Ezekiyɛl 4 - WẼNNAAM SEBRE 2014

Bãnd sẽn wilgd Zeruzalɛm sãoongo

¹ La Sẽn-Ka-Saab leb n yeela maam yaa: «Foom a ninsaala, rɩk tãn-koeemd n dɩgl f taoore, n sõog Zeruzalɛm tẽngã naand a zugu.

² Maan wa b sẽn dat n gũbg-a n zab ne-a, tu bok n gũbg-a, n zam tom-dʋy n gilg-a. Tilg tãb-sigs n gilg-a, la f tilg zab-teed nins b sẽn tar n tãad lals n lubdẽ wã n gilg-a.

³ Bɩ f rɩk kut laag n tilg t'a yɩ wa kut lalg foom ne tẽngã sʋka. La f wẽnemd f neng n tees tẽngã n yeel tɩ b gũbg-a n zab ne-a. Bɩ b gũbg-a tɩ yɩ bãnd Israyɛll buudã yĩnga.

⁴ Foom, bɩ f gãand f nug-goabgã zugu, la f rɩgl Israyɛll buudã kongr beenẽ. Fo sẽn na n gãand f nug-goabgã zug tɛk fãa, fo na n zɩɩ Israyɛll buudã kongrã.

⁵ La maam, mam na n kõo foom rasem sõor ning fo sẽn na n zɩ Israyɛll buudã kongrã. Yaa rasem kobs-tã la pis-wɛ, wa sẽn zems Israyɛll buudã sẽn zĩnd kongr pʋgã yʋʋm sõore.

⁶ Fo sã n wa n pids rasem-kãens sõorã, bɩ f wẽnemd n gãand f nug-rɩtgã zugu, n tʋk Zʋʋda buudã kongr dasem pis-naase. Mam kõta foom daar a ye yʋʋmd fãa yĩnga.

⁷ Dẽ zugẽ, bɩ f wẽnemd f nengã la f zẽk f nug zaal n tees Zeruzalɛm tẽngã b sẽn gũbgã, n togs pĩnd-n-bãngr goamã.

⁸ La gese, mam na n sẽba foom ne wĩyã, sẽn na n yɩlẽ tɩ f ra tõog n lebg f nugu, hal tɩ daar ning b sẽn yãk n kõ foomã ta.

⁹ La bɩ fo rɩk bɩle ne Oorz la bɛng ne lãntiy la ki ne kĩu, n ning bũmb pʋg n kalem n tall n maan bur n wãb rasem kobs-tã la pis-wɛ wã fãa fo sẽn na n gãand f nug-goabgã zugã.

¹⁰ Fo na n magda f rɩɩbã n dɩtẽ. La daar fãa, na n yɩɩ sutg pʋgẽ dɩɩb la fo na n dɩt wakat-kãng fãa pʋgẽ.

¹¹ La fo na n yũuda koom wũmbl pʋgẽ daar fãa, wakat-kãng fãa pʋgẽ.

¹² Fo na n wãbda Oorz miisdu. La f na n kɩtame tɩ b rõos-a ninsaal bĩn-koeems zugu, n kɩɩm-a nebã fãa nifẽ.»

¹³ La Sẽn-Ka-Saab yeelame: «Yaa woto la Israyɛll kambã na n dɩt b rɩ-rẽgdã, buud nins fãa pʋgẽ mam sẽn na n dig-b tɩ b kẽngã sʋka.»

¹⁴ La mam yeelame: «Kayto! Sẽn-Ka-Saabo, hal mam yãadem wakat n tãag rũndã, mam zɩ n dẽgem m meng ye. Mam zɩ n wãb rũng sẽn ki a toore, bɩ we-rũng sẽn zendem n base, wall nem-dẽgd buud ba a yembr nan ka kẽ mam noorẽ ye.»

¹⁵ Bãmb yeela maam yaa: «Beneere, bas ninsaal bĩndã, tɩ m kõ-f nag-bĩnd tɩ f rõos f miisdã be.»

¹⁶ Bãmb leb n yeela maam: «Ninsaala, mam na n kɩtame tɩ rɩɩb menem Zeruzalɛm. Nebã na n magda b rɩɩbã n dɩtẽ, la b magd b koomã n yũud ne pelen-yɩgre.

¹⁷ Woto, rɩɩb ne koom na n paoog-b lame, la bãmb ned kam fãa na n zĩi ne pelen-yɩka. Bãmb na n põoga b kongrã pʋga.»