Ezekiyɛl 43 - WẼNNAAM SEBRE 2014

Wẽnnaam ziirã leb n waa Wẽnd doogẽ wã

¹ Raoã talla maam n kẽng noor ning sẽn be-a yaang sẽnẽ wã.

² La ade, mam yãnda Israyɛll Wẽnnaamã ziir sẽn puk yaang sẽnẽ n watẽ. Bãmb koɛɛgã rãamd dag n wẽnda ko-kãsemsã rãamde. La dũniyã rag n yãgda ne bãmb ziirã.

³ Vẽnegr ning mam sẽn dag n ne wã wẽnda vẽnegr ning mam sẽn dag n yãnd tẽngã sãoong wakatã. La vẽneg-kãens rag n wẽnda vẽnegr ning mam sẽn dag n yãnd Kebaar kʋɩlgã noorã. La mam wõgemdame n fõgen m neng tẽnga.

⁴ La Sẽn-Ka-Saab ziirã tũu yaang sẽnẽ dignoorã n kẽ Wẽnd doogã pʋga.

⁵ Dẽ, Wẽnnaam Sɩɩgã zẽka maam n kẽes pʋgẽ zakẽ wã, la Sẽn-Ka-Saab ziirã rag n pita Wẽnd doogã.

⁶ Mam wʋma ned sẽn dag n be roogã pʋg n gomd ne maam, la rao n dag n yɛs mam sɛɛgẽ.

⁷ Raoã yeela maam yaa: «Ninsaala, zĩ-kãngã yaa mam geerã zĩiga, la mam naoã tilgr zĩiga. Mam na n paa zĩ-kãngã wakat fãa yĩnga, Israyɛll nebã sʋka. Israyɛll buudã ne b rĩm-dãmbã ka na n leb n dẽgem mam yʋʋrã sẽn welg toorã ne yoobã, la ne rĩm-dãmbã kũum sẽn be b maoong kʋʋb zĩisẽ wã ye.

⁸ Bãmb dag n ningda b rigno-koakã n yegend mam digno-koakã, la b ningd b rignoyã yĩngr da-lugdsã n yegend m doogã yĩngr da-lugdsã. Yaa lalg bal n dag n be maam ne bãmb sʋka. Bãmb dag n maanda a woto n dẽgemd mam yʋʋrã sẽn welg toorã ne yel-beedã b sẽn maanã. Yaa rẽ n kɩte, tɩ mam menes bãmb m sũ-puugrã pʋga.

⁹ Moasã, Israyɛll kambã na n zãaga b yoobã ne b rĩm-dãmbã kũum ne maam, la mam na n zĩnda bãmb sʋk wakat fãa.

¹⁰ La foom a ninsaala, bilg Israyɛll buudã Wẽnd doogã yalẽ sẽn yaa to-to: bɩ yãnd yõk-b b kongrã yĩnga, la bɩ b mak roogã mamsgo.

¹¹ Yãndã sã n yõk bãmb bũmb nins fãa b sẽn maanã yĩnga, bɩ f wilg-b ro-kãng yalẽ wã, a yasrã, a zĩis nins b sẽn tũud n yitã, ne a zĩis nins b sẽn na n tũud n kẽedẽ wã, a naana wã fãa ne a no-tũudsã fãa, n paas ne a naana wã fãa la a tõodã fãa. Rɩk bilg-kãens n wilg-ba. Bãmb na n gesa naana wã fãa ne a no-tũudsã fãa, n kell n maan a woto.

¹² Woto yaa tõog ning sẽn kẽed ne Wẽnd doogã wɛɛngẽ wã. Tãngã zug tẽn-sʋkã, ne vɩʋʋg ning fãa sẽn gilg tãngã yaa zĩig sẽn welg toor n yɩɩda. Woto yaa tõog ning sẽn kẽed ne Wẽnd doogã wɛɛngẽ wã.»

Tẽn-kugrã ne maoongã kʋʋb tõodo

¹³ Ad tẽn-kugrã b sẽn magã sẽn yaa to-to. B mag-a-la ne kãntɩɩse, la kãntɩɩg fãa woglem zugu, b paasa nug-yakemde. Bok ning sẽn gilg tẽn-kugrã zulum dag n yaa kãntɩɩg a yembre, t'a yalmã me yaa kãntɩɩg a yembre. Kogsr ning b sẽn maan n gilg bokã yalem dag n yaa nug-yakemde. Kogsrã n dag n tebend tẽn-kugrã.

¹⁴ Bokã sẽn be tẽngã n tɩ tãag tẽngr soakã yaa kãntɩɩg a yiibu, t'a yalmã yaa kãntɩɩg a yembre. La pipi soakã n tɩ tãag a yiibẽ soabã yaa kãntɩɩg a naase, t'a yalmã yaa kãntɩɩg a yembre.

¹⁵ Bugmã tuglg zĩig rag n yaa kãntɩɩg a naase. Yɩɩl a naas n dag n be bugmã tuglg zĩig zugu.

¹⁶ Bugmã tuglg zĩig woglem dag n yaa kãntɩɩg piig la a yiibu, t'a yalmã me rag n yaa kãntɩɩg piig la a yiibu, la a rag n yaa maoko.

¹⁷ A soakã kɩrems a naasã kɩreng fãa woglem dag n yaa kãntɩɩg piig la a naas-naase, t'a yalmã me yaa kãntɩɩg piig la a naas-naase. La kogsrã b sẽn dag n ning n gilg-a wã yalem yaa kãntɩɩg pʋɩ-sʋka. Bokã sẽn gilg-a wã yalem yaa kãntɩɩg a yembre, la a rʋʋdsã rag n teesa yaang sẽnẽ.

¹⁸ Raoã yeela maam yaa: Ninsaala, Zu-soab a Sẽn-Ka-Saab yetame: «Ad no-tũuds nins sẽn kẽed ne tẽn-kugrã wɛɛngẽ, daar ning b sẽn na n me-a wã yĩnga, sẽn na yɩl n maand maand sẽn yõogd bugmã, la b mesd zɩɩmã a zugã.

¹⁹ Bao loalg n kõ Leevi maan-kʋʋdb nins sẽn yaa a Sadok yagensã, la sẽn kolgd maam n maand tʋʋmdã, tɩ b maan yel-wẽnã sugr kũun maoongo. Maam a Zu-soab a Sẽn-Ka-Saab n yeele.

²⁰ Rɩk a zɩɩmã n ning yɩɩl a naasã sẽn be tẽn-kugrã zugã, la tẽn-kugrã soakã zĩigẽ kɩrems a naasã ne a kogsrã sẽn gilgã zugu. Fo na n maana a woto, n yiis tẽn-kugrã yel-wẽnã, la f maan sugr kosg a yĩnga.

²¹ Fo na n dɩka loalg ning b sẽn kʋ yel-wẽnã sugr kosg yĩngã, n tɩ yõog zĩig b sẽn yãk Wẽnd doogã zak pʋg bõn-kãng yĩnga, n zãag ne zĩig sẽn welg toorã.

²² Rasem a yiib soabã, fo na n talla boɛɛg sẽn ka tar zanga, n wa maan maoong yel-wẽnã sugr kosg yĩnga, tɩ b yiis yel-wẽnã tẽn-kugrã zug wa b sẽn dag n maan ne loalgã.

²³ Fo sã n maan yel-wẽnã sugr kosg maoongã n sɛ, bɩ f ges n yãk loalg sẽn ka tar zanga, ne pe-raoog rũm-bãoonegã sʋk sẽn ka tar zanga,

²⁴ n tall-b n wa maam a Sẽn-Ka-Saab taoore, tɩ maan-kʋʋdbã yugl-b yamsem, la b rɩk-b n maan maoong sẽn yõogd bugum Sẽn-Ka-Saab yĩnga.

²⁵ Beoog sẽn vẽeg fãa halɩ n tãag rasem a yopoe, fo na n kʋʋ boɛɛg a yembr yel-wẽnã sugr kosg yĩnga. Sẽn paase, fo na n waa ne loalg sẽn ka tar zanga, ne pe-raoog sẽn ka tar zang b sẽn yãk rũm-bãoonegã sʋka.

²⁶ Rasem a yopoe pʋgẽ, b na n yiisa yel-wẽnã tẽn-kugrã zugu, n yɩlg-a, la b welg-a toor mam yĩnga.

²⁷ Dasem a yopoe wã sã n wa pidi, sẽn sɩng ne rasem a nii daarã, maan-kʋʋdbã na n maanda yãmb maand sẽn yõodg bugmã, ne y zems-n-taar maandã tẽn-kugrã zugu, la mam na n sak n deeg-y lame. Maam a Zu-soab a Sẽn-Ka-Saab n yeele.»