda, Zʋɩf-rãmbã kaoreng pʋgẽ. Wakat-kãnga, mam dag n namsda Wẽnnaam nin-tũusdsã, la m sãamd b roogã.

¹⁴ Zʋɩf‑rãmbã kaoreng pʋgẽ, mam dag n yɩɩda m rog-taasã wʋsg m buudã pʋga. Bala, mam dag n wɩngda ne m ba-rãmbã minindã sakr hal tɩ looge.

¹⁵ La sẽn dag n welg-a maam toor tɩ m nan ket n be m ma pʋgẽ, la b maan nimbãan-zoeer n bool maamã

¹⁶ sẽn wa n mik tɩ zemsame tɩ b puk b Bi-riblã ne maam, tɩ mam na moon b yellã bu-zẽmsã sʋkã, mam ka yals n sok ninsaal ye,

¹⁷ la mam ka kẽng Zeruzalɛm n babs neb nins sẽn deng-b maam n yaa tẽn-tʋmdbã ye. Mam kẽnga Araabi, la mam lebg n waa Damaase.

¹⁸ Yʋʋm a tãab rẽ zugẽ, mam kẽnga Zeruzalɛm n na n tɩ bao n bãng a Sefaase, la mam zĩnda ne-a dasem piig la a nu.

¹⁹ La mam ka yãnd tẽn-tʋmd a to baa a yembre, sã n ka Zu-soabã ma-biig a Zak bala.

²⁰ Mam sẽn gʋlsd yãmb yõwã wã, mam yeta yãmb Wẽnnaam taoor tɩ m ka yagd ye.

²¹ Dẽ poore, mam kẽnga Siiri ne Silisi soolmẽ.

²² La Wẽnd-dot nins sẽn be a Kiris pʋgẽ Zʋʋde wã dag n ka mi maam ye.

²³ B rag n wʋmame bal tɩ b yetẽ tɩ «ned ning sẽn dag n namsd tõndã moonda tẽeb ning a sẽn dag n dat n sãamã koɛɛg moasã.»

²⁴ La Wẽnd-do-kãens nebã rag n kõta Wẽnnaam waoogr mam wɛɛngẽ.