Ezekiyɛl 8 - WẼNNAAM SEBRE 2014

Wẽn-naands pʋʋsgã kẽe Wẽnd doogã pʋga

¹ B sẽn yõg Israyɛll buudã n kẽes yembd tɩ yʋʋm-yoaablẽ, kiuug a yoob soabã dasem a nu daare, mam dag n zĩ m zakẽ wã, tɩ Zʋʋda kãsem-dãmbã zĩ mam taoore, la Zu-soab a Sẽn-Ka-Saab nugã gãda maam.

² Mam gesame, la ade, mam yãnda bũmb sẽn wẽnd ninsaala. La sẽn sɩng a sɛɛgã tɛk n tar n dabd tẽngrã rag n yaa wa bugum. La a sɛɛgã tɛk n tar n dabd zugẽ wã rag n yãnga ne vẽenem sẽn yãgda.

³ Yẽnda tẽega bũmb sẽn wẽnd ninsaal nug n gãd mam zoobdã. Dẽ, sɩɩgã zẽka maam yĩngri, n tall maam Wẽnnaam vẽnegr pʋsẽ n kẽng Zeruzalɛm n tɩ sik maam tẽngã noor ning sẽn be nug-rɩtgã, zĩig ning sũ-kiir wẽn-naandgã sẽn be, n nekd Wẽnnaam sũ-kiirã.

⁴ La Israyɛll Wẽnnaamã ziir dag n bee be. La bãmb yalẽ wã rag n yaa wa mam sẽn dag n yãnd-a longã pʋgã.

⁵ La Wẽnnaam yeela maam yaa: «Ninsaala, mam kotame tɩ f zẽk f nengã n ges rɩtg sẽnẽ! La mam zẽka m neng n ges nug-rɩtg sẽnẽ wã, n yãnd wẽn-naandg ning sẽn nekd Wẽnnaam sũ-kiirã, t'a be rignoor ning sẽn dabd tẽn-kugrã sẽnẽ wã rɩtgo, kõomã zĩigẽ.»

⁶ Bãmb leb n yeela maam yaa: «Ninsaala, fo nee Israyɛll buudã sẽn maandã bɩ? Fo nee yel-be-kãsems nins bãmb sẽn maan n kɩt tɩ mam zãag ne m zĩig ning sẽn welg toorã bɩ? La fo na n leb n yãnda yel-be-kãsems a taaba.»

⁷ Dẽ, bãmb talla maam n kẽng zakã noore. La mam yãame tɩ lalgã tara võore.

⁸ La bãmb leb n yeela maam yaa: «Ninsaala, m kotame tɩ f poog lalgã!» Dẽ, mam poogã lalgã, la lebga noore.

⁹ Wẽnnaam leb n yeela maam yaa: «Kẽ n ges yel-be-wẽns nins bãmb sẽn maand ka wã!»

¹⁰ Mam kẽeme n gese, la mam yãnda bõn-yɩgdɩ ne rũms buud fãa sẽn yaa yel-yoodo, ne Israyɛll buudã wẽn-naands fãa b sẽn kar lalgã zug n gilgi.

¹¹ La Israyɛll buudã kãsem-dãmb pis-yopoe n dag n yɛs beenẽ, la a Safan biig a Yazaniya dag n yasa bãmb taoore, la b fãa rag n zãada wisd tʋgdo, tɩ wisdã bug-zõos nukdẽ.

¹² Bãmb leb n yeela maam yaa: «Ninsaala, fo nee Israyɛll buudã kãsem-dãmb sẽn be lik pʋgẽ n maand bũmb ninsã bɩ? Bãmb ned kam fãa roog pida ne wẽn-naandse.» Bãmb yetame: «Sẽn-Ka-Saab ka ne tõnd ye. Sẽn-Ka-Saab basa tẽngã!»

¹³ Sẽn-Ka-Saab yeela maam yaa: «Ninsaala, fo na n leb n yãnda b sẽn maand yel-beed a taab sẽn yɩɩd woto.»

¹⁴ Dẽ, bãmb leb n talla maam n kẽng Wẽnd doogã rignoor ning sẽn be nug-rɩtg sẽnẽ wã. La pagb n dag n zĩ beenẽ n yãbd wẽn-naandg a Tamuuzi.

¹⁵ La bãmb leb n yeela maam yaa: «Ninsaala, fo ka ne sɩda? Fo na n leb n yãnda yel-beed a taab sẽn yɩɩd woto.»

¹⁶ Bãmb leb n talla maam n kẽng Sẽn-Ka-Saab roogã zak pʋgẽ, la Sẽn-Ka-Saab roogã rignoore, zãongã ne tẽn-kugrã sʋka, raop sõor sẽn kolg pisi la a nu n dag n wẽnemd b poor n tees Sẽn-Ka-Saab roogã, tɩ b nensã get yaanga. Bãmb dag n wõgemdedame n teesd yaang n waoogd wĩntoogã.

¹⁷ La bãmb yeela maam yaa: «Ninsaala, fo ka ne sɩda? Dẽ yĩnga, Zʋʋda buudã nebã sẽn maand yel-beed ninsã ka sek-ba, tɩ b ket n kẽngd taoor n kɩɩsd maam n pidsd tẽngã ne pãn-maanego? Ade, bãmb baooda mam noore.

¹⁸ Mam na n sɩbg-b-la ne sũ-puugri. Mam ka na n zoe bãmb nimbãanega, la m ka na bas bãmb ned ba a yembr t'a põs ye. Bãmb sã n wa zẽk b koees n kelem n bool maam, mam ka na n kelg-b ye.»