Ezekiyɛl 46 - WẼNNAAM SEBRE 2014

Noy sẽn welg toor naabã yĩnga

¹ Ade, Zu-soab a Sẽn-Ka-Saab yetame: «Pʋgẽ zakã rignoor sẽn tees yaang sẽnẽ wã tog n paga rasem a yoobã sẽn yaa tʋʋm dayã, n yaool n pak-a vʋʋsg daarã, ne ki-paalgã.

² Naabã na n tũu yɩng rignoorã zãong n kẽ, n tɩ yals kʋɩlengã ra-lugds sɛɛga. Maan-kʋʋdbã na n maana naabã maoong sẽn yõogd bugmã, ne a zems-n-taar maandã. Naabã na n wõgemda rigno-koakẽ wã, la a lebg n yi, la b ka tog n pag kʋɩlengã tɩ ka ta zaabr ye.

³ Tẽngã neb na n wa wõgemda Sẽn-Ka-Saab taoor rigno-kãng noore, vʋʋsg rayã ne ki-paalsã wakate.

⁴ Naabã sẽn na n maan maoong sẽn yõogd bugum n kõ Sẽn-Ka-Saab vʋʋsg daarã, tog n yɩɩ ne pe-bi a yoob sẽn ka tar zanga, ne pe-raoog sẽn ka tar zanga.

⁵ A tog n baoo bõn-koaadl kũun zom peoog a yembr n tũnug pe-raoogã, la a bao a sẽn tare, n tũnug pe-bi wã. La zom peoog fãa paasda kaam lens a yiibu.

⁶ Ki-paalg yiib daare, naabã na n waa ne loalg sẽn ka tar zanga, ne pe-bi a yoob sẽn ka tar zãnga, la pe-raoog sẽn ka tar zãnga.

⁷ Loalgã tũnugda ne zom peoogo, pe-raoogã me tũnugda ne zom peoogo. Sã n yaa ne pe-bi wã, a kõta wa sẽn zems a paoongo. La zom peoog fãa paasda kaam lens a yiibu.

⁸ Naabã sã n na n kẽ, a tog n tũu rignoorẽ zãongã n kẽ, la a leb n tũ beenẽ n yi.

⁹ Tẽngã neb sã n wa Sẽn-Ka-Saab taoor n na n wõgemd n waoog-b tigã wakate, ned sã n tũ nug-rɩtg sẽnẽ dignoorã n kẽ, a tog n tũu nug-goabg sẽnẽ dignoorã n yi. La ned sã n tũ nug-goabg sẽnẽ dignoorã rignoorã n kẽ, a tog n tũ nug-rɩtg sẽnẽ dignoorã n yi. Fo sẽn tũ rignoor ning n kẽ wã, f ka tog n leb n tũ beenẽ n yi ye. Yaa rignoor ning sẽn tot-a foomã la f na n tũ n yi.

¹⁰ Nebã sã n wa kẽedẽ, naabã me tog n naag n kẽeme. B sã n wa leb n yita, a tog n naag n yiime.»

Maand toay-toay noyã

¹¹ Tigã wakate, nebã sã n tigim taaba, b tog n tũnuga loalgã ne bõn-koaadlã kũun peoog a yembre, la pe-raoogã me tũnugda ne bõn-koaadlã kũun peoog a yembre. Sã n yaa ne pe-bi wã, b kõta b sẽn tare. La zom wamd fãa paasda kaam lens a yiibu.

¹² Naabã sã n dat n maan maoong sẽn yõogd bugum ne yamleoogo, wall zems-n-taar maoong ne yamleoog Sẽn-Ka-Saab yĩnga, yaa yaang sẽnẽ rignoorã la b tog n pak t'a kẽ. Yẽnda na n maana a maoong sẽn yõogd bugmã ne a zems-n-taar maoongã wa a sẽn minim n maand vʋʋsg daarã n yaool n yi. La a sã n wa yi, bɩ b lebs rignoorã n page.

¹³ Daar fãa, fo na n baoo pe-bil sẽn tar yʋʋmd n ka tar zanga, n maan maoong sẽn yõogd bugum Sẽn-Ka-Saab yĩng yibeoog fãa.

¹⁴ Yibeoog fãa, fo na n waa ne bõn-koaadl kũuni, n paas ne zom wamde, la kaam wũmbla sẽn na n nag zomã. Yaa kũun Sẽn-Ka-Saab yĩnga. Tõ-kãng yaa wakat fãa yĩnga.

¹⁵ Yibeoog fãa b na n kõo pe-bilã, zomã ne kaamã sẽn tũnugd-a wã tɩ yɩ maoong sẽn yõogd bugum wakat fãa yĩnga.»

¹⁶ Ade, Zu-soab a Sẽn-Ka-Saab yetame: «Naabã sã n yãk zĩig n kõ a biig a yembre, zĩ-kãng na n yɩɩ bi-kãng kambã soolem. Zĩ-kãng na n yɩɩ bãmb dogem pʋɩɩre.

¹⁷ La yẽnda sã n yãk zĩig a sẽn so wã pʋg n kõ a tʋmtʋmd a yembre, tʋmtʋmdã na n sooga zĩ-kãng hal n tãag bas-taal yʋʋmdã, tɩ zĩigã yaool n leb n lebg naabã rẽnda. Woto, naabã sẽn so wã fãa na n yɩ a kambã rẽnd bala.

¹⁸ Naabã ka tog n deeg zĩig ba a yembr nebã sẽn so wã pʋg ye. A ka tog n deeg nebã zĩis n bas-b ye. Yaa yẽnda mengã sẽn so wã pʋg la a tog n yãk n kõ a kambã, sẽn na yɩl tɩ mam nebã ra sãeege, tɩ b ned kam fãa zãag ne a zĩig ye.»

Wẽnd doogã ragend zĩisi

¹⁹ Raoã talla maam n tũ kõomã zĩig ning sẽn be rignoorã sẽnẽ wã, rot nins sẽn welg toor maan-kʋʋdbã yĩnga, rot nins noy sẽn tees nug-rɩtg sẽnẽ wã. Zĩig n dag n be zakã yaang neng taoore.

²⁰ Yẽnda yeela maam yaa: «Yaa zĩ-kãngã la maan-kʋʋdbã na n dʋgd sugr kosg maoongã ne yel-wẽnã sugr kosg maoongã nemdo, la yaa zĩ-kãng me la b tog n dʋgd bõn-koaadl kũunã, sẽn na n yɩl n da wa tall-b n kẽng yɩng zakã pʋga, n kɩt tɩ nebã lebg neb sẽn welg toor ye.»

²¹ Dẽ poore, raoã yiisa maam n kẽes yɩng zakã pʋga, n kɩt tɩ mam kẽng zakã gõad a naasã zĩisẽ. La zak n dag n be zakã gõdr fãa zĩigẽ.

²² Zakã gõad a naasã zĩisẽ, zags n dag n be beenẽ n yaa zag-bãoonego. B woglmã rag n yaa kãntɩɩg pis-naase, tɩ b yalmã yaa kãntɩɩg pis-tã. Bãmb b naasã fãa sẽn be gõadẽ wã rag n zema taaba.

²³ B naasã fãa rag n tara lal-gũbri, la b rag n manega ragend zĩis n dɩdg lal-gũbrã n gilgi.

²⁴ Raoã yeela maam yaa: «Ro-bãmbã yaa rɩɩb seglg roto, zĩis nins neb nins sẽn tʋmd Wẽnd doogã pʋgã sẽn na n wat n dʋgd nebã maand nemdo.»