Ezekiyɛl 9 - WẼNNAAM SEBRE 2014

Zeruzalɛm sɩbgre

¹ Dẽ zugẽ, mam wʋma Sẽn-Ka-Saab koɛɛg sẽn zẽk n yetẽ: «Yãmb dãmb fãa sẽn tog n sɩbg tẽngã, kolg-y-yã! Bɩ yãmb ned kam fãa wa ne a sãoong zab-teoogo!

² Dẽ, raop a yoob n yi rignoor ning sẽn tees nug-rɩtg sẽnẽ tɩ b boond tɩ rigno-zãntlgã n wa, la bãmb ned kam fãa rag n zãada a sãang zab-teoog a nugẽ. La rao a yembr n dag n be bãmb sʋkã n yer lamd gĩs-bãaneg fuug tɩ gʋlsem sẽn wẽnd ned sẽn gʋls be a sẽbdgẽ wã. Bãmb wa n yalsa zũud tẽn-kugrã sɛɛgẽ.

³ Israyɛll Wẽnnaamã ziir zẽkame n bas Serubẽ-rãmbã, zĩig ning a sẽn dag n beẽ wã, n kẽng Wẽnd doogã rignoor sẽnẽ. La a boola soab ning sẽn yer-a lamd gĩs-bãaneg fuugã, tɩ gʋlsem sẽn wẽnd ned sẽn gʋls be a sẽbdgẽ wã.»

⁴ Sẽn-Ka-Saab yeela yẽnda yaa: «Saag tẽngã pʋga, saag Zeruzalɛm tẽnga pʋga, n ning neb nins fãa sẽn wẽed sir la b wõosd tʋʋm-beed nins fãa sẽn maand tẽngã pʋgã yĩngã dĩir bãnde.»

⁵ La mam nifẽ, a yeela neb a taabã yaa: «Pʋgl-y-yã-a n saag tẽngã n kʋ nebã. Da zoe-y nimbãaneg ye, la y ra bas ned ba a yembr ye.

⁶ Kʋ-y la y sãam nin-kẽembã, kom-bɩɩsã, pʋg-sadbã, pagbã, la zagsã neb fãa. Bas-y ned ning fãa sẽn tar-a bãndã, la y sɩng ne mam zĩig ning sẽn welg toorã! Dẽ, bãmb sɩnga ne kãsem-dãmb nins sẽn dag n be Wẽnd doogã noorã.»

⁷ Sẽn-Ka-Saab yeela bãmb yaa: «Kɩt-y tɩ roogã rẽgme, la y kɩt t'a zagsã pid ne kũum! Yi-y-yã!» Dẽ, bãmb yiime n kẽ tẽngã pʋgẽ n kʋ.

⁸ La bãmb sẽn wa n ket n kʋʋd tɩ mam yasẽ wã, mam lʋɩɩme n fõgen m neng tẽng n kelem n yeel yaa: «Kayto! Zu-soab a Sẽn-Ka-Saabo, yãmb na n sãama Israyɛll bu-kellã zãnga, n puug y sũurã ne Zeruzalɛm?»

⁹ Bãmb leoka maam n yeel yaa: «Israyɛll ne Zʋʋda buudã kongr yaa kãseng tɩ looge. Tẽngã pida ne zɩɩm daagre, la zãmbo, bala, bãmb yetame tɩ Sẽn-Ka-Saab basa tẽngã, la Sẽn-Ka-Saab ka ne baa fɩ ye.

¹⁰ Yaa rẽ yĩng tɩ mam ka na n zoe b nimbãaneg ye, la m ka na n bas ned ba a yembr ye. Mam na n kɩtame tɩ b yel-manesmã taal lebg n lʋɩ b zugu.»

¹¹ Rao ning sẽn yer-a lamd gis-bãaneg fuugã tɩ gʋlsem be a sẽbdgẽ wã lebg n wa yeela Sẽn-Ka-Saab yaa: «Ade, mam maana bũmb ning yãmb sẽn kõ maam noor tɩ m maanã.»