Ezekiyɛl 6 - WẼNNAAM SEBRE 2014

Sɩbgr wẽn-naands pʋʋsdbã yĩnga

¹ Sẽn-Ka-Saab goma ne maam n yeel yaa:

² «Ninsaala, wẽnemd f neng n tees Israyɛll tãmsã n togs pĩnd-n-bãngr goam n yeel yaa:

³ ‹Israyɛll tãmse, kelg-y Zu-soab a Sẽn-Ka-Saab koɛɛgã! Ad Zu-soab a Sẽn-Ka-Saab sẽn gomd ne tãmsã ne kunkubã, la bogdã ne londã n yetẽ: ‹Mam mengã n na n kɩt tɩ b wa zab ne yãmba, n kɩt tɩ b menes y maoong kʋʋb zĩisã.

⁴ B na n sãama y tẽn-kugã, la b wã y wisd yõogr laasã, la b kʋ y nebã n dʋʋg y wẽn-naandsã taoore.

⁵ Mam na n dʋʋga Israyɛll nebã kũum b wẽn-naandsã taoore. Mam na n sãeega y kõabã n gilg y tẽn-kugã.

⁶ Yãmb sẽn be zĩig ning fãa, b na n kɩtame tɩ y tẽmsã lebg raboodo, la b sãam y maoong kʋʋb zĩisã. Woto, yãmb tẽn-kugã zĩis na n lebga raboodo, b na n wã y wẽn-naandsã tɩ b menem zãnga, b na n wã y wisd yõogr laasã, la b na n menesa yãmb nus tʋʋmã.

⁷ Yãmb sʋkã neb n na n ki. Woto, yãmb na bãng tɩ yaa maam la Sẽn-Ka-Saabo.

⁸ La baoosgo, yãmb sã n wa sãeeg n be tẽmsã fãa pʋse, mam na n kɩtame tɩ yãmb neb kẽer põs zabr sʋʋga, buud toay-toayã sʋka.

⁹ Dẽ, bãmb sã n wa be buud toay-toayã sʋka, zĩig ning b sẽn na n tall bãmb n tɩ kẽes yembdã, yãmb neb nins sẽn põsã na n tẽega mam yelle, soab ning sẽn sãam-a bãmb sũyã sẽn yaa yoaadb sũyã sẽn wẽnemd n zãag ne maamã, la bãmb ninã sẽn dag n get b wẽn-naandsã ne yoob gesgã. Bãmb yam na n yi b mense, b tʋʋm-wẽnsã ne b yel-beedã fãa yĩnga.

¹⁰ Woto, bãmb na n bãngame tɩ mam yaa Sẽn-Ka-Saabo, la mam sẽn gom tɩ m na n kɩtame tɩ to-kãngã paam-bã ka zaalem yĩng ye.»

¹¹ Ad Zu-soab a Sẽn-Ka-Saab sẽn yeta: «Mobg f noor n gir f zug Israyɛll buudã yel-beedã yĩnga, la ne bãmb sẽn na n ki ne zabr sʋʋgã yĩnga, la kom ne bãn-longdsã yĩng n yeel tɩ kayto!

¹² Sẽn be-a zĩ-zãrgẽ na n kii ne bã-loangdga, la sẽn pẽ-a na n kii ne zabr sʋʋga, la sẽn na n põs-a n ka ki, kom n na n kʋ-a. Mam na n basame tɩ m sũ-puugrã maan a tʋʋmd ne bãmb n tãag a tɛka.

¹³ Dẽ, kũumã sã n wa rʋr bãmb wẽn-naandsã sʋka, n gilg b tẽn-kugã, n be b kunkubã ne tãmsã zutu, ne b tɩɩs sẽn tar maasmã tẽngre, la b tɩ-bɛdã sẽn yaa bĩmm wã tẽngre, zĩig ning bãmb sẽn yõogd kũun sẽn tar yũ-noog b wẽn-naandsã fãa yĩngã, b na yaool n bãng tɩ mam yaa Sẽn-Ka-Saabo.

¹⁴ Mam na n tẽega m nug n zab ne bãmb n kɩt tɩ tẽngã lebg vɩʋʋgo, la a na n yɩɩ zĩ-vɩʋʋg n yɩɩd Dibla we-raoogã, zĩis nins fãa bãmb sẽn be wã pʋgẽ. Woto, bãmb na bãng tɩ mam yaa Sẽn-Ka-Saabo.»