Ezekiyɛl 45 - WẼNNAAM SEBRE 2014

Zĩis b sẽn yãke

¹ Yãmb sã n wa maan poeer n pʋɩ tẽngã n kõ buud fãa ne a pʋɩɩre, yãmb na n yãka zĩig sẽn welg toor Sẽn-Ka-Saab yĩnga, t'a woglmã yɩ kãntɩɩg tus pisi la a nu, t'a yalmã yaa kãntɩɩg tus piiga. Zĩ-kãng tiirã zãng na n yɩɩ bũmb sẽn welg toor Sẽn-Ka-Saab yĩnga.

² Zĩig ning sẽn welg toorã na n yɩɩ maoko, t'a woglmã ne a yalmã yaa kãntɩɩg kobs-nu. La vɩʋʋg yalem sẽn yaa kãntɩɩg pis-nu n gilg a zãngã.

³ Zĩ-kãng woglem sẽn yaa kãntɩɩg tus pisi la a nu, t'a yalmã yaa kãntɩɩg tus piigã pʋga, fo na n yãka zĩiga, zĩig ning sẽn welg toorã yĩnga, ne zĩig sẽn welg toor n yɩɩd fãa wã yĩnga.

⁴ Zĩ-kãng na n yɩɩ zĩig sẽn welg toor b sẽn yãk tẽngã pʋga. Zĩ-kãng yaa maan-kʋʋdbã sẽn tʋmd zĩig ning sẽn welg toorã pʋg rẽnda. Bãmb bee Sẽn-ka-Saab taoor n tʋmd bãmb yĩnga. Bãmb dotã na n zĩnda beenẽ, la zĩ-kãng na n welga toore, zĩig ning sẽn welg toorã yĩnga.

⁵ Yãk-y zĩig woglem sẽn yaa kãntɩɩg tus pisi la a nu t'a yalmã yaa kãntɩɩg tus piiga, ne rot pisi, n kõ Leevi nebã sẽn tʋmd Wẽnd doogã pʋgẽ wã.

⁶ Leb-y n yãk-y zĩig yalem sẽn yaa kãntɩɩg tus a nu, t'a woglmã yaa kãntɩɩg tus pisi la a nu, tɩ yaa kũun sẽn welg toore. Zĩ-kãng na n yɩɩ tẽngã soolem, n yaa Israyɛll buudã fãa rẽnda.

⁷ Naabã na n sooga zĩig ning b sẽn yãk tɩ yaa zĩig sẽn welg toorã, ne tẽngã sẽn so wã kɩrems a yiibã, sẽn yaa zĩig ning b sẽn yãk tɩ yaa zĩig sẽn welg toorã, ne tẽngã sẽn so wã wogellã, nin-taoor kɩrengã sẽn teesd nin-taoorã sẽnẽ wã, ne yaang kɩrengã sẽn teesd yaangã sẽnẽ wã, t'a woglmã zems pʋɩɩr a yembre, sẽn sɩng ne toadgã sẽn be nin-taoorã, n tɩ tãag toadgã sẽn be yaangã.

⁸ Zĩ-kãng na n yɩɩ naabã zĩiga, la a soolem Israyɛll pʋgẽ. Mam nanambsã kõn leb n wẽg mam nebã ye. Bãmb na n basa tẽngã tɩ Israyɛll buudã sooge, wa sẽn zems Israyɛll buud toay-toayã.

Naab sẽn tog n paam ne a sẽn tog n maane

⁹ Ade, Zu-soab a Sẽn-Ka-Saab yetame: «Israyɛll nanambse, y sẽn maandã ya n looga nugu! Ya-y n bas-y pãn-maanegã ne sãoongã, la y maan sẽn zems la sẽn yaa tɩrga. Bas-y mam nebã fãabo. Yaa maam a Zu-soab a Sẽn-Ka-Saab n yeele.»

¹⁰ Bɩ ned kam fãa mag ne zɩslem makdg la bõn-magdɩ sẽn yaa sõama.

¹¹ Bõn-magds a yiibã, efa la bat tog n zema taaba. Bãmb piig n pit makdg sẽn yaa omɛɛre.

¹² Sã n yaa zɩslmã magbo, sɩkl yaa geera rãmb pisi. La min yaa sikl-dãmb pis-yoobe.

Kũun ne maand la tigri

¹³ Ad yãmb sẽn na n yãk Kũunã to-to: Yãmb na n weela y bɩle wã ne y koodã zĩis pis-yoob n yãk a yembr n kɩse.

¹⁴ La y weel y kaamã zĩis koabg n yãk a yembr n kɩse.

¹⁵ Israyɛll rũm-bãg nins sẽn be yamdã sẽn yaa wʋsg zĩigẽ n tar dũms sõor sẽn tat kobessi wã pʋgẽ, yãk-y peosg a yembre, wall bʋʋg a yembre. Rũm-bãmb na n yɩɩ bõn-koaadl maoongã ne maoong sẽn yõogd bugmã, la ne zems-n-taar maoongã, sẽn na yɩl n yiis bãmb yel-wẽnã. Maam a Zu-soab a Sẽn-Ka-Saab n yeele.

¹⁶ Tẽngã nebã fãa tog n yãka kũun-kãng n kõ Israyɛll naabã.

¹⁷ Naabã n na n maan maand sẽn yõogd bugmã, ne bõn-koaadl kũunã, la bõn-yũudl kũunã, tigã zĩisẽ, ki-paalã tig zĩisẽ, ne vʋʋsg rayã wakate, n paas tig nins fãa Israyɛll buudã sẽn na n maanã pʋse. Yẽnda n na n maand yel-wẽnã sugr kosg maoongã, la a kõt bõn-koaadl kũunã, ne maoong sẽn yõogd bugmã, la zems-n-taar maandã, sẽn na n yɩl n yiis Israyɛll buudã yel-wẽnã.»

Noy sẽn kẽed ne tigã wɛɛngẽ

¹⁸ Ade, Zu-soab a Sẽn-Ka-Saab yetame: «Pipi kiuugã pipi daare, bɩ f bao loalg sẽn ka tar zanga, n maan maoong n yiis zĩig ning sẽn welg toorã yel-wẽnã.

¹⁹ Maan-kʋʋdã na n yãka yel-wẽnã yiisg maoongã zɩɩm, n ning Wẽnd doogã kʋɩleng ra-lugdsã zutu, ne tẽn-kugrã yẽbgrã kɩrems a naasã, n paas pʋgẽ zakã kʋɩlems ra-lugds zutu.

²⁰ Fo na n leb n maana a woto kiuugã rasem a yopoe wã daare, ned ning sẽn tudg-a n maan yel-wẽnã, wall sẽn maan-a yel-wẽnã ne yĩdgã yĩnga. Yãmb na n maana a woto Wẽnd doogã yel-wẽnã yiisg yĩnga.

²¹ Pipi kiuugã rasem piig la a naasã daar na n yɩɩ Pak tigr yãmb yĩnga. Yaa rasem a yopoe tigri. Badaare, b na n dɩɩ bur sẽn ka rã-bɩlle.

²² Badaare, naabã na n maana loalg maoongo, yẽnda mengã ne tẽngã nebã fãa yel-wẽnã sugr kosg yĩnga.

²³ Tigrã rasem a yopoe wã fãa pʋga, daar fãa, naabã na n baoo lols a yopoe ne pe-raad a yopoe sẽn ka tar zanga, n maan maoong sẽn yõogd bugum Sẽn-Ka-Saab yĩnga. Rasem a yopoe wã fãa pʋga, daar fãa, yẽnda na n baoo boɛɛg n maan maoong yel-wẽnã sugr kosg yĩnga.

²⁴ Loalg bɩ pe-raoog fãa tũnugda ne zom peoogo, la kaam ne sĩn-bila.

²⁵ La kiuug a yopoe soabã rasem piig la a nu wã daare, tigrã rasem a yopoe wã fãa wakate, naabã na n maana yel-wẽnã sugr kosg maoongã, ne maoong sẽn yõogd bugmã, la a kõ bõn-koaadl kũunã ne kaamã kũunã, wa a sẽn maan pĩndã.»