Ezekiyɛl 47 - WẼNNAAM SEBRE 2014

Ko-bundum sẽn yit Wẽnd doogã pʋga

¹ Raoã talla maam n lebg n wa Wẽnd doogã rignoor sẽnẽ. La koom n dag n bund n yit rigno-kaok tẽngre, yaang sẽnẽ, bala Wẽnd doogã rignoor dag n teesa yaanga. Koomã rag n zoeta Wẽnd doogã nug-goabg kɩrengã tẽngre, tẽn-kugrã nug-rɩtg sẽnẽ.

² Yẽnda kɩtame tɩ mam tũ sor ning sẽn dabd nug-rɩtg sẽnẽ dignoorẽ wã n yi, la a kɩt tɩ mam gilg Wẽnd doogã yɩngã hal n tãag yaang sẽnẽ dignoorã yɩnga. La koomã rag n zoeta nug-rɩtgo.

³ Raoã sẽn wa yi n na n tees yaang sẽnẽ wã, a rag n zãada wĩir a nugẽ, la yẽnda maka kãntɩɩg tusri, n yeel maam tɩ m dʋʋge, la koomã rag n tekda m nao-sũgsi.

⁴ A leb n maka kãntɩɩg tusri, n yeel maam tɩ m dʋʋge, la koomã rag n tata m dũma. Yẽnda leb n maka kãntɩɩg tusri, n yeel maam tɩ m dʋʋge, la koomã rag tata m sɛɛga.

⁵ A leb n maka kãntɩɩg tusri, la a lebga ko-zoetem tɩ mam ka tõe n dʋʋg ye. Koomã lebga zulunga, tɩ rag n yaa tɩlɛ tɩ f rugi. Rag n yaa ko-zoetem tɩ ned rag n ka tõe n dʋʋg ye.

⁶ Raoã soka maam yaa: «Ninsaala, fo yãame?» La yẽnda leb n talla maam n wa ko-zoetmã noore.

⁷ La sẽn ta beenẽ, mam yãame tɩ tɩɩs wʋsg n dag n be ko-zoetmã noor goabg la rɩtgo.

⁸ Yẽnda yeela maam yaa: «Ko-kãngã rabda yaanga, n na n sig tẽn-nabd-koɛɛngẽ wã, n tɩ kẽ yamsem ko-kãsengã pʋga. La a sã n wa kẽ ko-kãsengã pʋga, koomã na n lebga sõama.

⁹ Koomã sẽn ta zĩig ning fãa, bõn-vɩɩlɩ wã fãa na n vɩɩmdame. Zĩmã me na n lebga wʋsgo, bala, ko-kãng na n zoe n taa beenẽ, la yamsem ko-kãsengã na n lebga sõama, la vɩɩm na n zĩnda zĩig ning fãa ko-zoetmã koomã sẽn na n ta wã.

¹⁰ Woto, zĩm-yõagdbã na n yɛsa beenẽ. Bãmb na n yɛdga b zĩm-gãmbã wã sẽn sɩng ne Ɛn-Gedi n tɩ ta Ɛn-Eglayim. Zĩm-kãens na n yɩɩ wa ko-kãsengã pʋgẽ zĩmã, wa sẽn zems b buudu. B na n yɩɩ wʋsg-wʋsgo.

¹¹ A bãtã ne a bulsã koom ka na n tek ye. B na n kell n yɩɩ yamsem.

¹² Ko-zoetmã noore, goabg la rɩtgo, tɩ-rɩts buud toor-toor n na n yi be. Bãmb vãadã kõn tol n kʋɩ, la b biisã me kõn tol n sɛ ye. Kiuug fãa, b na n womda bi-paala, bala, koomã yita zĩig ning sẽn welg toorã pʋga. B na n dɩta a biisã, la b tar a vãadã n tɩpdẽ.»

Sẽn-Ka-Saab yãka Israyɛll todsã

¹³ Ade, Zu-soab a Sẽn-Ka-Saab yetame: «Tẽng ning yãmb sẽn na n pʋɩ n kõ Israyɛll buud piig la a yiibã tɩ yɩ b pʋɩɩrã tods la woto. A Zozɛf buudã tog n paama pʋɩɩr a yiibu.

¹⁴ Tẽngã na n yɩɩ yãmb soolem, wa mam sẽn dag n zẽk m nug n wẽen n yeel tɩ m na n kõ y yaab-rãmbã. Dẽ, tẽngã yaa yãmb pʋɩɩre.

¹⁵ Ad tẽngã todse: Nug-rɩtg sẽnẽ kɩrengã, yaa sẽn sɩng ne ko-kãsengã, sor ning sẽn yit Ɛtlon sẽnẽ wã, hal n tãag Sedaad tẽngã kõomã zĩigẽ wã,

¹⁶ ne Hamate, la Berota ne Sibrayim sẽn be Damaas soolmã ne Hamat soolmã sʋkã, la Hatsɛɛr-Tikon sẽn be Horan toadgã sẽnẽ wã.

¹⁷ Dẽ, toadgã na n yɩɩ sẽn sɩng ne ko-kãsengã, ne Hatsaar-Eyinon la Damaase, ne Safon sẽn be nug-rɩtg sẽnẽ wã, la Hamat toadgã: Beenẽ n na n yɩ nug-rɩtg sẽnẽ kɩrengã.

¹⁸ Yaang sẽnẽ kɩrengã na n yɩɩ sẽn sɩng ne Zʋrdẽ kʋɩlgã sẽn be Horan ne Damaas sʋkã, la Galaad ne Israyɛll tẽngã sʋkã. Yãmb na n maka sẽn sɩng ne nug-rɩtg toadgã, n tɩ tãag yamsem ko-kãsengã yaangã. Beenẽ n na n yɩ yaang sẽnẽ kɩrengã.

¹⁹ Nug-rɩtg sẽnẽ kɩrengã sẽn be nug-goabg sẽnẽ wã na n yɩɩ sẽn sɩng ne Tamaar n tall n tãag Meriba sẽn be Kadɛɛsã koomã, n tɩ tãag ko-zoetmã sẽn be ko-kãsengã sẽnẽ wã. Beenẽ n na n yɩ nug-rɩtg kɩrengã sẽn be rɩtgã.

²⁰ Nin-taoor sẽnẽ kɩrengã na n yɩɩ ko-kãsengã, sẽn sɩng ne toadgã n tall n tãag Hamat tẽngã kõom zĩigẽ: Beenẽ n na n yɩ nin-taoor kɩrengã.

²¹ Yãmb na n pasa tẽn-kãngã n pʋɩ taaba, wa sẽn zems Israyɛll buudã sõore.

²² Maan-y poeer n pʋɩ tẽngã tɩ yɩ yãmb pʋɩɩre, la sãambã sẽn be yãmb sʋk n na n dog kambã me pʋɩɩre. Yãmb tog n geelga bãmb wa tẽngã neb sẽn be Israyɛll nebã sʋka. Bãmb me na n naaga yãmb n paam pʋɩɩr Israyɛll buud toay-toayã sʋka, wa sẽn zems poeerã sẽn yãkã.

²³ Woto, yaa buud ning pʋg sãanã sẽn na n zĩndã pʋgẽ, la yãmb na n kõ-a a pʋɩɩrã. Maam a Zu-soab a Sẽn-Ka-Saab n yeele.»